ಜೂಜಾಟದಲ್ಲಿ ಸೋತ ಪಾಂಡವರು ಹನ್ನೆರಡು ವರ್ಷ ವನವಾಸ ಮತ್ತು ಒಂದು ವರ್ಷ ಅಜ್ಞಾತವಾಸ ಅನುಭವಿಸುವ ದುರಂತವನ್ನು ತಂದುಕೊಂಡರು. ಅಜ್ಞಾತವಾಸಕ್ಕೆ ವಿರಾಟನ ರಾಜ್ಯಕ್ಕೆ ಹೋಗುವ ನಿರ್ಧಾರವನ್ನು ಮಾಡಿದರು. ಕಂಕಭಟ್ಟನೆಂದು ಯುಧಿಷ್ಠಿರ ಪೂಜೆಗೆ, ವಲಲನೆಂದು ಭೀಮ ಅಡುಗೆಗೆ, ಬೃಹನ್ನಳೆ ಎಂದು ಅರ್ಜುನ ನೃತ್ಯಕ್ಕೆ, ನಕುಲ, ಸಹದೇವರು ಅಶ್ವರಕ್ಷಣೆಗೆ, ಗೋವುಗಳ ರಕ್ಷಣೆಗೆ ನಿಯೋಜಿಸಲ್ಪಟ್ಟರು. ಸೈರಂಧಿ್ರ ಎಂಬ ಹೆಸರಿನಿಂದ ದ್ರೌಪದಿಯು ರಾಣಿಯ ಸೇವಕಿಯಾಗಿ ಸೇರಿಕೊಂಡಳು. ಅವಧಿ ಮುಗಿಯಲು ಇನ್ನು ಕೆಲವೇ ದಿನಗಳಿದ್ದಂತೆ ಮಹಾರಾಣಿಯ ತಮ್ಮನಾದ ಕೀಚಕ ಸ್ಪುರದ್ರೂಪಿಯಾದ ಪಾಂಚಾಲಿಯನ್ನು ತಾನು ಇಷ್ಟಪಡುವುದಾಗಿಯೂ, ಆಕೆಯನ್ನು ತನ್ನ ಅಂತಃಪುರಕ್ಕೆ ಕಳಿಸಬೇಕೆಂದೂ ರಾಣಿಯನ್ನು ಒತ್ತಾಯಿಸಿದ. ಅಕ್ಕ ಸುದೇಷ್ಣೆ ಕೀಚಕನ ಮಾತನ್ನು ವಿರೋಧಿಸಿದರೂ ಆತನಿಗೆ ಹೆದರಿ ಪಾಂಚಾಲಿಯನ್ನು ಕೀಚಕನ ಬಳಿ ಕಳುಹಿಸಲು ಪ್ರಯತ್ನಿಸಿದಳು.
