ಈ ನಿಯಮಗಳನ್ನು ಪಾಲಿಸಲು ನ. 30ರ ಗಡುವನ್ನು ನೀಡಲಾಗಿತ್ತು. ಪಾಲಿಸದೇ ಇರುವ ಕಂಪನಿಗಳ ಮೆಸೇಜಿಂಗ್ ಸೇವೆಯಲ್ಲಿ ವ್ಯತ್ಯಯವಾಗಬಹುದು. ಒಟಿಪಿಗಳು ಸ್ಥಗಿತವಾಗಬಹುದು, ಇಲ್ಲವೆ ವಿಳಂಬವಾಗಬಹುದು. ಇದರಿಂದ ಬ್ಯಾಂಕಿಂಗ್, ಇ-ಕಾಮರ್ಸ್, ಸೋಷಿಯಲ್ ಮೀಡಿಯಾ ವೇದಿಕೆಗಳಿಗೆ ತೊಂದರೆ ಆಗಬಹುದು ಎಂಬ ಆತಂಕ ವ್ಯಕ್ತವಾಗಿದೆ. ಆದರೆ ಈ ನಿಯಮಾವಳಿಗಳನ್ನು ಹಂತಹಂತವಾಗಿ ಅನುಷ್ಠಾನಕ್ಕೆ ತರಲು ಉದ್ದೇಶಿಸಿದ್ದ ಟ್ರಾಯ್, ಮೆಸೇಜಿಂಗ್ನಲ್ಲಿ ನಿರತವಾಗಿರುವ ಖಾಸಗಿ ವಾಣಿಜ್ಯ ಕಂಪನಿಗಳಿಗೆ ಪ್ರತಿದಿನವೂ ಎಚ್ಚರಿಸಲು ಅನುವಾಗುವಂತೆ ಸಾಕಷ್ಟು ಸಮಯವನ್ನೂ ದೂರಸಂಪರ್ಕ ಕಂಪನಿಗಳಿಗೆ ನೀಡಿತ್ತು. ಇದೀಗ ಆ ಗಡುವು ಶನಿವಾರಕ್ಕೆ ಅಂತ್ಯವಾಗಿದ್ದು, ಭಾನುವಾರದಿಂದ ಹೊಸ ನಿಯಮ ಜಾರಿಯಾಗಲಿವೆ. ಈ ಮಧ್ಯೆ ಸ್ಪಷ್ಟನೆ ನೀಡಿರುವ ಟ್ರಾಯ್, ಈ ನಿಯಮಗಳು ತಾತ್ಕಾಲಿಕವಾಗಿ ಒಟಿಪಿ ಸೇವೆಗಳ ಮೇಲೆ ಪರಿಣಾಮ ಬೀರಬಹುದಾದರೂ, ನಿಯಮಗಳು ಜಾರಿಗೆ ಬಂದ ಮೇಲೆ ಒಟಿಪಿ ಡೆಲಿವರಿಯಲ್ಲಿ ಯಾವುದೇ ವಿಳಂಬ ಆಗುವುದಿಲ್ಲ ಎಂದು ತಿಳಿಸಿದೆ.
