14 ಗಂಟೆಗಳಲ್ಲಿ 800 ಬಾರಿ ಭೂಕಂಪ…ಭೂಗರ್ಭದಲ್ಲಿ ಹರಡಿದ ಬಿಸಿ ಲಾವಾ, ಐಸ್‌ಲ್ಯಾಂಡ್‌ನಲ್ಲಿ ತುರ್ತು ಪರಿಸ್ಥಿತಿ ಘೋಷಣೆ

ಐಸ್‍ಲ್ಯಾಂಡ್: ಸರಣಿ ಭೂಕಂಪಗಳ ನಂತರ ಜ್ವಾಲಾಮುಖಿ ಸ್ಫೋಟದ ಭಯದಿಂದಾಗಿ ಐಸ್ಲ್ಯಾಂಡ್​​​ನ ನೈಋತ್ಯ ನಗರವಾದ ಗ್ರಿಂಡವಿಕ್​​​​ನಲ್ಲಿ ತುರ್ತು ಪರಿಸ್ಥಿತಿಯನ್ನು ಘೋಷಿಸಲಾಯಿತು. ಇತ್ತೀಚಿನ ವಾರಗಳಲ್ಲಿ ಗ್ರಿಂಡವಿಕ್ ಬಳಿಯ ಫಾಗ್ರಾಡಾಲ್ಸ್‌ಫ್ಜಾಲ್ ಜ್ವಾಲಾಮುಖಿಯ ಸುತ್ತಲೂ ಸಾವಿರಾರು ಭೂಕಂಪಗಳು ದಾಖಲಾಗಿವೆ. ಮುನ್ನೆಚ್ಚರಿಕೆಯಾಗಿ, ಸ್ಥಳೀಯ ಅಧಿಕಾರಿಗಳು ನಗರದಲ್ಲಿ ವಾಸಿಸುವ ಸಾವಿರಾರು ಜನರನ್ನು ಸ್ಥಳಾಂತರಿಸಲು ಆದೇಶ ನೀಡಿದ್ದಾರೆ ಎಂದು ಸುದ್ದಿ ಸಂಸ್ಥೆ ಎಎಫ್‌ಪಿ ಶನಿವಾರ ವರದಿ ಮಾಡಿದೆ.

"ಗ್ರಿಂಡವಿಕ್‌ನ ಉತ್ತರದಲ್ಲಿ ಭೂಕಂಪನ ಚಟುವಟಿಕೆಯಿಂದಾಗಿ ರಾಷ್ಟ್ರೀಯ ಪೊಲೀಸ್ ಮುಖ್ಯಸ್ಥರು ನಾಗರಿಕ ರಕ್ಷಣೆಗಾಗಿ ತುರ್ತು ಪರಿಸ್ಥಿತಿಯನ್ನು ಘೋಷಿಸಿದ್ದಾರೆ" ಎಂದು ಐಸ್‌ಲ್ಯಾಂಡ್‌ನ ನಾಗರಿಕ ರಕ್ಷಣೆ ಮತ್ತು ತುರ್ತು ನಿರ್ವಹಣೆ ಇಲಾಖೆ ಹೇಳಿಕೆಯಲ್ಲಿ ತಿಳಿಸಿದೆ. ಬುಧವಾರ ಮತ್ತು ಗುರುವಾರದ ನಡುವೆ 24 ಗಂಟೆಗಳಲ್ಲಿ ರಿಕ್ಟರ್ ಮಾಪಕದಲ್ಲಿ ಸುಮಾರು 1400 ಭೂಕಂಪಗಳು ದಾಖಲಾಗಿವೆ ಎಂದು ಐಸ್‌ಲ್ಯಾಂಡ್‌ನ ಹವಾಮಾನ ಇಲಾಖೆ ತಿಳಿಸಿದೆ. ಮೆಟ್ ಆಫೀಸ್ ಪ್ರಕಾರ, ಶುಕ್ರವಾರದ ಮೊದಲ 14 ಗಂಟೆಗಳಲ್ಲಿ 800 ಭೂಕಂಪಗಳು ಸಂಭವಿಸಿವೆ.

ಇದರ ನಂತರ, ಗುರುವಾರ, ಅಧಿಕಾರಿಗಳು ಹೆಚ್ಚುತ್ತಿರುವ ಭೂಕಂಪನ ಚಟುವಟಿಕೆಯಿಂದಾಗಿ ಹತ್ತಿರದ ಬ್ಲೂ ಲಗೂನ್ ಹೆಗ್ಗುರುತನ್ನು ಮುಚ್ಚಿದರು. ಐಸ್ಲ್ಯಾಂಡ್ ಮೆಟ್ ಆಫೀಸ್ ಈ ಪ್ರದೇಶದಲ್ಲಿ ದೊಡ್ಡ ಪ್ರಮಾಣದ ಶಿಲಾಪಾಕ (ಕರಗಿದ ಕಲ್ಲುಗಳು, ಇದನ್ನು ಲಾವಾ ಎಂದೂ ಕರೆಯುತ್ತಾರೆ) ನೆಲದಡಿಯಲ್ಲಿ ಹರಡುತ್ತಿದೆ ಮತ್ತು ಭೂಮಿಯ ಮೇಲ್ಮೈಯನ್ನು ಸಿಡಿದು ಯಾವುದೇ ಸಮಯದಲ್ಲಿ ಹೊರಬರಬಹುದು ಎಂದು ಭಯವನ್ನು ವ್ಯಕ್ತಪಡಿಸಿದೆ. ಐಎಂಒ ಶಿಲಾಪಾಕವು ಪಟ್ಟಣವನ್ನು ತಲುಪುವ ಸಾಧ್ಯತೆಯನ್ನು ಹೆಚ್ಚಿದನಂತರ ಗ್ರಿಂಡವಿಕ್‌ ಅನ್ನು ಸ್ಥಳಾಂತರಿಸುವ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ ಎಂದು ಐಸ್‌ಲ್ಯಾಂಡ್‌ನ ನಾಗರಿಕ ಸಂರಕ್ಷಣಾ ಸಂಸ್ಥೆ ತಿಳಿಸಿದೆ.

30 ಜ್ವಾಲಾಮುಖಿಗಳು ಸಕ್ರಿಯ 
ಸುಮಾರು 4 ಸಾವಿರ ಜನಸಂಖ್ಯೆ ಹೊಂದಿರುವ ನಗರದ ಬಹುತೇಕ ರಸ್ತೆಗಳು ತುರ್ತು ಪರಿಸ್ಥಿತಿ ಹೊರತು ಪಡಿಸಿ ಇತರೆ ಕಾರಣಗಳಿಂದ ಬಂದ್ ಆಗಿವೆ. ಐಸ್ಲ್ಯಾಂಡ್ ವಿಶ್ವದ ಅತ್ಯಂತ ಸಕ್ರಿಯ ಜ್ವಾಲಾಮುಖಿಗಳನ್ನು ಹೊಂದಿರುವ ದೇಶವಾಗಿದೆ. ಇಲ್ಲಿ ಸುಮಾರು 30 ಸಕ್ರಿಯ ಜ್ವಾಲಾಮುಖಿಗಳಿವೆ. 2021, 2022 ಮತ್ತು 2023 ರಲ್ಲಿ ಇಲ್ಲಿ ನಿರಂತರ ಜ್ವಾಲಾಮುಖಿ ಸ್ಫೋಟಗಳು ಸಂಭವಿಸಿವೆ. ಈ ಮೊದಲು ಈ ಜ್ವಾಲಾಮುಖಿ ಎಂಟು ಶತಮಾನಗಳವರೆಗೆ ನಿಷ್ಕ್ರಿಯವಾಗಿತ್ತು.

https://www.vijayavani.net/superstar-nayantara-turned-her-back-on-bollywood-shah-rukh-khans-jawan-became-the-reason