ಆಧಾರ್ ಕಾರ್ಡ್ ಮತ್ತು ರೇಷನ್ ಕಾರ್ಡ್ನಲ್ಲಿ ಹೆಸರು ಡಿಲೀಟ್ ಮಾಡಿಸಿದರೆ ವಿಚ್ಛೇದನ ಅರ್ಜಿಗೆ ಸಹಿ ಹಾಕುತ್ತೇನೆ ಎಂದು ದಿವ್ಯಾಳನ್ನು ನಂಬಿಸಿದ್ದ ಉಮೇಶ್, ಆ.12ರಂದು ಆಕೆಯನ್ನು ಮಾದನಾಯಕನಹಳ್ಳಿಯಿಂದ ಕರೆತರಲು ಹೋಗಿದ್ದ. ಆದರೆ, ಅನುಮಾನದಿಂದ ಸ್ನೇಹಿತೆ ಜತೆಗೆ ಬಾಡಿಗೆ ಕಾರಿನಲ್ಲಿ ದಿವ್ಯಾ ಮಾಗಡಿಗೆ ಬಂದಿದ್ದಳು. ಹೆಸರು ಡಿಲೀಟ್ ಪ್ರಕ್ರಿಯೆ ತಡವಾಗಿದೆ. ಅಷ್ಟರಲ್ಲಿ ಸ್ನೇಹಿತೆಗೆ ಮನೆಯಿಂದ ಕರೆ ಬಂದಿದ್ದರಿಂದ ಆಕೆಯನ್ನು ಕಾರಿನಲ್ಲಿ ವಾಪಾಸ್ ಕಳುಹಿಸಿಕೊಟ್ಟಿದ್ದಳು. ಇದೇ ಅವಕಾಶವನ್ನು ಬಳಕೆ ಮಾಡಿಕೊಂಡು ಉಮೇಶ್, ಪೂರ್ವಯೋಜನೆಯಂತೆ ಸಂಜೆ ವೇಳೆಗೆ ಮಾಗಡಿಯ ಬಳಿ ಹೂಜಗಲ್ ಬೆಟ್ಟದ ಬಸವಣ್ಣನ ದೇವಸ್ಥಾನಕ್ಕೆ ಪೂಜೆ ಮಾಡಿಸುವ ನೆಪದಲ್ಲಿ ದಿವ್ಯಾಳನ್ನು ಕರೆತಂದಿದ್ದ. ಅಲ್ಲಿ ಸಹಚರರಾದ ಭರತ್, ಶಶಾಂಕ್, ರೋಹಿತ್ ಮತ್ತು ಕಿರಣ್ ಜತೆ ಸೇರಿ ದಿವ್ಯಾಳನ್ನು ಕೊಲೆ ಮಾಡಿದ್ದರು. ನಂತರ ಶವವನ್ನು ಬೈಕ್ನಲ್ಲಿ ಕಟ್ಟಿಕೊಂಡು 4 ಕಿಲೋಮೀಟರು ದೂರದ ಚೀಲೂರು ಬೆಟ್ಟದ ತಪ್ಪಲಿಗೆ ಕೊಂಡೊಯ್ಯುದು ಗುಂಡಿ ತೆಗೆದು ಹೂತು ಹಾಕಿ ಪರಾರಿಯಾಗಿದ್ದರು.
