ರಾತ್ರಿ ವೇಳೆಯೂ ಕಾರ್ಯಾಚರಿಸುವ ಸಾಮರ್ಥ್ಯ ಪ್ರದರ್ಶನಕ್ಕಿಳಿದ ಭಾರತ

ನವದೆಹಲಿ: ಲಡಾಖ್​ ಪೂರ್ವಭಾಗದಲ್ಲಿ ಜಮಾವಣೆಗೊಳಿಸಿದ್ದ ಸೇನೆಯನ್ನು ಚೀನಾ ಹಿಂಪಡೆದುಕೊಳ್ಳುತ್ತಿದೆ. ತನ್ಮೂಲಕ ಈ ಪ್ರದೇಶದಲ್ಲಿ ಶಾಂತಿಯ ಮರುಸ್ಥಾಪನೆಗೆ ಸಹಕರಿಸುತ್ತಿರುವಂತೆ ತೋರುತ್ತಿದೆ. ಆದರೂ ಮೈಮರೆಯದ ಭಾರತೀಯ ವಾಯುಪಡೆ ರಾತ್ರಿ ವೇಳೆಯಲ್ಲೂ ಕಾರ್ಯಾಚರಣೆ ನಡೆಸುವ ಸಾಮರ್ಥ್ಯದ ಪ್ರದರ್ಶನಕ್ಕೆ ಮುಂದಾಗಿದೆ.

ಲಡಾಖ್​ ವಲಯದಲ್ಲಿ ನೆಲೆಗೊಳಿಸಿರುವ ಮುಂಚೂಣಿ ನೆಲೆಯಲ್ಲಿನ ಯುದ್ಧವಿಮಾನಗಳು, ಅಟ್ಯಾಕ್​ ಹೆಲಿಕಾಪ್ಟರ್​ಗಳನ್ನು ಸೋಮವಾರ ರಾತ್ರಿ ವೇಳೆ ಹಾರಾಡಿಸಿ ಸಾಮರ್ಥ್ಯ ಪ್ರದರ್ಶಿಸಿತು. ಮಿಗ್​ 29, ಸುಖೋಯಿ-30, ಅಪಾಚೆ ಎಎಚ್​-64ಇ ಅಟ್ಯಾಕ್​ ಹೆಲಿಕಾಪ್ಟರ್​ಗಳು, ಸಿಎಚ್​-47ಎಫ್​ (ಐ) ಚಿನೋಕ್​ ಮಲ್ಟಿಮಿಷನ್​ ಹೆಲಿಕಾಪ್ಟರ್​ಗಳು ಮತ್ತಿತರ ಯುದ್ಧವಿಮಾನಗಳು ಮತ್ತು ಹೆಲಿಕಾಪ್ಟರ್​ಗಳು ಈ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದವು.

ಈ ಕಾರ್ಯಾಚರಣೆಯ ಮೂಲಕ ಭಾರತ ತನ್ನ ಶತ್ರುಪಾಳೆಯದವರಿಗೆ ಎಲ್ಲ ವಾತಾವರಣದಲ್ಲೂ, ಎಲ್ಲ ಬಗೆಯ ಪ್ರದೇಶಗಳಲ್ಲೂ ಹಾಗೂ ಹಗಲು ಅಥವಾ ರಾತ್ರಿ ವೇಳೆ ತನ್ನ ಬತ್ತಳಿಕೆಯಲ್ಲಿರುವ ಯುದ್ಧವಿಮಾನಗಳು, ಹೆಲಿಕಾಪ್ಟರ್​ಗಳನ್ನು ಬಳಸಲು ಶಕ್ತವಾಗಿದೆ ಎಂಬುದನ್ನು ಪರೋಕ್ಷವಾಗಿ ತಿಳಿಸಿಕೊಟ್ಟಿತು ಎಂದು ಏರ್​ ಚೀಫ್​ ಮಾರ್ಷಲ್​ (ನಿವೃತ್ತ) ಫಾಲಿ ಎಚ್​ ಮೇಜರ್​ ಹೇಳಿದ್ದಾರೆ.

ಇದನ್ನೂ ಓದಿ: ನೇಪಾಳದ ರಾಜಕೀಯ ರಂಗಸ್ಥಳಕ್ಕೆ ಚೀನಾದ ನೇರ ಪ್ರವೇಶ, ವಿವಾದದಲ್ಲಿ ಚೀನಾ ರಾಯಭಾರಿ

ಯಾವುದೇ ವೃತ್ತಿಪರ ಸೇನೆ ದಿನದ 24 ಗಂಟೆಯೂ ದಾಳಿ ಮಾಡಲು ಸನ್ನದ್ಧವಾಗಿರಬೇಕಾಗುತ್ತದೆ. ಇದಕ್ಕೂ ಮುನ್ನ ಭಾರತೀಯ ವಾಯುಪಡೆಯಲ್ಲಿ ರಾತ್ರಿ ವೇಳೆ, ಗುಡ್ಡಗಾಡು ಪ್ರದೇಶಗಳಲ್ಲಿ ಹಾರಾಟ ಕೈಗೊಳ್ಳುವ ಸಾಮರ್ಥ್ಯದ ಯುದ್ಧವಿಮಾನಗಳ ಕೊರತೆ ಇತ್ತು. ಆದರೆ ಈಗ ಆ ಕೊರತೆಯನ್ನು ಬಹುತೇಕ ನೀಗಿಸಿಕೊಳ್ಳಲಾಗಿದೆ. ಲಡಾಖ್​ನಲ್ಲಿ ಸೋಮವಾರ ರಾತ್ರಿ ಕೈಗೊಳ್ಳಲಾಗಿದ್ದ ಹಾರಾಟಗಳೆಲ್ಲವೂ ಭಾರತೀಯ ವಾಯುಪಡೆಯ ತರಬೇತಿಯ ಭಾಗವಾಗಿತ್ತು ಹಾಗೂ ಪೈಲಟ್​ಗಳು ಮತ್ತಿತರ ಸಿಬ್ಬಂದಿಯ ಕೌಶಲವೃದ್ಧಿಯ ಉದ್ದೇಶ ಹೊಂದಿತ್ತು ಎಂದು ಏರ್​ ವೈಸ್​ ಮಾರ್ಷಲ್​ (ನಿವೃತ್ತ) ಮನಮೋಹನ್​ ಬಹಾದ್ದೂರ್​ ತಿಳಿಸಿದ್ದಾರೆ.

ಪರ್ವತಶ್ರೇಣಿಗಳ ಪ್ರದೇಶಗಳಲ್ಲಿ ರಾತ್ರಿ ವೇಳೆ ಹಾರಾಟ ಕೈಗೊಳ್ಳುವುದು ಸುಲಭದ ಮಾತಲ್ಲ. ಬೆಟ್ಟಗಳ ನೆರಳು ಪೈಲಟ್​ಗಳ ತಪ್ಪುಗ್ರಹಿಕೆ ಅವಕಾಶ ಮಾಡಿಕೊಡುತ್ತದೆ. ಜತೆಗೆ ಪ್ರಪಾತಗಳ ಆಳವನ್ನು ನಿಖರವಾಗಿ ಅಂದಾಜಿಸಲು ಕಷ್ಟವಾಗುತ್ತದೆ. ಈ ಹಿನ್ನೆಲೆಯಲ್ಲಿ ಭಾರತೀಯ ವಾಯುಪಡೆ ಸೋಮವಾರ ಪೈಲಟ್​ಗಳಿಗೆ ತರಬೇತಿ ನೀಡಿ ಒಳ್ಳೆಯ ಕೆಲಸ ಮಾಡಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

https://www.vijayavani.net/on-eve-of-ms-dhonis-39th-birthday-dwayne-bravo-releases-new-song/