ವಿದೇಶದಿಂದ ಅಕ್ರಮ ಚಿನ್ನ ಕಳ್ಳಸಾಗಾಣೆ ಪ್ರಕರಣ; ನಟಿ ರನ್ಯಾ ರಾವ್​ಗೆ 102 ಕೋಟಿ ರೂ. ದಂಡ ವಿಧಿಸಿದ ಡಿಆರ್​ಐ| Actor Ranya Rao

Actor Ranya Rao: ದುಬೈನಿಂದ ಅಕ್ರಮ ಚಿನ್ನ ಕಳ್ಳಸಾಗಾಣೆ ಪ್ರಕರಣಕ್ಕೆ ಸಂಬಂಧಿಸಿಂತೆ ಬಂಧನವಾಗಿ ಪರಪ್ಪನ ಅಗ್ರಹಾರ ಜೈಲಿನಲ್ಲಿರುವ ಸ್ಯಾಂಡಲ್​ವುಡ್ ನಟಿ ರನ್ಯಾ ರಾವ್​ಗೆ ಕಂದಾಯ ಗುಪ್ತಚರ ನಿರ್ದೇಶನಾಲಯ(ಡಿಆರ್​ಐ) 102 ಕೋಟಿ ರೂಪಾಯಿ ದಂಡ ವಿಧಿಸಿದೆ ಎಂದು ಮಂಗಳವಾರ (ಸೆ. 02) ವರದಿಯಾಗಿದೆ.

ಜೊತೆಗೆ ಪ್ರಕರಣದಲ್ಲಿ ಭಾಗಿದಾರರಾಗಿರುವ ಹೋಟೆಲ್​ ಉದ್ಯಮಿ ತರುಣ್ ಕೊಂಡರಾಜುಗೆ 63 ಕೋಟಿ ರೂ. ಆಭರಣ ವ್ಯಾಪಾರಿಗಳಾದ ಸಾಹಿಲ್ ಸಕಾರಿಯಾ ಜೈನ್ ಮತ್ತು ಭರತ್ ಕುಮಾರ್ ಜೈನ್​ಗೆ ತಲಾ 56 ಕೋಟಿ ರೂ. ಡಿಆರ್​ಐ ದಂಡ ವಿಧಿಸಿದೆ ಎಂದು ವರದಿಗಳು ಉಲ್ಲೇಖಿಸಿವೆ.

ಮಂಗಳವಾರ(ಸೆ. 02) ಡಿಆರ್​ಐ ಅಧಿಕಾರಿಗಳು ಪರಪ್ಪನ ಅಗ್ರಹಾರ ಜೈಲಿಗೆ ಭೇಟಿ ನೀಡಿ ನಾಲ್ವರು ಆರೋಪಿಗಳಿಗೆ ತಲಾ ಪ್ರತಿಯೊಬ್ಬರಿಗೆ 250 ಪುಟಗಳ ನೋಟಿಸ್ ಮತ್ತು 2,500 ಪುಟಗಳ ಅನುಬಂಧವನ್ನು ನೀಡಿದ್ದಾರೆ ಎಂದು ಪಿಟಿಐ ವರದಿ ಮಾಡಿದೆ.

ಇದನ್ನೂ ಓದಿ: ಪ್ರವಾಹದಿಂದ ತತ್ತರಿಸಿದ ಪಾಕಿಸ್ತಾನ: ನೀರನ್ನು ಚರಂಡಿಗೆ ಬಿಡದೇ ಟಬ್​ನಲ್ಲಿ ಸಂಗ್ರಹಿಸಿ ಎಂದ ಪಾಕ್ ರಕ್ಷಣಾ ಸಚಿವ| Pak Flood

ಪೊಲೀಸ್ ಮಹಾನಿರ್ದೇಶಕ ಶ್ರೇಣಿಯ ಅಧಿಕಾರಿ ಕೆ.ರಾಮಚಂದ್ರ ರಾವ್ ಮಲಮಗಳಾಗಿರುವ ರನ್ಯಾ, ಮಾರ್ಚ್ 3 ರಂದು ದುಬೈನಿಂದ ಆಗಮಿಸುತ್ತಿದ್ದಾಗ ಕೆಂಪೇಗೌಡ ಏರ್​ಪೋರ್ಟ್​ನಲ್ಲಿ 14.8 ಕೆಜಿ ಅಕ್ರಮ ಚಿನ್ನದ ಜೊತೆ ಡಿಆರ್​ಐ ಅಧಿಕಾರಿಗಳ ಬಲೆಗೆ ಬಿದ್ದಿದ್ದರು.

ಜುಲೈನಲ್ಲಿ ಚಿನ್ನದ ಕಳ್ಳಸಾಗಣೆ ಪ್ರಕರಣದಲ್ಲಿ ರನ್ಯಾಗೆ ಕಠಿಣ ವಿದೇಶಿ ವಿನಿಮಯ ಸಂರಕ್ಷಣೆ ಮತ್ತು ಕಳ್ಳಸಾಗಣೆ ಚಟುವಟಿಕೆಗಳ ತಡೆ ಕಾಯ್ದೆ (COFEPOSA) ಅಡಿಯಲ್ಲಿ ಒಂದು ವರ್ಷ ಜೈಲು ಶಿಕ್ಷೆ ವಿಧಿಸಲಾಗಿದೆ. ಈ ಸಂಬಂಧ ಶಿಕ್ಷೆ ತಡೆಕೋರಿ ರನ್ಯಾ ಹೈಕೋರ್ಟ್ ಮೆಟ್ಟಿಲೇರಿದ್ದು ಸೆ. 11ರಂದು ವಿಚಾರಣೆಗೆ ಬರಲಿದೆ ಎನ್ನಲಾಗಿದೆ. (ಏಜೆನ್ಸೀಸ್)

http://vijayavani.net/accepting-bribe-from-japanese-nationals-video-goes-viral-three-traffic-police-officers-suspended