ಲಾಕ್‌ಡೌನ್ ಮುಂದುವರಿಕೆ ಸುದ್ದಿ ಕೇಳಿ ಮುಂಬೈಯಲ್ಲಿ ರಸ್ತೆಗಿಳಿದ ನೂರಾರು ಕೂಲಿಕಾರ್ಮಿಕರು!

ಮುಂಬೈ: ಮುಂದಿನ ತಿಂಗಳ ಮೂರರವರೆಗೂ ಲಾಕ್‌ಡೌನ್ ಮುಂದುವರಿಯುತ್ತದೆ ಎಂದು ಪ್ರಧಾನಿ ಮೋದಿ ಮಂಗಳವಾರ ಘೋಷಿಸಿದ ಕೆಲವೇ ಗಂಟೆಗಳಲ್ಲಿ ಮುಂಬೈನ ನೂರಾರು ವಲಸೆ ಕಾರ್ಮಿಕರು ಬಸ್ ನಿಲ್ದಾಣದ ಬಳಿ ಸೇರಿ ತಮಗೆ ತಮ್ಮ ಊರಿಗೆ ಹೋಗುವ ವ್ಯವಸ್ಥೆ ಮಾಡಬೇಕೆಂದು ಆಗ್ರಹಿಸಿದ ಘಟನೆ ನಡೆದಿದೆ.

ಸಂಜೆ ಸುಮಾರು 4 ಗಂಟೆ ವೇಳೆಗೆ ಸಬರ್ಬನ್ ಬಾಂದ್ರಾ ಪ್ರದೇಶದಲ್ಲಿರುವ ಬಸ್ ನಿಲ್ದಾಣದ ಹತ್ತಿರ ನೂರಾರು ಕಾರ್ಮಿಕರು ಸೇರಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ತಕ್ಷಣವೇ ಸ್ಥಳಕ್ಕಾಗಮಿಸಿದ ಪೊಲೀಸರು ಲಘು ಲಾಠಿ ಪ್ರಹಾರ ಮಾಡಿ ಅವರನ್ನೆಲ್ಲ ಅಲ್ಲಿಂದ ಚದುರಿಸಿದ್ದಾರೆ.

ಲಾಕ್ ಡೌನ್ ಆದೇಶ ಜಾರಿಯಲ್ಲಿದ್ದರೂ ಇಷ್ಟು ಜನ ಒಮ್ಮೆಲೇ ಒಂದು ಕಡೆ ಸೇರಲು ಹೇಗೆ ಸಾಧ್ಯ ಎಂಬುದರ ಬಗ್ಗೆ ತನಿಖೆ ನಡೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಕಳೆದ 21 ದಿನಗಳ ಹಿಂದೆ ಲಾಕ್‌ಡೌನ್ ಆರಂಭವಾದಾಗಿನಿಂದ ಕೂಲಿ ಕಾರ್ಮಿಕರಿಗೆ ಕೆಲಸವಿಲ್ಲದಂತಾಗಿದೆ. ಸರ್ಕಾರ, ಸ್ವಯಂ ಸೇವಾ ಸಂಸ್ಥೆಗಳು ಮತ್ತು ಸ್ಥಳೀಯ ಆಡಳಿತ ಕೊಡುವ ಆಹಾರವನ್ನೇ ಅವರು ನೆಚ್ಚಿಕೊಂಡಿರುವ ಸ್ಥಿತಿ ತಲೆದೋರಿದೆ.

https://www.vijayavani.net/coronamukta-is-the-only-place-where-no-infection-occurs-for-28-days/