ನ್ಯಾಯಪೀಠ ಹೇಳಿದ್ದೇನು?: ಚುನಾವಣಾ ಆಯೋಗದ ಉನ್ನತ ಹುದ್ದೆಗಳಿಗೆ ಸಂಬಂಧಿಸಿದ 1991ರ ಕಾಯ್ದೆಯು ಹೆಸರೇ ಸೂಚಿಸುವಂತೆ ಸೇವಾ ನಿಯಮಗಳನ್ನು ಸ್ಪಷ್ಟಪಡಿಸುತ್ತದೆ ಹೊರತು ಆಯ್ಕೆ ಪ್ರಕ್ರಿಯೆಯ ದಕ್ಷತೆ ಕುರಿತು ರ್ಚಚಿಸುವುದಿಲ್ಲ. ಉದಾಹರಣೆಗೆ ಸರ್ಕಾರದ ಮನಸ್ಥಿತಿಯನ್ನೇ ಹೊಂದಿರುವ ‘ಹೌದಪ್ಪ’ ಎನ್ನುವಂತಹ ಅಧಿಕಾರಿಯನ್ನು ಅರ್ಹನೆಂದು ಸರ್ಕಾರ ನೇಮಿಸಿದರೆ, ಆತನಿಗೂ ಈ ಕಾಯ್ದೆಯ ಎಲ್ಲ ನಿಯಮ, ಅಧಿಕಾರ, ಸಂಬಳ, ಸವಲತ್ತು ದೊರೆಯತ್ತದೆ. ಆಗ ಸಂಸ್ಥೆಯ ಸ್ವಾಯತ್ತೆ ಎಲ್ಲಿ ಉಳಿಯಿತು? ಇದು ಚುನಾವಣಾ ಆಯೋಗ; ಸ್ವಾತಂತ್ರ್ಯ ಬಹಳ ಮುಖ್ಯ ಎಂದು ಪೀಠ ಖಚಿತ ಧ್ವನಿಯಲ್ಲಿ ಹೇಳಿತು. ಚುನಾವಣಾ ಆಯುಕ್ತರ ನೇಮಕಕ್ಕೆ ಕೊಲಿಜಿಯಂ ಮಾದರಿಯಂತಹ ವ್ಯವಸ್ಥೆ ಬೇಕು ಎಂದು ಹಲವರು ಆಗ್ರಹಿಸಿದ್ದಾರೆ. ಈ ಪೈಕಿ ಬಿಜೆಪಿಯ ಹಿರಿಯ ನಾಯಕ ಎಲ್.ಕೆ. ಆಡ್ವಾಣಿ ಕೂಡ ಒಬ್ಬರು. 1990ರ ದಶಕದಲ್ಲಿ ಅವರು ಈ ಆಗ್ರಹ ಮಾಡಿದ್ದರು ಎಂದು ಪೀಠ ಹೇಳಿತು.
