ಭಾರತದ ತೈಲ ರಫ್ತಿಗೆ ಧಕ್ಕೆ

ನವದೆಹಲಿ: ರಷ್ಯಾದ ಕಚ್ಚಾ ತೈಲದಿಂದ ತಯಾರಿಸಿದ ಇಂಧನಗಳ ಆಮದಿಗೆ ನಿರ್ಬಂಧ ಹೇರಲು ಮುಂದಾಗಿರುವುದರಿಂದ ಭಾರತದ 15 ಬಿಲಿಯನ್ ಡಾಲರ್ ಮೌಲ್ಯದ ಇಂಧನ ರಫ್ತಿಗೆ ತೊಂದರೆಯಾಗಬಹುದು ಎಂದು ಆರ್ಥಿಕ ಸಂಶೋಧನಾ ಸಂಸ್ಥೆ (ಜಿಟಿಆರ್​ಐ) ಎಚ್ಚರಿಸಿದೆ. ಭಾರತ, ಟರ್ಕಿ, ಯುಎಇಯಂತಹ ದೇಶಗಳು ರಷ್ಯಾದ ಕಚ್ಚಾ ತೈಲವನ್ನು ಸಂಸ್ಕರಿಸಿ ಡೀಸೆಲ್, ಪೆಟ್ರೋಲ್ ಮತ್ತು ಜೆಟ್ ಇಂಧನವಾಗಿ ಪರಿವರ್ತಿಸಿ ಯುರೋಪ್​ಗೆ ರಫ್ತು ಮಾಡುತ್ತಿವೆ. ಈ ದೇಶಗಳಿಗೆ, 27 ರಾಷ್ಟ್ರಗಳನ್ನು ಒಳಗೊಂಡ ಐರೋಪ್ಯ ಒಕ್ಕೂಟದ ನಿರ್ಧಾರದಿಂದ ತೊಂದರೆ ಆಗಲಿದೆ ಎಂದು ಜಿಟಿಆರ್​ಐ ಸಂಸ್ಥಾಪಕ ಅಜಯ್ ಶ್ರೀವಾಸ್ತವ ತಿಳಿಸಿದ್ದಾರೆ.

2023-24ರಲ್ಲಿ ಇಯುಗೆ ಭಾರತ 19.2 ಶತಕೋಟಿ ಡಾಲರ್ ಮೌಲ್ಯದ ಇಂಧನ ಉತ್ಪನ್ನಗಳನ್ನು ರಫ್ತು ಮಾಡಿತ್ತು. 2024-25ರಲ್ಲಿ ಇದು ಶೇ. 27.1ರಷ್ಟು ಕಡಿಮೆಯಾಗಿ 15 ಶತಕೋಟಿ ಡಾಲರ್​ಗೆ ಇಳಿದಿದೆ. 2024-25ರಲ್ಲಿ ರಷ್ಯಾದಿಂದ ಭಾರತ 50.3 ಶತಕೋಟಿ ಡಾಲರ್ ಮೌಲ್ಯದ ಕಚ್ಚಾ ತೈಲ ಆಮದು ಮಾಡಿಕೊಂಡಿದ್ದು, ಇದು ಒಟ್ಟು 143.1 ಶತಕೋಟಿ ಡಾಲರ್​ನ ಕಚ್ಚಾ ತೈಲ ಆಮದಿನ ಮೂರನೇ ಒಂದು ಭಾಗವಾಗಿದೆ.