ನ್ಯೂಸ್

ಕುಡುಪು ಗುಂಪುಹತ್ಯೆ 3ನೇ ಆರೋಪಿಗೆ ಜಾಮೀನು| High court

ಮೃತ ಅಶ್ರಫ್
ಮೃತ ಅಶ್ರಫ್
Published on: 

ಪ್ರಮುಖ ಮುಖ್ಯಾಂಶಗಳು

  • ಪಾಕಿಸ್ಥಾನಕ್ಕೆ ಜೈಕಾರ ಕೂಗಿದ ಆರೋಪದಲ್ಲಿ ಕೇರಳ ಮೂಲದ ವ್ಯಕ್ತಿಗೆ ಥಳಿತ
  • ಗಾಯಾಳು ಮೃತಪಟ್ಟ ಪ್ರಕರಣ
ಬೆಂಗಳೂರು: ಪಾಕಿಸ್ಥಾನಕ್ಕೆ ಜೈಕಾರ ಕೂಗಿದ್ದಾನೆ ಎಂದು ಆರೋಪಿಸಿ ಮಂಗಳೂರಿನ ಕುಡುಪು ಮೈದಾನದಲ್ಲಿ ನಡೆದಿದ್ದ ಮಹಮ್ಮದ್​ ಅಶ್ರಫ್​​ ಗುಂಪುಹತ್ಯೆ ಪ್ರಕರಣದ 3ನೇ ಆರೋಪಿ ವಾಮಂಜೂರಿನ ತಿರುವೈಲ್​ ನಿವಾಸಿ ಮಂಜುನಾಥ್​ಗೆ ಹೈಕೋರ್ಟ್​ ಷರತ್ತುಬದ್ಧ ಜಾಮೀನು ಮಂಜೂರು ಮಾಡಿದೆ.
ಗುರುವಾರ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ವಿ. ಶ್ರೀಶಾನಂದ ಅವರಿದ್ದ ರಜಾಕಾಲದ ಏಕಸದಸ್ಯ ನ್ಯಾಯಪೀಠ ಈ ಆದೇಶ ನೀಡಿದೆ. ಆರೋಪಿ 1 ಲಕ್ಷ ರೂ. ಮೊತ್ತದ ಬಾಂಡ್​ ಮತ್ತು ಇಬ್ಬರ ಭದ್ರತೆ ಒದಗಿಸಬೇಕು. ನ್ಯಾಯಾಲಯದಲ್ಲಿನ ವಿಚಾರಣೆಗೆ ತಪ್ಪದೆ ಹಾಜರಾಗಬೇಕು ಮತ್ತು ಅನುಮತಿಯಿಲ್ಲದೆ ದಣ ಕನ್ನಡ ಜಿಲ್ಲೆಯ ವ್ಯಾಪ್ತಿ ತೊರೆಯುವಂತಿಲ್ಲ ಎಂಬ ಷರತ್ತುಗಳನ್ನು ವಿಧಿಸಿದೆ.
ಈ ಕೃತ್ಯದಲ್ಲಿ ಯಾವುದೇ ಮಾರಕಾಸ್ತ್ರಗಳನ್ನು ಬಳಸಿರುವುದು ಕಂಡುಬಂದಿಲ್ಲ. ಇದು ಪೂರ್ವನಿಯೋಜಿತ ಕೃತ್ಯವಲ್ಲ. ಬದಲಾಗಿ ಕ್ಷಣ ಮಾತ್ರದ ಪ್ರಚೋದನೆಯಿಂದ ನಡೆದ ಟನೆಯಾಗಿದೆ. ಮೃತನ ಗಾಯಗಳಿಗೆ ಖಾರದ ಪುಡಿ ಹಾಕಲಾಗಿದೆ ಎಂಬ ಆರೋಪಕ್ಕೆ ಪೂರಕವಾಗಿ ಯಾವುದೇ ಪುರಾವೆಗಳಿಲ್ಲ ಎಂದು ನ್ಯಾಯಪೀಠ ಜಾಮೀನು ನೀಡುವ ವೇಳೆ ಅಭಿಪ್ರಾಯಪಟ್ಟಿದೆ. 
ಗುಂಪು ಹತ್ಯೆಯಂತಹ ಪ್ರಕರಣಗಳನ್ನು ತಡೆಯಲು ಅರ್ಜಿದಾರನಿಗೆ ಜಾಮೀನು ನಿರಾಕರಿಸಬೇಕು ಎಂಬ ಪ್ರಾಸಿಕ್ಯೂಷನ್​ ವಾದಕ್ಕೆ ಪ್ರತಿಕ್ರಿಯಿಸಿದ ನ್ಯಾಯಪೀಠ, ನಿಮ್ಮ ಪ್ರಕಾರ ಗುಂಪು ಹತ್ಯೆ ಎಂದರೇನು? ಮೃತನ ಮನೆಯಲ್ಲಿ ಕೃತ್ಯ ನಡೆದಿಲ್ಲ. ಆತ ಮೈದಾನಕ್ಕೆ ಬಂದು ಘೋಷಣೆ ಕೂಗದಿದ್ದರೆ ಇಂದು ಜೀವಂತವಾಗಿರುತ್ತಿದ್ದ. ಮೃತ ಮತ್ತು ಆರೋಪಿಗಳ ನಡುವೆ ಯಾವುದೇ ದ್ವೇಷ ಇರಲಿಲ್ಲ ಎಂದಿತು. 
⚠️

ಅರ್ಜಿದಾರನ ವಾದವೇನಿತ್ತು? 

ಅರ್ಜಿದಾರನ ಪರ ವಾದ ಮಂಡಿಸಿದ ಹಿರಿಯ ವಕೀಲ ಅರಣ್​ ಶ್ಯಾಮ್​, ಪೆಹಲ್ಗಾಮ್​ ದಾಳಿಯ ವೇಳೆ ಅಶ್ರಫ್​ ಪಾಕಿಸ್ತಾನ್​ ಪರ ಘೋಷಣೆ ಕೂಗಿದ್ದರಿಂದ ಆಟಗಾರರು ಪ್ರಚೋದನೆಗೆ ಒಳಗಾಗಿದ್ದರು. ಇದು ಪೂರ್ವ ನಿರ್ಧರಿತ ಕೃತ್ಯವಲ್ಲ. ಈಗಾಗಲೇ ಇತರ ಆರೋಪಿಗಳಿಗೆ ಜಾಮೀನು ಸಿಕ್ಕಿರುವುದರಿಂದ ಇವರಿಗೂ ಸಮಾನತೆಯ ಆಧಾರದ ಮೇಲೆ ಜಾಮೀನು ನೀಡಬೇಕು ಎಂದು ಕೋರಿದ್ದರು.

ಪೊಲೀಸರ ಕಾರ್ಯವೈಖರಿಗೆ ಅಸಮಾಧಾನ:

ಒಂದೇ ಪ್ರಕರಣಕ್ಕೆ ಸಂಬಂಧಿಸಿ ಎರಡು ಎಫ್​ಐಆರ್​ ದಾಖಲಿಸಿರುವ ಪೊಲೀಸರ ಕ್ರಮಕ್ಕೆ ಹೈಕೋರ್ಟ್​ ಅಸಮಾಧಾನ ವ್ಯಕ್ತಪಡಿಸಿದೆ. ಮೂಲ ಯುಡಿಆರ್​ (ಅಸ್ವಾಭಾವಿಕ ಮರಣ ವರದಿ) ಆಧರಿಸಿ ವಿಚಾರಣೆ ನಡೆಸಲು ಮ್ಯಾಜಿಸ್ಟ್ರೆಟ್​ ಅನುಮತಿ ಪಡೆಯಬಹುದಿತ್ತು. ಆದರೆ, ಪೊಲೀಸರು ಯುಡಿಆರ್​ಗೆ ಬಿ-ರಿಪೋರ್ಟ್​ ಸಲ್ಲಿಸಿರುವುದು ಗಂಭೀರ ಪ್ರಮಾದ ಎಂದು High court ಅಭಿಪ್ರಾಯಪಟ್ಟಿದೆ. 
✅

ಪ್ರಕರಣದ ಹಿನ್ನಲೆ

 2025ರ ಏ.27ರಂದು ಕುಡುಪು ಮೈದಾನದಲ್ಲಿ ಕ್ರಿಕೆಟ್​ ಪಂದ್ಯ ನಡೆಯುತ್ತಿದ್ದಾಗ ಕೇರಳ ಮೂಲದ ಮಹಮ್ಮದ್​ ಅಶ್ರಫ್​ ಪಾಕಿಸ್ತಾನ್​ ಪಾಕಿಸ್ತಾನ್​ ಎಂದು ಕೂಗುತ್ತಾ ಮೈದಾನಕ್ಕೆ ನುಗ್ಗಿದ್ದಾನೆ. ಇದರಿಂದ ಆಕ್ರೋಶಗೊಂಡ ಗುಂಪು ಆತನ ಮೇಲೆ ಹಲ್ಲೆ ನಡೆಸಿತ್ತು ಎಂದು ಆರೋಪಿಸಲಾಗಿದೆ. ಗಂಭೀರ ಗಾಯಗೊಂಡಿದ್ದ ಅಶ್ರಫ್ ಮೃತಪಟ್ಟಿದ್ದನು. ಈ ಪ್ರಕರಣದಲ್ಲಿ ಪೊಲೀಸರು ಒಟ್ಟು 21 ಜನರ ವಿರುದ್ಧ ಆರೋಪ ಪಟ್ಟಿ ಸಲ್ಲಿಸಿದ್ದಾರೆ.

ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net