ಚಳಿಯನ್ನು ಬಡಿದೋಡಿಸುವ ಭರದಲ್ಲಿ...ಭೂಮಿಯನ್ನು ಮರೆತೆವೇ?

ಅದೊಂದು ಪ್ರಚಲಿತ ಧಾರಾವಾಹಿ. ಮನೆಯ ಹಿರಿಯರು ಕುಟುಂಬದ ಸದಸ್ಯರೆಲ್ಲರಿಗೆ ಸ್ನಾನಕ್ಕಾಗಿ ನೀರನ್ನು ಒಲೆಯಲ್ಲಿ ಬಿಸಿಮಾಡುತ್ತ ಪ್ರೀತಿಯನ್ನು ತೋರಿಸುವ ದೃಶ್ಯ. ಅದರಲ್ಲೇನು ವಿಶೇಷ!

ಮೈಗೆ ಚಳಿಯೆನಿಸುವ ಕಾಲದಲ್ಲಿ ಸ್ನಾನ ಮಾಡಲು, ಬಿಸಿ ನೀರು ಬೇಕೇ ಬೇಕಲ್ಲ! ಚಳಿಗಾಲದ ಈ ದಿನಗಳಲ್ಲಿ ರಸ್ತೆಗಳ ಬದಿಯಲ್ಲಿ ಜನರು ಬೆoಕಿ ಹಾಕಿ ಮೈ ಕಾಯಿಸಿಕೊಳ್ಳುತ್ತಿರುವಾಗ ಸಾಂಪ್ರದಾಯಿಕ ಬಚ್ಚಲ ಮನೆಯ ಹಂಡೆಯಲ್ಲಿರುವ ನೀರು ಬಿಸಿಮಾಡಿದರೆ ಅದು ಸಾಮಾನ್ಯವೆಂದು ನಮಗೆನ್ನಿಸುತ್ತದೆ. ಆದರೆ, ನಗರದ ಬಡಾವಣೆಯೊಂದರಲ್ಲಿ ವಾಸಿಸುವ ಈ ಕಾಲ್ಪನಿಕ ಕುಟುಂಬ ಅದೇಕೆ ಮಕ್ಕಳು ಮತ್ತು ಮೊಮ್ಮಕ್ಕಳ ಮೇಲೆ ತಮಗಿರುವ ಪ್ರೇಮದ ಭಾವವನ್ನು ಪ್ರದಶಿ೯ಸಲು ಆ ಮನೆಯ ಹಿರಿಯರಿಂದ ಒಲೆಯನ್ನು ಉರಿಸುವ ಸನ್ನಿವೇಶವನ್ನು ಸೃಷ್ಠಿಸಿತು ಎನ್ನುವ ಯೋಚನೆ, ಚಿoತನೆಗೆ ನಾಂದಿ ಹಾಡಿದೆ.

ಕಾಲ್ಪನಿಕ ಮತ್ತು ವಾಸ್ತವ ಜಗತ್ತಿನ ವ್ಯತ್ಯಾಸದ ಸೂಕ್ಷ್ಮತೆಯನ್ನು ವೀಕ್ಷಕರು ಕಳೆದುಕೊಳ್ಳುತ್ತಿದ್ದಾರೆಂದು ಸಂಶೋಧನೆಗಳು ಹೇಳುತ್ತಿರುವಾಗ, ನೆಚ್ಚಿನ ಧಾರವಾಹಿಯ ಇoತಹ ಒoದು 'ಸೀನ್' ಪ್ರತಿ ಮನೆಯಲ್ಲೂ ಮರುಕಳಿಸಿದರೆ! ಪರಿಣಾಮ ಕುರಿತು ಯೋಚಿಸಿ. ಅಂದ ಹಾಗೆ ಸಮಸ್ಯೆಯಾಗಿ ಗೋಚರಿಸಬೇಕಿರುವುದು, ಒಲೆಯಲ್ಲಿ 'ಧಗ ಧಗ' ಉರಿಯುತ್ತಿದ್ದ ಇಂಧನ ರೂಪದ ಸೌದೆ. ಮಾನವನ ದಿನನಿತ್ಯದ ಚಟುವಟಿಕೆಗಳಿಗಾಗಿ ಬಗೆಬಗೆಯ ಇಂಧನಗಳ ಆವಿಷ್ಕಾರವಾಗಿದ್ದರೂ, ಕಟ್ಟಿಗೆಯ ಬಳಕೆ ನಿಂತಿಲ್ಲ.

ಬಹುಶ: ಕಟ್ಟಿಗೆಯ ಬಳಕೆ ಅದರ ಲಭ್ಯತೆ ಹಾಗೂ ಸುಲಭವಾಗಿ ಬಳಸುವ ವಿಧಾನ ಇದಕ್ಕೆ ಕಾರಣವಿರಬಹುದು. ನಗರಗಳ ಮನೆಗಳಲ್ಲಿ ಕಟ್ಟಿಗೆಯನ್ನು ಇಂಧನವಾಗಿ ಬಳಸುವುದು ಕಡಿಮೆಯಾದರೂ 'Fireside: Flame Craft Dinin' ಅಂದರೆ ಕಟ್ಟಿಗೆಯನ್ನು ಬಳಸಿ ರುಚಿಯಾದ ಖಾದ್ಯಗಳ ತಯಾರಿಸುತ್ತೇವೆಂದು ಹೇಳಿಕೊಳ್ಳುವ ಪಾಕಶಾಲೆಗಳತ್ತ ಜನ ಹೆಚ್ಚು ಆಕಷಿ೯ತರಾಗುತ್ತಿದ್ದಾರೆ ಎನ್ನುವುದಕ್ಕೆ, ಬೆಳೆಯುತ್ತಿರುವ ಅಂತಹ ಹೋಟೇಲುಗಳ ಸಂಖ್ಯೆ ಸಾಕ್ಷಿ.

ಒಲೆ ಉರಿಸಲು ಬಳಸುವ ಸೌದೆ, ಸ್ವಾಭಾವಿಕವಾಗಿ ಒಣಗಿದ ಮರಗಳ ಕಡಿದು ಸಿದ್ಧಪಡಿಸಿದ ತುಕಡಿಗಳೋ ಅಥವಾ ಹಸಿರಾಗಿರುವ ಮರವನ್ನೇ ಲಾಭಕ್ಕಾಗಿ ಕತ್ತರಿಸಿದ್ದೋ ಎನ್ನುವುದನ್ನು ನಾವು ತಿಳಿದು ಕೊಂಡೆವೇ ಎನ್ನುವತ್ತ ಗಂಭೀರವಾಗಬೇಕಾಗಿದೆ ಅಲ್ಲವೇ? ಸೌದೆ ಬಳಸಿದಾಗ ಹೊಗೆ ಸುತ್ತಿಕೊಂಡರೆ ಹಸಿ ಸೌದೆಯೆನ್ನುತ್ತೇವಲ್ಲವೇ? ಅದು ಮಾರುಕಟ್ಟೆಗೆ ಹೇಗೆ ಬಂತು ನಾವೆಂದಾದರೂ ಯೋಚಿಸಿದ್ದೇವೆಯೇ? ಕಟ್ಟಿಗೆಯ ತುಂಡುಗಳ ಉರುವಲಾಗಿ ಬಳಸುವ ಮುನ್ನ ಪರಿಸರದ ಮೇಲೆ ಆಗಬಹುದಾದ ಪರಿಣಾಮಗಳ ಕುರಿತು ನಾವು ಒಮ್ಮೆ ಯೋಚಿಸಿ ಮುಂದಡಿಯಿಡಬಾರದೇಕೆ?

ತೆಂಗು ಮತ್ತು ತಾಳೆ ಮರದ ಭಾಗಗಳು, ಮರದ ಒಣಗಿದ ಎಲೆಗಳನ್ನೂ ಮನೆಗಳಲ್ಲಿ ಇಂಧನವಾಗಿ ಬಳಸುವುದುಂಟು. ಆದರೆ ಮರ ಅಥವಾ ಸೌದೆ ಗಟ್ಟಿ ಉರುವಲಾದ್ದರಿಂದ ಅವುಗಳ ಬಳಕೆಗೆ ಹೆಚ್ಚು ಒಲವು. ನೀಲಗಿರಿ, ಮಾವು, ಹೊಂಗೆ, ಅಕೇಷಿಯಾ, ಮರಗಳ ತುಂಡುಗಳು ಸಾಮಾನ್ಯವಾಗಿ ಉರುವಲ ರೂಪದಲ್ಲಿ ಮಾರುಕಟ್ಟೆಯಲ್ಲಿ ನಮಗೆ ದೊರೆಯುತ್ತದೆ. ಮರವೊಂದನ್ನು ನಮ್ಮ ಹಿತಕ್ಕಾಗಿ ಕತ್ತರಿಸಿದ ವಿಷಯವೊಂದಡೆಯಾದರೆ, ಉರುವಲಾಗಿ ಬಳಸಿದಾಗ ಹೊರಹೊಮ್ಮುವ ಕಾರ್ಬನ್ ಡೈಆಕ್ಸೈಡ್ (CO2), ಕಾರ್ಬನ್ ಮೊನಾಕ್ಸೈಡ್ (CO)ಕೇವಲ ಪರಿಸರಕ್ಕಲ್ಲದೇ ಆರೋಗ್ಯಕ್ಕೂ ಹಾನಿಕಾರಕ.

ಹೊಗೆಯ ಜೊತೆಗೆ ಸೇರುವ PM2.5 ಮತ್ತು PM10 ಸೂಕ್ಷ್ಮ ಕಣಗಳು ಭೂಮಿಯ ತಾಪಮಾನ ಹೆಚ್ಚಿಸುವಲ್ಲಿ ಕಾರಣವಾಗುವುದರ ಜೊತೆಗೆ ಉಸಿರಾಟದ ತೊಂದರೆ, ಅಸ್ತಮಾ ಮತ್ತು ಕಣ್ಣಿನ ಉರಿಯೂತದ ಸಮಸ್ಯೆಗಳಿಗೂ ಮುನ್ನುಡಿ ಬರೆಯುತ್ತವೆ. ಮನೆಗಳಲ್ಲಿ ಮರದ ಇಂಧನದ ಅವಶ್ಯಕತೆ ಹೆಚ್ಚಿದಂತೆ ಅರಣ್ಯಗಳ ನಾಶದಲ್ಲಿ ನಾವೂ ಕಾರಣವಾಗುತ್ತೇವೆನ್ನುವುದನ್ನು ಇಲ್ಲಿ ಗಮನದಲ್ಲಿಟ್ಟುಕೊಳ್ಳಬೇಕಾಗುತ್ತದೆ.

ವಿದ್ಯುತ್ ಅಥವಾ ಆಧುನಿಕ ಉರುವಲಗಳ ಬಳಕೆಯಿಂದ ಪರಿಸರಕ್ಕೆ ಧಕ್ಕೆಯಾಗುವುದಿಲ್ಲವೇ? ಕೇವಲ ಸೌದೆ ಬಳಸುವುದರಿಂದ ಪರಿಸರಕ್ಕೆ ಹಾನಿಕಾರಕವೇ ಎನ್ನುವ ಪ್ರಶ್ನೆಗಳಿಗೆ ಉತ್ತರವಾಗಿ 25 ಲೀ. ನೀರನ್ನು ಬಿಸಿ ಮಾಡುವ ಪ್ರಕ್ರಿಯೆಯಲ್ಲಿ ಶಕ್ತಿ = ದ್ರವ್ಯಮಾನ × ವಿಶಿಷ್ಟ ಉಷ್ಣಧಾರಿತ್ವ × ತಾಪಮಾನ ವ್ಯತ್ಯಾಸ ಸೂತ್ರದಡಿ ಸುಮಾರು 2.18 kWh ಶಕ್ತಿಯ ವ್ಯಯವಾಗುತ್ತದೆ. ಅಂದರೆ, 25 ಲೀಟರ್ ನೀರನ್ನು 25°C ನಿಂದ ತನ್ನ ಅಂತಿಮ ತಾಪಮಾನ 100°C ಕ್ಕೇರಿಸಬೇಕಾದರೆ ಸುಮಾರು 2.5–3 ಕೆಜಿ ಮರವನ್ನು ಬಳಸುತ್ತೇವೆಂದಾಯ್ತಲ್ಲವೇ!

ಅಂದ ಹಾಗೆ ಈ ಲೆಕ್ಕದಲ್ಲಿ ಪ್ರಕೃತಿ ಹಾಗೂ ಆರೋಗ್ಯದ ಮೇಲಿನ ಪರಿಣಾಮವನ್ನು ನಾವಿಲ್ಲಿಕೊಡಿಸಿಲ್ಲ. ಶೀತ ಪ್ರದೇಶವಾದರೆ ಇನ್ನೂ ಹೆಚ್ಚಿನ ಉರುವಲು ಬೇಕಷ್ಟೇ! ಇಂದು ವಿದ್ಯುತ್​ಗೆ ಪಯಾ೯ಯವಾಗಿ ಗ್ಯಾಸ್ ಗೀಜರ್ ಮತ್ತು ಸೌರಶಕ್ತಿಯನ್ನೂ ಜನ ಬಳಸುತ್ತಿದ್ದಾರೆ. ಸೋಲಾರ್ ಶಕ್ತಿಯ ಬಳಕೆ ಗ್ರಾಮಗಳಲ್ಲಿಯೂ ಇದೀಗ ಸಾಮಾನ್ಯವಾಗಿದೆ. ಸೌರ ಶಕ್ತಿಯ ಮೂಲಕ ತಮ್ಮ ಮನೆಯು ಬಳಸಿ, ಹೆಚ್ಚಾಗಿ ಉತ್ಪಾದಿಸಿದ ವಿದ್ಯುತ್ ಅನ್ನು ವಿದ್ಯುತ್ ಮಂಡಳಿಗೆ ಮಾರಾಟ ಮಾಡುವ ಪ್ರಯತ್ನದಲ್ಲಿ ಅನೇಕರು ಯಶಸ್ವಿಯಾಗಿದ್ದಾರೆ.

ಸಂಯುಕ್ತ ರಾಷ್ಟ್ರಗಳ ಸುಸ್ಥಿರ ಅಭಿವೃದ್ಧಿ ಗುರಿಗಳು -2030 (Sustainable Development Goals ) ಮಾನವ ಅಭಿವೃದ್ಧಿ ಮತ್ತು ಪರಿಸರ ಸಂರಕ್ಷಣೆಯ ನಡುವಿನ ಸಮತೋಲನವನ್ನು ಸಾಧಿಸುವ ಉದ್ದೇಶ ಹೊಂದಿವೆ. ಈ ಪೈಕಿ SDG–7, ಎಲ್ಲರಿಗೂ ಕೈಗೆಟುಕುವ, ವಿಶ್ವಾಸಾರ್ಹ ಮತ್ತು ಸ್ವಚ್ಛ ಶಕ್ತಿಯ ಕುರಿತಾಗಿದ್ದರೆ SDG–13, ಹವಾಮಾನ ಬದಲಾವಣೆಯನ್ನು ಎದುರಿಸಲು ತ್ವರಿತ ಕ್ರಮಗಳು ದೈನಂದಿನ ಶಕ್ತಿ ಬಳಕೆಯ ಕುರಿತಾಗಿ ಚಿಂತಿಸಲು ಹೇಳಿವೆ. ಹೀಗಾಗಿ ಪ್ರತಿ ಮನೆ ಅಥವಾ ಹೋಟೇಲುಗಳಲ್ಲಿ, ರಸ್ತೆ ಬದಿಯಲ್ಲಿ ಉರುವಲಿಗೆ ಬೆಂಕಿ ಹಚ್ಚುವ ಮುನ್ನ ಬಳಸುವ ಇಂಧನದ ದಕ್ಷತೆ, ಅದು ಉಂಟುಮಾಡುವ ಮನೆಯ ಒಳಗಿನ ಮತ್ತು ಹೊರಗಿನ ವಾಯು ಮಾಲಿನ್ಯ ಮತ್ತು ಆರೋಗ್ಯ ಕುರಿತೂ ಯೋಚಿಸಲೇ ಬೇಕು.

ವಿದ್ಯುತ್​ನ ಅನಿಶ್ಚತತೆಯ ನಡುವೆ ನಡೆವ ಬದುಕಿಗೆ ಕೃಷಿ ಅವಶೇಷಗಳು, ಮರದ ಧೂಳು, ಜೋಳದ ದಿಂಡು, ತೆಂಗಿನ ಸಿಪ್ಪೆ, ಕಬ್ಬಿನ ಬಾಗಸ್ ಹೀಗೆ ಕೃಷಿ ಮತ್ತು ಅರಣ್ಯ ತ್ಯಾಜ್ಯಗಳನ್ನು ಬಳಸಿ, ವಿವಿಧ ಅಳತೆಯಲ್ಲಿ ಸಿದ್ಧಪಡಿಸಿದ ಪೆಲೆಟ್​ಗಳನ್ನು ಬಳಸುವುದು ಹೆಚ್ಚು ಸೂಕ್ತ. ಪೆಲೆಟ್​ಗಳ ಬಳಕೆಯಲ್ಲಿ ಇಂಧನದ ದಕ್ಷತೆಯ ಜೊತೆಗೆ ಹೊಗೆಯೂ ಕಡಿಮೆ. ಕಟ್ಟಿಗೆ, ಇದ್ದಿಲನ್ನು ಉರುವಲಾಗಿ ಬಳಸುವ ಎಲ್ಲ ಸ್ಥಳಗಳಲ್ಲೂ ಪಯಾ೯ಯವಾಗಿ ಕೈಗಾರಿಕೆಗಳಲ್ಲೂ, ಥರ್ಮಲ್ ಪ್ಲಾಂಟ್‌ಗಳಲ್ಲಿ ಕಲ್ಲಿದ್ದಲಿನ ಬದಲಿಗೆ ಪೆಲಟ್ಗಳನ್ನು ಬಳಸಬಹುದು.

ಸ್ಥಳೀಯವಾಗಿ ತಯಾರಿಸಬಹುದಾದ ಇoಧನವಾದ್ದರಿಂದ ಅರಣ್ಯದ ಮೇಲಿನ ಒತ್ತಡವೂ ಕಡಿಮೆಯಾಗುವುದು. ತ್ಯಾಜ್ಯದಿಂದ ಸಿದ್ಧವಾಗುವ ಈ ಸಂಪನ್ಮೂಲದ ತಯಾರಿಕೆ ಸ್ವಯಂ ಉದ್ಯೋಗದ ಅವಕಾಶವನ್ನೂ ಸೃಷ್ಠಿಸುತ್ತದೆ. ಗ್ರಾಮಗಳಲ್ಲಿ ಅಥವಾ ಮನೆಯ ಸುತ್ತ ಗಿಡಮರಗಳನ್ನು ಬೆಳೆಸಿರುವ ಮನೆಗಳಲ್ಲಿ ಸುಲಭವಾಗಿ ದೊರೆವ ಜೈವಿಕ ಸಂಪತ್ತು ಉದ್ಯೋಗವೊಂದರ ಸೃಷ್ಠಿಗೆ ಕಾರಣವಾದರೆ, ಒಲೆಗಳಲ್ಲಿ ಉರುವಲು ಹಾಕುವ ಮುನ್ನ ಕ್ಷಣ ಕಾಲ ನಾವು ಯೋಚಿಸುವ ಸ್ಥಿತಿಗೆ ತಲುಪಿದರೆ, ಭೂಮಿಯನ್ನು ಮಾತೃ ಸ್ವರೂಪದಲ್ಲಿ ನೋಡುತ್ತೇವೆ ಎಂದು ಹೇಳುವ ನಮ್ಮ ಮಾತಿಗೂ ಬೆಲೆ ಬರುತ್ತದೆ.

ಲೇಖಕರು ಆರೋಗ್ಯ ಸಂಶೋಧಕರು, ಬರಹಗಾರರು ಮತ್ತು ಸಂವಹನಕಾರರು. ICSSR ಇವರನ್ನು ಹಿರಿಯ ಸoಶೋಧಕಿಯೆಂದು ಗುರುತಿಸಿದೆ. ಶ್ರೀ ಚಿದoಬರ ರಿಸಚ್೯ ಮತ್ತು ಡೆವಲಪ್ಮೆಂಟ್, ಗುಬ್ಬಿ, ಇದರ ಕಾಯ೯ನಿವಾ೯ಹಕರು. ರಚಯಿತಾ ಟ್ರಸ್ಟ್​ನ ಸಂಸ್ಥಾಪಕರು.