ಆನೆ-ಮಾನವ ಸಂಘರ್ಷ ತಡೆಯಲು ಅಲ್ಲಲ್ಲಿ ನೈಸರ್ಗಿಕ ವಿಧಾನಗಳ ಪ್ರಯೋಗವೂ ನಡೆಯುತ್ತಿದೆ. ಅರಣ್ಯದೊಳಗೆ ಹೊಂಡಗಳನ್ನು ತೋಡಿ ಅಲ್ಲಿಯೇ ಆನೆಗಳಿಗೆ ಕುಡಿಯುವ ನೀರು ಲಭ್ಯವಾಗುವಂತೆ ಮಾಡುವುದು, ಅರಣ್ಯದಂಚಿನಲ್ಲಿ ಆನೆಗಳಿಗೆ ಇಷ್ಟವಾದ ಬಿದಿರು, ಕಬ್ಬು, ಬಾಳೆ, ಜೋಳ ಮತ್ತಿತರ ಬೆಳೆಗಳನ್ನು ಬೆಳೆದು ಇವುಗಳು ಕಾಡಿನಿಂದ ಹೊರಗೆ ಹೋಗದಂತೆ ತಡೆಯುವುದು, ಅರಣ್ಯ ಮತ್ತು ಜನವಸತಿ ಪ್ರದೇಶಗಳ ಮಧ್ಯೆ ಆನೆಗಳಿಗೆ ಹಿಡಿಸದ ಘಾಟು ಸಸ್ಯಗಳನ್ನು ಬೆಳೆಯುವುದು, ಮೆಣಸಿನ ಹೊಗೆ ಹೊರಹಾಕುವುದು ಮತ್ತಿತರ ಪ್ರಯತ್ನಗಳೂ ನಡೆಯುತ್ತಿವೆ. ಇದರಿಂದಲೂ ಆನೆ ಹಾವಳಿಯನ್ನು ಪರಿಣಾಮಕಾರಿಯಾಗಿ ತಡೆಯಲು ಸಾಧ್ಯವಾಗಿಲ್ಲ. ಇವುಗಳ ಮಧ್ಯೆ ಜೇನು ನೊಣದ ಬೇಲಿ ಬಳಕೆ ಬಗ್ಗೆ ಸಾಕಷ್ಟು ನಿರೀಕ್ಷೆಗಳಿವೆ. ಅರಣ್ಯದಂಚಿನ ರೈತರು, ಬೆಳೆಗಾರರು ತೋಟ, ಗದ್ದೆಯ ಬೇಲಿಗಳಲ್ಲಿ ಜೇನು ಪೆಟ್ಟಿಗೆ ಇಡುವುದರಿಂದ ಜೇನು ತುಪ್ಪ ಉತ್ಪಾದಿಸಿ ಮಾರಾಟ ಮಾಡುವ ಅವಕಾಶ ಇದೆ. ಮೇಣವನ್ನೂ ಮಾರಬಹುದು. ಜೇನು ಹುಳುಗಳು ಪರಾಗಸ್ಪರ್ಶಕ್ಕೆ ಹೆಚ್ಚು ಸಹಕಾರ ನೀಡುವುದರಿಂದ ಕಾಫಿ, ಭತ್ತ ಸೇರಿ ವಿವಿಧ ಬೆಳೆಗಳ ಉತ್ಪಾದನೆಯೂ ಹೆಚ್ಚಾಗಲಿದೆ.
