ಗಣ್ಯಾತಿಗಣ್ಯರಿಗೆ ಉಚಿತ ಗೈಡ್?

ಹಂಪಿಯನ್ನೇ ನಂಬಿರುವ ಪ್ರವಾಸಿ ಮಾರ್ಗದರ್ಶಿಗಳಿಗೆ ಪ್ರವಾಸಿಗರೇ ಜೀವಾಳ. ಆದರೆ, ವಿವಿಐಪಿ ಹಾಗೂ ಅವರ ಕುಟುಂಬ ಮಾತ್ರವಲ್ಲದೆ ಅಧಿಕಾರಿಗಳು ಸೂಚಿಸುವ ಅತಿಥಿಗಳಿಗೆ ಅವರು ಉಚಿತ ಮಾರ್ಗದರ್ಶನ ಮಾಡುವ ಶಿಕ್ಷೆ ಅನುಭವಿಸುತ್ತಿದ್ದಾರೆ. ಇದು ಸರ್ಕಾರ ಅದೇಶವಲ್ಲವಾದರೂ, ಪ್ರವಾಸೋದ್ಯಮ ಇಲಾಖೆ ಅಧಿಕಾರಿಗಳ ಪ್ರತಿಷ್ಠೆ ಸೂಚನೆಯಾಗಿದೆ!

ಹಂಪಿಗೆ ಸ್ಥಳೀಯರಲ್ಲದೆ ದೇಶ-ವಿದೇಶಿಗರು ಹೆಚ್ಚಿನ ಸಂಖ್ಯೆಯಲ್ಲಿ ಭೇಟಿ ನೀಡುತ್ತಾರೆ. ವಿಜಯನಗರ ಸಾಮ್ರಾಜ್ಯದ ಇತಿಹಾಸ, ಇಲ್ಲಿನ ಪರಿಸರ ಅರಿಯಲು ಬರುವವರು ಮಾರ್ಗದರ್ಶಿಗಳಿಂದ ಮೊರೆ ಹೋಗುತ್ತಾರೆ. ಹಿಂದೆ 80 ಮಾರ್ಗದರ್ಶಿಗಳಿದ್ದ ಹಂಪಿಯಲ್ಲೀಗ 180 ಜನರಿದ್ದಾರೆ. ತಾಲೂಕಿನ ಕಡ್ಡಿರಾಂಪುರ ಕ್ರಾಸ್, ಕಮಲಾಪುರದ ಹಂಪಿ ರಸ್ತೆ, ಹಂಪಿಯ ಸಾಸಿವೆ ಕಾಳು ಗಣಪತಿ, ವಿರೂಪಾಕ್ಷೇಶ್ವರ ದೇಗುಲ, ವಿಜಯವಿಠಲ ದೇಗುಲ ಸೇರಿದಂತೆ ಇತರೆ ಸ್ಮಾರಕಗಳ ಬಳಿ ಪ್ರವಾಸಿಗರನ್ನು ಮಾರ್ಗದರ್ಶಿಗಳು ಕಾಯುತ್ತಿರುತ್ತಾರೆ. ಕೆಲವೊಮ್ಮೆ ಪ್ರವಾಸಿಗರು ಸಿಗದೆ ಬರಿಗೈಯಲ್ಲಿ ಮನೆಗೆ ಹೋಗುತ್ತಾರೆ.

ಇದರ ನಡುವೆ ಇಲ್ಲಿಗೆ ಭೇಟಿ ನೀಡುವ ಉನ್ನತಾಧಿಕಾರಿಗಳು ಅಥವಾ ವಿವಿಐಪಿಗಳು ಮಾತ್ರವಲ್ಲದೆ, ಅಧಿಕಾರಿಗಳು ಸೂಚಿಸುವ 9 ಪ್ರವಾಸಿಗರಿಗೆ ಮಾರ್ಗದರ್ಶಿಗಳು ಹಂಪಿ ಪರಿಚಯವನ್ನು ಉಚಿತ ಮಾಡಿಕೊಡಬೇಕಿದೆ. ಇದಕ್ಕೆ ನಿರಾಕರಿಸಿದರೆ ಬೇರೆದಾರಿಗಳ ಮೂಲಕ ಕಿರುಕುಳ ನೀಡಲಾಗುತ್ತಿದೆ. ಪ್ರವಾಸಿಗರು ಕೊಡುವ ಹಣದಲ್ಲೇ ಜೀವನ ನಡೆಸುವ ಇವರಿಗೆ ಇಲಾಖಾಧಿಕಾರಿಗಳು ಸೂಚಿಸುವ ಉಚಿತ ಮಾರ್ಗದರ್ಶನ ನುಂಗಲಾರದ ತುತ್ತಾಗಿದೆ. ಈ ಭಾಗದಲ್ಲಿ ಬಿಸಿಲು ಹೆಚ್ಚು. ಅದರಲ್ಲೂ ಫೆಬ್ರವರಿಯಿಂದ ಜೂನ್‌ವರೆಗೆ ಅತಿ ಹೆಚ್ಚು ಬಿಸಿಲು. ಈ ಸಮಯದಲ್ಲಿ ಪ್ರವಾಸಿಗರ ಸಂಖ್ಯೆ ವಿರಳ. ಈ ಸಮಯದಲ್ಲಿ ಮಾರ್ಗದರ್ಶಿಗಳಿಗೆ ಆದಾಯ ಇರುವುದಿಲ್ಲ. ಜೂನ್ ನಂತರ ಮಳೆಗಾಲ ಆರಂಭವಾದಾಗ ಪ್ರವಾಸಿಗರು ಬರತೊಡಗುತ್ತಾರೆ. ಚಳಿಗಾಲಕ್ಕೆ ಇಲ್ಲಿನ ಪರಿಸರ ಪ್ರವಾಸಿಗರಿಗೆ ಪೂರಕವಾಗಿರುತ್ತದೆ. ಜನವರಿವರೆಗೆ ಪ್ರವಾಸಿಗರ ಸಂಖ್ಯೆ ಹೆಚ್ಚಿದ್ದರೂ ಕೆಲವರಷ್ಟೇ ಮಾರ್ಗದರ್ಶಿಗಳನ್ನು ಪಡೆಯುತ್ತಾರೆ. ಈ ದಿನಗಳಲ್ಲಿ ಹಂಪಿಗೆ ಉನ್ನತ ಮಟ್ಟದ ಅಧಿಕಾರಿಗಳು, ದೇಶ-ವಿದೇಶದ ವಿವಿಐಪಿಗಳು ಭೇಟಿ ನೀಡುವುದು ಹೆಚ್ಚು. ಆದರೆ, ದುಡಿಯುವ ದಿನಗಳಲ್ಲೇ ಉಳ್ಳವರಿಗೆ ಉಚಿತ ಮಾರ್ಗದರ್ಶನ ನೀಡಿದರೆ ನಮ್ಮ ಹೊಟ್ಟೆ ತುಂಬುವುದಾರೂ ಹೇಗೆ ಎಂಬುದು ಮಾರ್ಗದರ್ಶಿಗಳ ಒದ್ದಾಟ.

ಈ ಹಿಂದೆ ಸರ್ಕಾರದ ಆರ್ಥಿಕ ಸಹಾಯ ಇಲ್ಲದೆ ಪ್ರವಾಸಿಗರು ನೀಡುವ ಹಣದಿಂದ ಗೈಡ್‌ಗಳು ಜೀವನ ನಡೆಸುತ್ತಿದ್ದರು. 2022ರಿಂದ ಐದು ಸಾವಿರ ರೂ. ಪ್ರೋತ್ಸಾಹ ಧನ ನೀಡಲಾಗುತ್ತಿದೆ. ಆದ್ದರಿಂದ ಇಲಾಖೆಯಿಂದ ಸೂಚನೆ ನೀಡುವ ವ್ಯಕ್ತಿಗಳಿಗೆ ಉಚಿತ ಮಾರ್ಗದರ್ಶನ ನೀಡಲೇಬೇಕು. ಇಲ್ಲವೆಂದರೆ ಪ್ರೋತ್ಸಾಹಧನ. ತಡೆ ಹಿಡಿಯಲಾಗುವುದು ಎಂದು ಅಧಿಕಾರಿಗಳು ಮೌಖಿಕ ಆದೇಶ ನೀಡುತ್ತಾರೆ ಎಂದು ಮಾರ್ಗದರ್ಶಿಗಳ ಅಳಲು.

ಹಂಪಿಯಲ್ಲಿ 180 ಪ್ರವಾಸಿ ಮಾರ್ಗದರ್ಶಿಗಳಿದ್ದಾರೆ. ಇದರಲ್ಲಿ ಉಚಿತ ಮಾರ್ಗದರ್ಶನ ನೀಡಲು ದಿನಕ್ಕೆ ಪಾಳೆಯಯಂತೆ 10 ಜನ ಮೀಸಲಾಗಿರುತ್ತಾರೆ. ಈ ಸೀಜನ್‌ನಲ್ಲಿ ವಿವಿಐಪಿ ಪ್ರವಾಸಿಗರ ಸಂಖ್ಯೆ ಹೆಚ್ಚಿರುತ್ತಾರೆ. ಇನ್ನೂ ವೀಕೆಂಡ್‌ನಲ್ಲಿ ಅತಿಹೆಚ್ಚು ಬರುತ್ತಾರೆ. ಆಗ 20ಕ್ಕೂ ಅಧಿಕ ಗೈಡ್ ಗಳನ್ನು ಪ್ರವಾಸೋದ್ಯಮ ಇಲಾಖೆ ಅಧಿಕಾರಿಗಳು ಪಡೆದು ಉಚಿತ ಮಾರ್ಗದರ್ಶನ ಕೊಡಿಸುತ್ತಾರೆ.