ಹೀ ಮ್ಯಾನ್​- ಯುಗಾಂತ್ಯ; ಹಿರಿಯ ನಟ ಧರ್ಮೇಂದ್ರ ಕುರಿತು ವಿಶೇಷ ಲೇಖನ

ಅದು 1960. ಕಪ್ಪು& ಬಿಳುಪಿನ ಕಾಲ. ಪೌರಾಣಿಕ, ಕೌಟುಂಬಿಕ ಮತ್ತು ಸಾಮಾಜಿಕ ಸಿನಿಮಾಗಳೇ ಹೆಚ್ಚಾಗಿ ನಿರ್ಮಾಣವಾಗುತ್ತಿದ್ದ ಸಮಯ. ಆಗ ಹಿಂದಿ ಚಿತ್ರರಂಗಕ್ಕೆ ಪಂಜಾಬ್​ನ ಯುವಕನೊಬ್ಬ ಪದಾರ್ಪಣೆ ಮಾಡುತ್ತಾನೆ. ಫಿಲಂಫೇರ್​​ ಟ್ಯಾಲೆಂಟ್​ ಹಂಟ್​ನಲ್ಲಿ ಆಯ್ಕೆಯಾಗುವ 24 ವರ್ಷದ ಯುವಕ, ಪಂಜಾಬ್​ನಿಂದ ಮುಂಬೈಗೇನೋ ಬರುತ್ತಾನೆ. ಆದರೆ, ಅವನು ಯಾರನ್ನು ನಂಬಿಕೊಂಡು ಬಂದನೋ, ಆ ತಂಡದ ಸಿನಿಮಾನೇ ಪ್ರಾರಂಭವಾಗುವುದಿಲ್ಲ.

ಹಾಗಂತ ಆ ಯುವಕ ಸುಮ್ಮನೇ ಕೂರುವುದಿಲ್ಲ. ಅವಕಾಶಕ್ಕಾಗಿ ಅಲೆದಾಡುತ್ತಾನೆ. ಪಂಜಾಬಿ ಜಾಟ್​ ಕುಟುಂಬದ 5.10 ಅಡಿ ಎತ್ತರದ ಹಾಲಿವುಡ್​ ನಟರನ್ನೂ ಮೀರಿಸುವಂತಹ ಸ್ಫುರದ್ರೂಪಿ ಯುವಕ. ಆತನ ಪ್ರತಿಭೆಯನ್ನು ಗುರುತಿಸುವ ನಿರ್ದೇಶಕ ಅರ್ಜುನ್​ ಹಿಂಗೋರಾನಿ ತಮ್ಮ "ದಿಲ್​ ಭಿ ತೇರಾ, ಹಮ್​ ಭಿ ತೇರೆ' ಚಿತ್ರದಲ್ಲಿ ಮೊದಲ ಅವಕಾಶ ನೀಡುತ್ತಾರೆ. ಅಲ್ಲಿಂದ ಪ್ರಾರಂಭವಾಗುತ್ತದೆ ಧರ್ಮೇಂದ್ರ ಕೇವಲ್​ ಕೃಷನ್​ ಡಿಯೋಲ್​ ಅರ್ಥಾತ್​ ಧಮೇರ್ಂದ್ರ ಯುಗ. ರೊಮ್ಯಾಂಟಿಕ್​, ಆ್ಯಕ್ಷನ್​, ಕಾಮಿಡಿ... ಹೀಗೆ ಭಾರತೀಯ ಸಿನಿಮಾ ಪ್ರೇಮಿಗಳಿಗೆ ಮನರಂಜನೆಯ ರುಚಿ ಹತ್ತಿಸುವ ಧರ್ಮೇಂದ್ರ ಮುಂದಿನ 65 ವರ್ಷಗಳ ಕಾಲ ಬಾಲಿವುಡ್​ನಲ್ಲಿ ಆಳ್ವಿಕೆ ನಡೆಸುತ್ತಾರೆ.

ರಮೇಶ್​ ಸಿಪ್ಪಿ ನಿರ್ದೇಶನದ ಧರ್ಮೇಂದ್ರ ಮತ್ತು ಅಮಿತಾಭ್​ ಬಚ್ಚನ್​ ನಟಿಸಿದ್ದ ಇಂಡಸ್ಟ್ರಿ ಹಿಟ್​ "ಶೋಲೆ' ಬಿಡುಗಡೆಯಾಗಿ 50 ವರ್ಷ. ಈ ಚಿತ್ರದಲ್ಲಿ ಜೈ ಪಾತ್ರದಲ್ಲಿ ಅಮಿತಾಭ್​, ವೀರೂ ಆಗಿ ಧರ್ಮೇಂದ್ರ ಮತ್ತು ಬಸಂತಿ ಪಾತ್ರದಲ್ಲಿ ಹೇಮಾ ಮಾಲಿನಿ ನಟಿಸಿದ್ದರು. ವೀರೂ ಮತ್ತು ಬಸಂತಿ ನಡುವಿನ ಕೆಮಿಸ್ಟ್ರಿ ಕೂಡ ಸಿನಿಮಾ ದೊಡ್ಡ ಮಟ್ಟದಲ್ಲಿ ಹಿಟ್​ ಆಗಲು ಕಾರಣ ಎನ್ನಲಾಗಿತ್ತು. ಇನ್ನು ವೀರೂ ನೀರಿನ ಟ್ಯಾಂಕ್​ ಮೇಲೆ ನಿಂತು ಮದ್ಯದ ನಶೆಯಲ್ಲಿ ಮಾತನಾಡುವ ಸನ್ನಿವೇಶ, ಗಬ್ಬರ್​ ಎದುರು ವೀರೂ, ಬಸಂತಿ ಹೇಳುವ "ಬಸಂತೀ ಇನ್​ ಕುತ್ತೋನ್​ ಕೇ ಸಾಮ್ನೇ ಮತ್​ ನಾಚ್ನಾ'ಅಂತಹ ಹಲವು ಡೈಲಾಗ್​ಗಳಿಗೆ ಶಿಳ್ಳೆ, ಚಪ್ಪಾಳೆಗಳು ಈಗಲೂ ಬೀಳುತ್ತವೆ. ವಿಶೇಷ ಅಂದರೆ 1975ರ ಆ. 15ರಂದು ರಿಲೀಸ್​ ಆಗಿದ್ದ ಈ ಚಿತ್ರ 50ನೇ ವರ್ಷಾಚರಣೆ ಸಂಭ್ರಮದಲ್ಲಿ ಇದೇ ಡಿ. 12ರಂದು ಬರೋಬ್ಬರಿ 1500ಕ್ಕೂ ಅಧಿಕ ಸ್ಕ್ರೀನ್​ಗಳಲ್ಲಿ ರಿ&ರಿಲೀಸ್​ ಆಗಲಿದೆ.

ಧರ್ಮೇಂದ್ರ ಚಿತ್ರರಂಗಕ್ಕೆ ಬರುವ ಮುನ್ನವೇ 1954ರಲ್ಲಿ ಅರ್ಥಾತ್​ ತಮ್ಮ 19ನೇ ವಯಸ್ಸಿನಲ್ಲಿ ಪ್ರಕಾಶ್​ ಕೌರ್​ ಜತೆ ವಿವಾಹ ಬಂಧನಕ್ಕೆ ಒಳಗಾಗಿದ್ದರು. ಅವರಿಗೆ ಇಬ್ಬರು ಗಂಡು (ಸನ್ನಿ ಡಿಯೋಲ್​, ಬಾಬಿ ಡಿಯೋಲ್​) ಮತ್ತು ಇಬ್ಬರು ಹೆಣ್ಣು (ಅಜೀತಾ, ವಿಜೇತಾ) ಸೇರಿ ನಾಲ್ವರು ಮಕ್ಕಳು. ಆದರೆ, 1970ರಲ್ಲಿ "ತೂ ಹಸೀನ್​ ಮೈ ಜವಾನ್​' ಚಿತ್ರದಲ್ಲಿ ಮೊದಲ ಬಾರಿಗೆ ಹೇಮಾ ಮಾಲಿನಿ ಜತೆ ಕೆಲಸ ಮಾಡಿದ ಧರ್ಮೇಂದ್ರ, ಮೊದಲ ನೋಟದಲ್ಲೇ "ಡ್ರೀಮ್​ ಗರ್ಲ್​'ಗೆ ಮನಸೋತಿದ್ದರು. ಬಳಿಕ "ಶರಾತ್​', "ಶೋಲೇ', "ಸೀತಾ ಔರ್​ ಗೀತಾ', "ದಿಲ್ಲಗಿ' ಸೇರಿ 28 ಚಿತ್ರಗಳಲ್ಲಿ ಒಟ್ಟಿಗೆ ನಟಿಸಿದ್ದಾರೆ. ಚಿತ್ರದಿಂದ ಚಿತ್ರಕ್ಕೆ ಇಬ್ಬರ ನಡುವಿನ ಒಡನಾಟ ಗಾಢವಾಗಿ, 1980ರಲ್ಲಿ ಧರ್ಮೇಂದ್ರ ತಮ್ಮ 45ನೇ ವಯಸ್ಸಿನಲ್ಲಿ ಹೇಮಾ ಮಾಲಿನಿ ಜತೆ ಮತ್ತೊಮ್ಮೆ ಮದುವೆಯಾದರು.

ಈ ಜೋಡಿಗೆ ಇಬ್ಬರು ಹೆಣ್ಣಮಕ್ಕಳಿದ್ದಾರೆ (ಅಹಾನಾ ಮತ್ತು ಇಶಾ ಡಿಯೋಲ್​). ಧರಮ್​ & ಹೇಮಾ ಮದುವೆ ದೊಡ್ಡ ಮಟ್ಟದಲ್ಲಿ ವಿವಾದಕ್ಕೀಡಾಗಿತ್ತು. ಹಿಂದು ವಿವಾಹ ಕಾಯ್ದೆಯಲ್ಲಿ ಎರಡು ಮದುವೆಗೆ ಅವಕಾಶವಿಲ್ಲದ ಕಾರಣ, ಈ ಜೋಡಿ ಇಸ್ಲಾಂಗೆ ಮತಾಂತರಗೊಂಡಿದೆ ಎಂಬ ಸುದ್ದಿಯೂ ಹರಡಿತ್ತು. ಆದರೆ, ಹಲವು ವರ್ಷಗಳ ಬಳಿಕ ಧರ್ಮೇಂದ್ರ ಅದನ್ನು ಅಲ್ಲಗಳೆದಿದ್ದರು. ಮದುವೆಯ ಬಳಿಕ ಹೇಮಾ ಮಾಲಿನಿ ಪತಿಯ ಮನೆಗೆ ಹೋಗಲಿಲ್ಲ. ತಮ್ಮ ಪಾಡಿಗೆ ತಾವು ಬೇರೆ ಮನೆ ಮಾಡಿಕೊಂಡಿದ್ದರು. ಮತ್ತೊಂದೆಡೆ ಧರ್ಮೇಂದ್ರ ಅಂತಿಮ ದಿನಗಳವರೆಗೂ ಮೊದಲ ಪತ್ನಿ ಪ್ರಕಾಶ್​ ಕೌರ್​ ಜತೆ ಲೋನಾವಾಲಾದ 100 ಎಕರೆ ಫಾಮ್​ರ್ಹೌಸ್​ನಲ್ಲಿ ವಾಸವಾಗಿದ್ದರು.

ನಟ ಧರ್ಮೇಂದ್ರ ರಾಮನಗರದ ಜನತೆಯ ಮನಸ್ಸನ್ನು ಎಷ್ಟು ಗೆದ್ದಿದ್ದರೆಂದರೆ 50 ವರ್ಷಗಳ ಹಿಂದೆ ಅವರ ಕೈ ಕುಲುಕಿದ್ದ ನೆನಪು ಇನ್ನೂ ಇಲ್ಲಿನ ಕೆಲವರ ಮನದ ಸವಿನೆನಪಾಗಿ ಉಳಿದಿದೆ! "ಶೋಲೆ' ಚಿತ್ರದ ವೀರೂ ಪಾತ್ರದಿಂದ ಬಹುದೊಡ್ಡ ಹೆಸರು ಸಂಪಾದಿಸಿದ್ದ ಧಮೇರ್ಂದ್ರ ರಾಮನಗರದ ರಾಮದೇವರ ಬೆಟ್ಟದಲ್ಲಿ ಚಿತ್ರೀಕರಣದಲ್ಲಿ ಪಾಲ್ಗೊಂಡ ಸಂದರ್ಭದಲ್ಲಿ ಎಷ್ಟೇ ಒತ್ತಡವಿದ್ದರೂ ಅಭಿಮಾನಿಗಳನ್ನು ಎಂದೂ ನಿರಾಸೆ ಮಾಡಿದವರಲ್ಲ. ಚಿತ್ರೀಕರಣದ ಸಂದರ್ಭದಲ್ಲಿ ನಟರು, ತಂತ್ರರು ಉಳಿದುಕೊಳ್ಳಲು ರಾಮನಗರದಲ್ಲಿ ವ್ಯವಸ್ಥೆ ಕಲ್ಪಿಸಲಾಗಿತ್ತಾದರೂ ಧರ್ಮೇಂದ್ರ, ಅಮಿತಾಭ್​ ಬಚ್ಚನ್​, ಹೇಮಾಮಾಲಿನಿ, ಜಯಾ ಮೊದಲಾದವರು ಬೆಂಗಳೂರಿನ ಹೋಟೆಲ್​ನಲ್ಲಿ ವಾಸ್ತವ್ಯ ಹೂಡುತ್ತಿದ್ದರು.

ಚಿತ್ರೀಕರಣದ ಸಮಯಕ್ಕೆ ರಾಮದೇವರ ಬೆಟ್ಟಕ್ಕೆ ಬಂದು ಹೋಗುತ್ತಿದ್ದರು. ಈ ವೇಳೆ ಸಾಕಷ್ಟು ಅಭಿಮಾನಿಗಳು, ಚಿತ್ರರಸಿಕರು ಚಿತ್ರೀಕರಣದ ಸೆಟ್​ಗೆ ಬಂದಾಗ ಧರ್ಮೇಂದ್ರ ಆತ್ಮೀಯವಾಗಿ ಕೈಬೀಸಿ ಮಾತನಾಡಿ ಕಳುಹಿಸುತ್ತಿದ್ದರು. ಒತ್ತಡದ ನಡುವೆಯೂ ಅಭಿಮಾನಿಗಳಿಗೆ ನಿರಾಸೆ ಮೂಡಿಸುತ್ತಿರಲಿಲ್ಲ ಎಂದು ಚಿತ್ರೀಕರಣವನ್ನು ಕಣ್ಣಾರೆ ಕಂಡ ರಾಮನಗರದ ಕೆಲ ಹಿರಿಯರು ಈಗಲೂ ನೆನಪಿಸಿಕೊಳ್ಳುತ್ತಾರೆ. ಹಲವರ ಪಾಲಿಗಂತೂ ಅವರು ಪರಿಚಿತರೇ ಆಗಿ ಹೋಗಿದ್ದರು. ಏಕೆಂದರೆ "ಶೋಲೆ' ಚಿತ್ರ ರಾಮದೇವರ ಬೆಟ್ಟದ ಸುತ್ತಮುತ್ತಲ ಸುಮಾರು 30 ತಿಂಗಳು ಸುದೀರ್ವಾಗಿ ಚಿತ್ರೀಕರಣಗೊಂಡಿತ್ತು.

ನಟ ಧರ್ಮೇಂದ್ರ ಡೇರಿಂಗ್​ ಸ್ಟಾರ್​ ಆಗಿ ತೆರೆಯ ಮೇಲಷ್ಟೇ ಮಿಂಚುತ್ತಿರಲಿಲ್ಲ. ಬದಲಾಗಿ ನಿಜ ಜೀವನದಲ್ಲೂ ಧೈರ್ಯಶಾಲಿಯಾಗಿದ್ದರು. 1970ರ ದಶಕದಲ್ಲಿ ಮುಂಬೈ ಅಂಡರ್​ವರ್ಲ್ಡ್​ ಮತ್ತು ಮಾಫಿಯಾದವರು ಬಾಲಿವುಡ್​ ಮೇಲೆ ತಮ್ಮ ವಕ್ರದೃಷ್ಟಿ ಬೀರತೊಡಗಿದರು. ತೆರೆಮರೆಯಲ್ಲಿ ಸಿನಿಮಾಗಳಿಗೆ ಫೈನಾನ್ಸ್​ ನೀಡುತ್ತಿದ್ದ ಡಾನ್​ಗಳು, ನೇರವಾಗಿ ನಟ & ನಟಿಯರು, ನಿರ್ದೇಶಕರು, ನಿರ್ಮಾಪಕರಿಗೆ ಧಮಕಿ ಹಾಕತೊಡಗಿದರು. ಅದೇ ರೀತಿ ಧರ್ಮೇಂದ್ರ ಅವರಿಗೂ ಅಂಡರ್​ವರ್ಲ್ಡ್​ ಮಂದಿ ಬೆದರಿಕೆ ಹಾಕಿದ್ದರಂತೆ. ಆಗ ಧರ್ಮೇಂದ್ರ , "ನಿಮ್ಮ ಜತೆ 10 ಜನ ಇರಬೇಕು. ಆದರೆ, ನನ್ನ ಬಳಿ ಸೈನ್ಯವೇ ಇದೆ. ನಾನು ಒಂದು ಮಾತು ಹೇಳಿದರೆ ಸಾಕು, ಪಂಜಾಬ್​ನಿಂದ ಟ್ರಕ್​ಗಳ ತುಂಬ ನೂರಾರು ಜನ ನನಗಾಗಿ ಹೋರಾಡಲು ಬರುತ್ತಾರೆ. ನನ್ನ ತಂಟೆಗೆ ಬರಬೇಡಿ' ಎಂದು ಅಂಡರ್​ವರ್ಲ್ಡ್​ ನವರಿಗೇ ಎಚ್ಚರಿಕೆ ನೀಡಿದ್ದರಂತೆ. ಆ ಬಳಿಕ ಮುಂಬೈನ ಯಾವ ಮಾಫಿಯಾದವರೂ ಧಮೇರ್ಂದ್ರ ಮತ್ತವರ ಕುಟುಂಬದವರಿಂದು ದೂರ ಉಳಿದರಂತೆ.

"ನಟ ಧರ್ಮೇಂದ್ರ ಅವರ ನಿಧನದಿಂದ ಭಾರತೀಯ ಸಿನಿಮಾದಲ್ಲಿ ಒಂದು ಯುಗದ ಅಂತ್ಯವಾಗಿದೆ. ಚಿತ್ರರಂಗದಲ್ಲಿ ಅವರು ಖ್ಯಾತ ವ್ಯಕ್ತಿತ್ವವಾಗಿದ್ದರು. ಅವರು ಮಾಡಿದ ಪ್ರತಿ ಪಾತ್ರಕ್ಕೂ ಆಕರ್ಷಣೆ ಮತ್ತು ಗಹನತೆಯನ್ನು ತಂದ ಅದ್ಭುತ ನಟರಾಗಿದ್ದರು. ಅವರು ನಿರ್ವಹಿಸಿದ ವೈವಿಧ್ಯಮಯ ಪಾತ್ರಗಳು, ಲೆಕ್ಕವಿಲ್ಲದಷ್ಟು ಭಾವನಾತ್ಮಕವಾಗಿ ಬೆಸೆದುಕೊಂಡಿವೆ. ಧಮೇರ್ಂದ್ರ ಅವರು ತಮ್ಮ ಸರಳತೆ, ವಿನಯ ಮತ್ತು ಆತ್ಮೀಯತೆಗಳಿಂದ ಮೆಚ್ಚುಗೆಗೆ ಪಾತ್ರರಾಗಿದ್ದರು. ಈ ದು@ಖದ ಸಮಯದಲ್ಲಿ ಅವರ ಕುಟುಂಬ, ಸ್ನೇಹಿತರು ಮತ್ತು ಅಸಂಖ್ಯಾತ ಅಭಿಮಾನಿಗಳಿಗೆ ನನ್ನ ಸಂತಾಪಗಳು. ಓಂ ಶಾಂತಿ". - ನರೇಂದ್ರ ಮೋದಿ ಪ್ರಧಾನಮಂತ್ರಿ