ನೈಸರ್ಗಿಕ ವಿಕೋಪಗಳ ವಿರುದ್ಧ ಸರ್ಕಾರಗಳು, ಜನರು ಆಗಾಗ ಸಂಘರ್ಷ ಮಾಡುತ್ತಲೇ ಬಂದಿದ್ದಾರೆ. ಆದರೆ, ಕರೊನಾ ಸೋಂಕಿನ ಸಂಕಟ ಹೊಸದು ಮತ್ತು ಅಷ್ಟೇ ತೀವ್ರ ಸ್ವರೂಪದ್ದು. ಏಕಾಏಕಿಯಾಗಿ ಬಂದು ಎರಗಿದ ಈ ಕಾಯಿಲೆ ವಿರುದ್ಧ ಹೋರಾಡುವುದು ಹೇಗೆ, ತಕ್ಷಣದ ಪರಿಹಾರ ಏನು ಎಂಬ ಬಗ್ಗೆ ಈಗಲೂ ಯಾರಿಗೂ ಸ್ಪಷ್ಟತೆ ಇಲ್ಲ. ಆದರೂ, ಒಂದಷ್ಟು ದಾರಿ ಕಂಡುಕೊಂಡು ಸೋಂಕಿನ ವಿರುದ್ಧ ಸಮರ ಸಾರಲಾಗಿದೆ. ಭಾರತ 130 ಕೋಟಿಗೂ ಅಧಿಕ ಜನಸಂಖ್ಯೆಯನ್ನು ಹೊಂದಿರುವ ದೇಶ. ಹಾಗಾಗಿ, ಉಳಿದ ಸಣ್ಣಪುಟ್ಟ ರಾಷ್ಟ್ರಗಳಿಗಿಂತಲೂ ಇಲ್ಲಿ ಕರೊನಾ ವಿರುದ್ಧದ ಸಂಘರ್ಷ ಹೆಚ್ಚು ಸವಾಲಿನಿಂದ ಕೂಡಿದೆ ಎಂಬುದರಲ್ಲಿ ಎರಡು ಮಾತಿಲ್ಲ. ಹಾಗಾಗಿಯೇ, ಕೇಂದ್ರ ಸರ್ಕಾರ ಮತ್ತು ಎಲ್ಲ ರಾಜ್ಯ ಸರ್ಕಾರಗಳು ಪರಿಣಾಮಕಾರಿ ಕ್ರಮ ಕೈಗೊಂಡು, ಲಾಕ್ಡೌನ್ ಅನ್ನು ಬಿಗಿಗೊಳಿಸಿವೆ. ಹೀಗಿರುವಾಗ, ಎರಡನೇ ಹಂತದ ಲಾಕ್ಡೌನ್ ಆರಂಭವಾದ ಬಳಿಕ (ಏಪ್ರಿಲ್ 15-ಮೇ 3) ಕೇಂದ್ರ ಸರ್ಕಾರ ಸ್ಪಷ್ಟ ಮಾರ್ಗಸೂಚಿ ರೂಪಿಸಿ ಅದನ್ನು ಎಲ್ಲ ರಾಜ್ಯ, ಕೇಂದ್ರಾಡಳಿತ ಪ್ರದೇಶಗಳಿಗೂ ಕಳುಹಿಸಿಕೊಟ್ಟು, ಕಟ್ಟುನಿಟ್ಟಾಗಿ ಜಾರಿಗೆ ತರುವಂತೆ ಸೂಚಿಸಿದೆ.
