ಇದೇನಾದ್ರೂ ಸಂಭವಿಸಿದರೆ... ಎಲಾನ್ ಮಸ್ಕ್ ವಿಶ್ವದ ಮೊದಲ ಟ್ರಿಲಿಯನೇರ್ ಆಗಲಿದ್ದಾರೆ! Elon Musk

Elon Musk : ಟೆಸ್ಲಾ ಸಿಇಒ ಎಲಾನ್​ ಮಸ್ಕ್ ಅವರು ಸುಮಾರು ಅರ್ಧ ಟ್ರಿಲಿಯನ್ ಡಾಲರ್ ನಿವ್ವಳ ಮೌಲ್ಯವನ್ನು ತಲುಪಿದ ವಿಶ್ವದ ಮೊದಲ ವ್ಯಕ್ತಿಯಾಗಿದ್ದಾರೆ. ಫೋರ್ಬ್ಸ್ ರಿಯಲ್-ಟೈಮ್ ಬಿಲಿಯನೇರ್ಸ್ ಟ್ರ್ಯಾಕರ್ ಪ್ರಕಾರ, ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿಯ ಮೌಲ್ಯ ಈಗ $500.1 ಬಿಲಿಯನ್ ಆಗಿದೆ. ಅವರ ನಿವ್ವಳ ಮೌಲ್ಯವು ಒರಾಕಲ್ ಸಹ-ಸಂಸ್ಥಾಪಕ ಲ್ಯಾರಿ ಎಲಿಸನ್​ಗಿಂತ $150 ಬಿಲಿಯನ್ ಹೆಚ್ಚಾಗಿದೆ.

ದಕ್ಷಿಣ ಆಫ್ರಿಕಾದಲ್ಲಿ ಜನಿಸಿದ ಬಿಲಿಯನೇರ್ ಎಲಾನ್ ಮಸ್ಕ್ ಅವರ ಈ ಅಗಾಧ ಸಂಪತ್ತು ಅವರ ಎಲೆಕ್ಟ್ರಿಕ್ ವಾಹನ ಕಂಪನಿ ಟೆಸ್ಲಾಗೆ ಸಂಬಂಧಿಸಿದೆ. ಸೆಪ್ಟೆಂಬರ್ 15ರ ಹೊತ್ತಿಗೆ, ಅವರು ಕಂಪನಿಯ ಶೇ. 12.4 ಕ್ಕಿಂತ ಹೆಚ್ಚು ಮಾಲೀಕತ್ವವನ್ನು ಹೊಂದಿದ್ದರು. ಬುಧವಾರ ಮಧ್ಯಾಹ್ನ 3.30 ರ ಹೊತ್ತಿಗೆ ಟೆಸ್ಲಾ ಷೇರುಗಳು ಸುಮಾರು ಶೇ. 4 ರಷ್ಟು ಏರಿಕೆಯಾಗಿದ್ದು, ಮಸ್ಕ್ ಅವರ ಸಂಪತ್ತಿಗೆ $9.3 ಬಿಲಿಯನ್ ಸೇರ್ಪಡೆಯಾಗಿದೆ. ಕಂಪನಿಯ ಷೇರು ಮೌಲ್ಯವು ಹೆಚ್ಚುತ್ತಲೇ ಇರುವುದರಿಂದ, ಮಸ್ಕ್ ಅವರ ಸಂಪತ್ತು ಕೂಡ ಬೆಳೆಯುತ್ತಲೇ ಇದೆ.

ಡೊನಾಲ್ಡ್​ ಟ್ರಂಪ್ ಅಮೆರಿಕದ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಂಡ ನಂತರ ಮಸ್ಕ್ ಅವರ ಟೆಸ್ಲಾ ಷೇರುಗಳು ಏರಿಕೆಯಾಗಿವೆ. ಆದರೆ, ಟ್ರಂಪ್​ ಮತ್ತು ಮಸ್ಕ್​ ನಡುವೆ ವೈಮನಸ್ಸು ಇರುವುದು ಗೊತ್ತಿಲ್ಲದ ವಿಚಾರವೇನಲ್ಲ. ಟ್ರಂಪ್​ ಆಡಳಿತದಿಂದ ಬೇಸತ್ತು ಮಸ್ಕ್​ ಅವರು ಸರ್ಕಾರದಿಂದ ಹೊರಬಂದರು. ಮಸ್ಕ್​ ವಿರುದ್ಧ ಟ್ರಂಪ್​ ಆಗಾಗ ವಾಗ್ದಾಳಿ ಕೂಡ ನಡೆಸುತ್ತಿರುತ್ತಾರೆ. ಇಷ್ಟೆಲ್ಲ ಆದರೂ ಮಸ್ಕ್​ ಕಂಪನಿ ಷೇರುಗಳು ಬೆಳೆದಿರುವುದು ನಿಜಕ್ಕೂ ಅಚ್ಚರಿಯ ಸಂಗತಿ ಎಂದು ಹೇಳಬಹುದು.

ಇದನ್ನೂ ಓದಿ: ಕಾಳಿಂಗ ಸರ್ಪ ಮನುಷ್ಯನಿಗಿಂತ ವೇಗವಾಗಿ ಓಡುತ್ತಾ? ನೀವು ಈವರೆಗೆ ಅಂದುಕೊಂಡಿದ್ದು ತಪ್ಪು! King Cobra

ಇನ್ನು ಮಸ್ಕ್​ ಅವರು AI ಸ್ಟಾರ್ಟ್ಅಪ್ XAI ಮತ್ತು ಸ್ಪೇಸ್‌ಎಕ್ಸ್‌ ಕಂಪನಿಯನ್ನು ವಿಸ್ತರಿಸಲು ತಯಾರಿ ನಡೆಸುತ್ತಿದ್ದು, ಇದು ಮಸ್ಕ್ ಅವರ ಸಂಪತ್ತನ್ನು ಮತ್ತಷ್ಟು ಹೆಚ್ಚಿಸಬಹುದು ಎಂದು ಹೇಳಲಾಗುತ್ತಿದೆ.

ಪಿಚ್‌ಬುಕ್ ದತ್ತಾಂಶದ ಪ್ರಕಾರ, ಜುಲೈ ವೇಳೆಗೆ XAI ಮೌಲ್ಯ $75 ಬಿಲಿಯನ್ ಆಗಿತ್ತು. ಇದೇ ಸಂದರ್ಭದಲ್ಲಿ ಸ್ಪೇಸ್‌ಎಕ್ಸ್ ಮೌಲ್ಯ $400 ಬಿಲಿಯನ್ (ಬ್ಲೂಮ್‌ಬರ್ಗ್ ಪ್ರಕಾರ) ಆಗಿತ್ತು. ಮಸ್ಕ್ ಅವರ ಸಂಪತ್ತು ಈ ದರದಲ್ಲಿ ಬೆಳೆಯುತ್ತಿದ್ದರೆ, ಕೆಲವೇ ವರ್ಷಗಳಲ್ಲಿ ವಿಶ್ವದ ಮೊದಲ ಟ್ರಿಲಿಯನೇರ್ ಆಗಬಹುದು ಎಂದು ಫೋರ್ಬ್ಸ್ ವರದಿ ತಿಳಿಸಿದೆ. (ಏಜೆನ್ಸೀಸ್​)

https://www.vijayavani.net/ilt20-a-huge-insult-to-ravichandran-ashwin-he-never-expected-it

https://www.vijayavani.net/3-female-zodiac-signs-who-fall-into-the-love-trap-of-bad-men-do-you-know-why