ಹೆಚ್ಚುತ್ತಿರುವ ಕರೊನಾ ಸಂಕಷ್ಟ; ಸೆಪ್ಟಂಬರ್​ನಲ್ಲಿ ಶಾಲಾರಾಂಭಕ್ಕೆ ಸಜ್ಜಾಗಿದೆ ಈ ದೇಶ

ನವದೆಹಲಿ: ಕರೊನಾ ಸೋಂಕು ನಿಯಂತ್ರಣಕ್ಕೆ ನೂರಾರು ದೇಶಗಳು ಇನ್ನಿಲ್ಲದಂತೆ ಶ್ರಮ ವಹಿಸುತ್ತಿವೆ. ಇದರ ನಡುವೆಯೇ, ನಿರ್ಬಂಧಗಳನ್ನು ಸಡಿಲಿಸಿ ಆರ್ಥಿಕ ಚಟುವಟಿಕೆಗಳಿಗೆ ಅವಕಾಶ ಮಾಡಿಕೊಡಲಾಗುತ್ತಿದೆ.

ಕರೊನಾದಿಂದಾಗಿ ಜಗತ್ತಿನಾದ್ಯಂತ ಶೈಕ್ಷಣಿಕ ಚಟುವಟಿಕೆಗಳಿಗೆ ಭಾರಿ ಹಿನ್ನಡೆಯಾಗಿದೆ. ಈ ಕಾರಣಕ್ಕಾಗಿಯೇ ಸ್ಪೇನ್​ನಲ್ಲಿ ಮುಂದಿನ ತಿಂಗಳು (ಸೆಪ್ಟಂಬರ್​) ಶಾಲಾ- ಕಾಲೇಜುಗಳನ್ನು ತೆರೆಯಲು ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ.

ಶಾಲಾರಂಭದ ಬಗ್ಗೆ ಈ ಹಿಂದೆ ಮಾಹಿತಿ ನೀಡಲಾಗಿತ್ತು. ಆದರೆ, ಮ್ಯಾಡ್ರಿಡ್​ ಹಾಗೂ ಇತರೆಡೆಗಳಲ್ಲಿ ತಕ್ಕ ಸಿದ್ಧತೆಗಳನ್ನು ಕೈಗೊಳ್ಳಲಾಗಿಲ್ಲ ಎಂಬ ಆಕ್ರೋಶವೂ ಸ್ಥಳೀಯರಲ್ಲಿ ವ್ಯಕ್ತವಾಗಿದೆ.

ಇದನ್ನೂ ಓದಿ; ಶಾಲಾ- ಕಾಲೇಜು ಮತ್ತೆ ಬಂದ್​; ಫ್ಯಾನ್​ ಬಳಕೆಗೂ ನಿರ್ಬಂಧ ವಿಧಿಸಿದೆ ಈ ದೇಶ…! 

ಈ ನಡುವೆ ಹೆಚ್ಚುತ್ತಿರುವ ಕರೊನಾ ಸೋಂಕಿತರ ಸಂಖ್ಯೆ ಆತಂಕಕ್ಕೂ ಕಾರಣವಾಗಿದೆ. ಸ್ಪೇನ್​ನಲ್ಲಿ ಸದ್ಯ ಒಟ್ಟು ಪ್ರಕರಣಗಳ ಸಂಖ್ಯೆ 4 ಲಕ್ಷ ದಾಟಿದೆ. ಕಳೆದ ಮೂರು ದಿನಗಳಲ್ಲಿ ಒಟ್ಟು 19,000ಕ್ಕೂ ಹೆಚ್ಚು ಜನರಲ್ಲಿ ಸೋಂಕು ಕಾಣಿಸಿಕೊಂಡಿದೆ. ಮೃತರ ಸಂಖ್ಯೆ 28,838ಕ್ಕೆ ಏರಿಕೆಯಾಗಿದೆ.

ಸ್ಪೇನ್​ನಲ್ಲಿ ಕರೊನಾ ಸಮುದಾಯಕ್ಕೆ ವ್ಯಾಪಿಸಿದೆ. ಸೋಂಕಿನ ಮೂಲವೇ ಗೊತ್ತಾಗುತ್ತಿಲ್ಲ. ಹೀಗಾಗಿ ನಿಯಂತ್ರಣ ಸವಾಲಾಗಿ ಪರಿಣಮಿಸಿದೆ ಎಂದು ಕೋವಿಡ್​ ಉಸ್ತುವಾರಿ ಡಾ.ಫರ್ನಾಂಡೋ ಸೈಮನ್​ ತಿಳಿಸಿದ್ದಾರೆ. ಜತೆಗೆ ಶಾಲಾರಂಭವಾದರೆ ಸೋಂಕಿನ ಪ್ರಮಾಣ ಭಾರಿ ಪ್ರಮಾಣದಲ್ಲಿ ಹೆಚ್ಚಾಗಲಿದೆ ಎಂಬ ಆತಂಕವೂ ಎದುರಾಗಿದೆ ಎಂದು ಅವರು ಹೇಳಿದ್ದಾರೆ.

ಇದನ್ನೂ ಓದಿ; ಹೊಸ ಶೈಕ್ಷಣಿಕ ವರ್ಷಾರಂಭ; ಖಾಸಗಿ ವಾಹಿನಿಗಳೂ ಶಿಕ್ಷಣಕ್ಕೆ ಮೀಸಲು ಇಲ್ಲಿ…! 

ಇಡೀ ದೇಶದಲ್ಲೀಗ ಮತ್ತಷ್ಟು ಕಠಿಣ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ. ಸಾಮಾಜಿ ಸಭೆ- ಸಮಾರಂಭಗಳಿಗೆ ನಿರ್ಬಂಧ ವಿಧಿಸಲಾಗಿದೆ. 10ಕ್ಕಿಂತ ಹೆಚ್ಚು ಜನರು ಒಂದೆಡೆ ಸೇರುವಂತಿಲ್ಲ. ಇನ್ನು ಕೆಲವೆಡೆ ಆರಕ್ಕಿಂತ ಹೆಚ್ಚು ಜನರು ಗುಂಪಾಗಿ ಇರುವಂತಿಲ್ಲ ಎಂದು ಸೂಚಿಸಲಾಗಿದೆ.

https://www.vijayavani.net/rbi-did-not-print-even-one-rs-2000-note-in-2019-20/