ಚೀನಾದ ಟಯಾನ್ಜಿನ್ ನಗರದಲ್ಲಿ ಆಗಸ್ಟ್ 31ರಿಂದ ಸೆಪ್ಟೆಂಬರ್ 1ರವರೆಗೆ ನಡೆದ ಎರಡು ದಿನಗಳ ಶಾಂಘೈ ಸಹಕಾರ ಸಂಘಟನೆಯ (ಎಸ್ಸಿಒ) ವಾರ್ಷಿಕ ಶೃಂಗಸಭೆಯನ್ನು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮೇಲ್ನೋಟಕ್ಕೆ ನಿರ್ಲಕ್ಷಿಸಿದಂತೆ ವರ್ತಿಸಿದರೂ, ಅಲ್ಲಿನ ಬೆಳವಣಿಗೆಗಳು ಅವರನ್ನು ಪ್ರಭಾವಿಸಿವೆ ಎಂಬುದಕ್ಕೆ ಟ್ರಂಪ್ ಅವರ ಈಗಿನ ಮಾತುಗಳೇ ಸಾಕ್ಷಿ. ಎಸ್ಸಿಒ ಶೃಂಗಸಭೆಯಲ್ಲಿ ಭಾರತದ ಪ್ರಧಾನಿ ನರೇಂದ್ರ ಮೋದಿ, ಚೀನಾ ಅಧ್ಯಕ್ಷ ಷಿ ಜಿನ್ಪಿಂಗ್ ಮತ್ತು ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುತಿನ್ ಅವರು ಪರಸ್ಪರ ದ್ವಿಪಕ್ಷೀಯ ಮಾತುಕತೆ ನಡೆಸಿದ್ದರು. ಈ ವೇಳೆ ರಾಜತಾಂತ್ರಿಕ ಸಂಬಂಧ, ಪ್ರಾದೇಶಿಕ ಸಹಕಾರ, ಅಮೆರಿಕ ಸುಂಕ ಸಮರದಿಂದಾಗಿ ವಿಶ್ವ ವ್ಯಾಪಾರದ ಮೇಲೆ ಉಂಟಾಗಿರುವ ಪರಿಣಾಮ, ಜಾಗತಿಕ ಬೆಳವಣಿಗೆಗಳ ಕುರಿತು ರ್ಚಚಿಸಿದ್ದರು. ಜಾಗತಿಕ ಮಾಧ್ಯಮಗಳು ಈ ಶೃಂಗಸಭೆಯನ್ನು ವಿಶ್ಲೇಷಿಸುತ್ತ ಅಮೆರಿಕದ ಹಠಮಾರಿ ನೀತಿಯಿಂದಾಗಿ ಚೀನಾ, ಭಾರತ, ರಷ್ಯಾದ ಸ್ನೇಹ ಬಲಗೊಂಡಿದೆ ಎಂದಿದ್ದವು.
