ಗೃಹಿಣಿಯರಾದ ನಾವು ನಮ್ಮ ಗುರಿ, ನಮ್ಮ ಆಸೆ ಬದಿಗಿಟ್ಟು ಸಂಸಾರಕ್ಕಾಗಿ, ಮಕ್ಕಳಿಗಾಗಿ ದುಡಿಯುತ್ತೇವೆ. ನಾವು ಮಾಡುವ ಕೆಲಸಕ್ಕೆ ಯಾವುದೇ ಸಂಬಳವಿಲ್ಲ ಮತ್ತು ನಮಗೆ ಯಾವುದೇ ರಜೆ ದಿನಗಳಿಲ್ಲ ಎಂದು ತಿಳಿದಿದ್ದರೂ ನಾವು ನಮ್ಮ ಕರ್ತವ್ಯವನ್ನು ಸಂತೋಷದಿಂದ, ಮನಃಪೂರ್ವಕವಾಗಿ, ನಿಷ್ಠೆಯಿಂದ ಪಾಲಿಸುತ್ತ ಬರುತ್ತಿದ್ದೇವೆ, ಮುಂದೆಯೂ ಪಾಲಿಸುತ್ತೇವೆ. ನಾವು ಒಂದು ದಿನ ರಜೆ ತೆಗೆದುಕೊಂಡರೆ ಮನೆಯ ಪರಿಸ್ಥಿತಿ ಹೇಗಿರುವುದು ಎನ್ನುವುದು ಗೊತ್ತಿರುವ ವಿಷಯ. ನಾವು ಮಾಡುತ್ತಿರುವ ಕೆಲಸದ ಬಗ್ಗೆ ನಮಗೆ ಅಭಿಮಾನವಿರಬೇಕು ಮತ್ತು ಗೌರವವಿರಬೇಕು. ಗೃಹಿಣಿ ಎಂದರೆ ಅಡುಗೆಮನೆ ಮತ್ತು ಮನೆ ಕೆಲಸ. ಇದು ಬಿಟ್ಟರೆ ಬೇರೆ ಪ್ರಪಂಚವಿಲ್ಲ ಎಂಬ ತಪ್ಪು ಕಲ್ಪನೆ ಇದೆ. ಈ ಮನಸ್ಥಿತಿಯಿಂದ ನಾವು ಹೊರಬರಬೇಕು. ಸಂಸಾರ ಮತ್ತು ಮಕ್ಕಳ ಜವಾಬ್ದಾರಿಯೊಂದಿಗೆ ನಮ್ಮ ಜವಾಬ್ದಾರಿಯನ್ನೂ ತೆಗೆದುಕೊಳ್ಳಬೇಕು. ನಾವು ಮಾನಸಿಕ, ದೈಹಿಕವಾಗಿ ಆರೋಗ್ಯದಿಂದಿದ್ದರೆ ಮಾತ್ರ ನಮ್ಮ ಸ್ಥಾನಕ್ಕೆ ನ್ಯಾಯ ಒದಗಿಸಲು ಸಾಧ್ಯ. ಗೃಹಿಣಿಯಾಗುವುದು ಸುಲಭದ ಮಾತಲ್ಲ ಅದಕ್ಕೂ ಸಹ ಕೌಶಲಗಳಿರಬೇಕು. ಆ ಕೌಶಲಗಳು ನಮ್ಮಲ್ಲಿ ಇರುವುದರಿಂದಲೇ ನಮ್ಮ ಸ್ಥಾನವನ್ನು ಜವಾಬ್ದಾರಿಯಿಂದ ಮುನ್ನಡೆಸಿಕೊಂಡು ಹೋಗಲು ಸಾಧ್ಯವಾಗುವುದು. ನಮ್ಮ ಮೇಲೆ ನಮಗೆ ಗೌರವ ಮತ್ತು ವಿಶ್ವಾಸವಿದ್ದರೆ ಎಂತಹ ಕಠಿಣ ಕೆಲಸಗಳೂ ಸುಲಭವಾಗಿಬಿಡುತ್ತವೆ.
