ನ್ಯೂಸ್

ಪತಿಯ ಆದಾಯವನ್ನು ಕೆನೆಪದರಕ್ಕೆ ಪರಿಗಣಿಸಿದಕ್ಕೆ ವಿಧಿಸಿದ್ದ ದಂಡ ರದ್ದು| High court

High court
High court
ಶ್ರವಣ್ ನೀರಬಿದಿರೆ
Published on: 
ಬೆಂಗಳೂರು: ಪಾಲಕರ ಆದಾಯಕ್ಕೆ ಬದಲಾಗಿ ಪತಿಯ ಆದಾಯವನ್ನು ಕೆನೆಪದರಕ್ಕೆ ಪರಿಗಣಿಸಿ ಮಹಿಳೆಯೊಬ್ಬರಿಗೆ ಸಿಂಧುತ್ವ ಪ್ರಮಾಣಪತ್ರ ನೀಡಲು ನಿರಾಕರಿಸಿದ್ದ ಹಾಸನ ಜಿಲ್ಲಾ ಜಾತಿ ಮತ್ತು ಆದಾಯ ಪರಿಶೀಲನಾ ಸಮಿತಿಯ ಸದಸ್ಯರಿಗೆ 2 ಲಕ್ಷ ರೂ. ದಂಡ ವಿಧಿಸಿ ಏಕಸದಸ್ಯ ನ್ಯಾಯಪೀಠ ಹೊರಡಿಸಿದ್ದ ಆದೇಶವನ್ನು ಹೈಕೋರ್ಟ್​ ವಿಭಾಗೀಯ ಪೀಠ ರದ್ದುಪಡಿಸಿದೆ.
ಏಕಸದಸ್ಯ ನ್ಯಾಯಪೀಠದ ಆದೇಶದ ವಿರುದ್ಧ ಸರ್ಕಾರ ಸಲ್ಲಿಸಿದ್ದ ಮೇಲ್ಮನವಿಯನ್ನು ವಿಚಾರಣೆ ನಡೆಸಿದ ಮುಖ್ಯ ನ್ಯಾಯಮೂರ್ತಿ ವಿಭು ಬಖ್ರು ಮತ್ತು ನ್ಯಾಯಮೂರ್ತಿ ಸಿ.ಎಂ. ಪೂಣಚ್ಚ ಅವರಿದ್ದ ವಿಭಾಗೀಯ ನ್ಯಾಯಪೀಠ, ಈ ಆದೇಶ ನೀಡಿದೆ. 
ಸಹಾಯಕ ಸರ್ಕಾರಿ ಅಭಿಯೋಜಕಿಯಾಗಿ ಆಯ್ಕೆಯಾಗಿದ್ದ ಚನ್ನರಾಯಪಟ್ಟಣದ ಬಿ.ಎನ್​. ಮುತ್ತುಲಕ್ಷ್ಮೀ ಎಂಬವರು ಪ್ರವರ್ಗ 3ಎ ಅಡಿ ಸಿಂಧುತ್ವ ಪ್ರಮಾಣಪತ್ರ ಕೋರಿ ಅರ್ಜಿ ಸಲ್ಲಿಸಿದ್ದರು. ಆದರೆ, ಇವರ ಪತಿಯ ಆದಾಯವು ಕೆನೆಪದರದ ನಿಗದಿತ ಮಿತಿಗಿಂತ ಹೆಚ್ಚಿದೆ ಎಂಬ ಕಾರಣಕ್ಕೆ ಹಾಸನ ಜಿಲ್ಲಾ ಜಾತಿ ಮತ್ತು ಆದಾಯ ಪರಿಶೀಲನಾ ಸಮಿತಿಯು ಅರ್ಜಿಯನ್ನು ತಿರಸ್ಕರಿಸಿತ್ತು. ಇದನ್ನು ಪ್ರಶ್ನಿಸಿ ಹೈಕೋರ್ಟ್​ಗೆ ಅರ್ಜಿ ಸಲ್ಲಿಸಲಾಗಿತ್ತು.
ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರಿದ್ದ ಏಕಸದಸ್ಯ ನ್ಯಾಯಪೀಠ, ಕೆನೆಪದರ ನಿರ್ಧರಿಸುವಾಗ ಪಾಲಕರ ಆದಾಯದ ಬದಲು ಪತಿಯ ಆದಾಯವನ್ನು ಪರಿಗಣಿಸಿದ ಜಿಲ್ಲಾ ಸಮಿತಿಯ ನಿರ್ಧಾರವನ್ನು ಟೀಕಿಸಿತ್ತು. ವಿವಾಹಿತ ಮಹಿಳೆಯರಿಗೆ ಜಾತಿ ಮತ್ತು ಆದಾಯ ಪ್ರಮಾಣಪತ್ರ ನೀಡುವಾಗ ಮತ್ತು ಸರ್ಕಾರಿ ಮೀಸಲಾತಿಗಳಲ್ಲಿ ಕೆನೆಪದರ ನಿರ್ಧರಿಸುವಾಗ ಪಾಲಕರ ಆದಾಯವನ್ನೇ ಪರಿಗಣಿಸಬೇಕು ಎಂದು ಸುಪ್ರೀಂ ಕೋರ್ಟ್​ ಮತ್ತು ಹೈಕೋರ್ಟ್​ ಹಲವು ಪ್ರಕರಣಗಳಲ್ಲಿ ತೀರ್ಪು ನೀಡಿದ್ದರೂ ಅದನ್ನು ಉಲ್ಲಂಘಿಸಿ ಸಿಂಧುತ್ವ ಪ್ರಮಾಣಪತ್ರ ನಿರಾಕರಿಸಿರುವುದು ಸರಿಯಲ್ಲ ಎಂದು ಮಧ್ಯಂತರ ತೀರ್ಪು ನೀಡಿತ್ತು.

ದಂಡ ವಿಧಿಸಿದ್ದ ಏಕಸದಸ್ಯ ಪೀಠ: 

ಅಧಿಕಾರಿಗಳ ತಪ್ಪಿಂದ ಅರ್ಜಿದಾರರು ಒಂದು ವರ್ಷಗಳ ಕಾಲ ಉದ್ಯೊಗದಿಂದ ವಂಚಿತರಾಗಿದ್ದಾರೆ. ಆದ್ದರಿಂದ ಅರ್ಜಿದಾರರಿಗೆ ತಕ್ಷಣವೇ ನೇಮಕಾತಿ ನೀಡಿ, ಒಂದು ವರ್ಷದ ಅವಧಿಯ ಸಂಬಳ ಹೊರತು ಪಡಿಸಿ ಇನ್ನುಳಿದ ಎಲ್ಲ ಸೌಲಭ್ಯ ನೀಡಬೇಕು. ಅರ್ಜಿದಾರರು ವಿನಾ ಕಾರಣ ನ್ಯಾಯಾಲಯದ ಮೆಟ್ಟಿಲೇರುವಂತೆ ಮಾಡಿರುವ ಹಾಸನ ಜಿಲ್ಲಾ ಜಾತಿ ಮತ್ತು ಆದಾಯ ಪರಿಶೀಲನಾ ಸಮಿತಿಯ ಸದಸ್ಯರು ತಮ್ಮ ಸ್ವಂತ ಹಣದಿಂದ 2 ಲಕ್ಷ ರೂ. ದಂಡವನ್ನು ಪರಿಹಾರವಾಗಿ ಪಾವತಿಸಬೇಕು ಎಂದು ನ್ಯಾಯಪೀಠ ಅಂತಿಮ ತೀರ್ಪು ನೀಡಿತ್ತು. 

ಪೋಷಕರ ಆದಾಯ ಪರಿಗಣನೆಗೆ ಆಕ್ಷೇಪವಿಲ್ಲ 

ಅಭ್ಯರ್ಥಿಯ ಪೋಷಕರ ಆದಾಯವನ್ನು ಮಾತ್ರವೇ ಆದಾಯ ಪ್ರಮಾಣ ಪತ್ರಕ್ಕೆ ಪರಿಗಣಿಸಬೇಕು ಎಂಬ ಬಗ್ಗೆ ಯಾವುದೇ ಆಕ್ಷೇಪವಿಲ್ಲ ಎಂಬ ಅಂಶವನ್ನು ಹೈಕೋರ್ಟ್​ನಲ್ಲಿ ಸರ್ಕಾರವೇ ಒಪ್ಪಿಕೊಂಡಿದೆ. ಆದರೆ, ಅಧಿಕಾರಿಗಳಿಗೆ ದಂಡ ವಿಧಿಸಿದನ್ನು ಪ್ರಶ್ನಿಸಿತ್ತು. ಜಿಲ್ಲಾ ಸಮಿತಿಯ ಸದಸ್ಯರಿಗೆ ವೈಯಕ್ತಿಕವಾಗಿ ದಂಡ ವಿಧಿಸಿದ ಏಕಸದಸ್ಯ ನ್ಯಾಯಪೀಠದ ಕ್ರಮ ದೋಷಪೂರಿತವಾಗಿದೆ. ಸೇವಾ ವಿಷಯಗಳಿಗೆ ಸಂಬಂಧಿಸಿದ ಅರ್ಜಿಗಳನ್ನು ಹೈಕೋರ್ಟ್​ಗಿಂತ ಮೊದಲು ರಾಜ್ಯ ಆಡಳಿತ ನ್ಯಾಯಮಂಡಳಿಗೆ (ಕೆಎಸ್​ಎಟಿ) ಸಲ್ಲಿಸಬೇಕಿದ್ದ ಕಾರಣ ಅರ್ಜಿದಾರರ ಹಿಂದಿನ ಮನವಿಯು ಊರ್ಜಿತವಲ್ಲ ಎಂದು ವಾದಿಸಿದ್ದರು.

ವಿಭಾಗೀಯ ಪೀಠದ ಆದೇಶವೇನು?: 

ವಿಚಾರಣೆ ನಡೆಸಿದ ವಿಭಾಗೀಯ ನ್ಯಾಯಪೀಠ, ಸರ್ಕಾರ ದಂಡವನ್ನು ಮಾತ್ರ ಪ್ರಶ್ನಿಸಿರುವುದರಿಂದ ಆ ಅಂಶದ ಬಗ್ಗೆ ಮಾತ್ರ ವಿಚಾರಣೆ ನಡೆಸಲಾಗಿದೆ. ಅರ್ಜಿದಾರರಿಗೆ ಈಗಾಗಲೇ ಪ್ರಮಾಣ ಪತ್ರ ನೀಡಿರುವುದರಿಂದ ಅವರ ಮೂಲ ಸಮಸ್ಯೆಗೆ ಪರಿಹಾರ ಸಿಕ್ಕಿದೆ. ಕೆನೆಪದರ ನಿರ್ಧರಿಸುವಾಗ ಅಭ್ಯರ್ಥಿಯ ಪೋಷಕರ ಆದಾಯ ಪರಿಗಣಿಸಬೇಕೆ ಅಥವಾ ಪತಿಯ ಆದಾಯ ಪರಿಗಣಿಸಬೇಕೆ ಎಂಬ ಪ್ರಶ್ನೆಯು ವಿವಾದಾಸ್ಪದವಾಗಿದ್ದ ಸಂದರ್ಭದಲ್ಲಿ ಜಿಲ್ಲಾ ಸಮಿತಿಯ ಸದಸ್ಯರಿಗೆ ದಂಡ ವಿಧಿಸುವ ಅಗತ್ಯವಿರಲಿಲ್ಲ ಎಂದ ನ್ಯಾಯಪೀಠ ದಂಡ ಪಾವತಿಸುವಂತೆ ನೀಡಿದ್ದ ಆದೇಶವನ್ನು ಮಾತ್ರ ರದ್ದುಗೊಳಿಸಿದೆ.
High Court
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net