ಚಿತ್ರದ ತಾಂತ್ರಿಕ ಶ್ರೇಷ್ಠತೆಯನ್ನು ಶ್ಲಾಘಿಸಿರುವ ಕೇಂದ್ರ ಸಚಿವರು, ಛಾಯಾಗ್ರಹಣ, ಸಂಕಲನ, ಕಥೆ ಮತ್ತು ಚಿತ್ರಕಥೆಯಂತಹ ಚಲನಚಿತ್ರ ನಿರ್ಮಾಣದ ಎಲ್ಲಾ ಪ್ರಮುಖ ಅಂಶಗಳು ಒಟ್ಟಾಗಿ ಪ್ರಭಾವ ಬೀರಿವೆ ಎಂದು ಹೇಳಿದರು. ಒಂದು ಆಕರ್ಷಕ ಕಥೆಯನ್ನು ಯಶಸ್ವಿ ಚಿತ್ರವನ್ನಾಗಿ ಮಾಡಲು ಪ್ರಸಿದ್ಧ ನಟನ ಅಗತ್ಯವಿಲ್ಲ ಎಂಬುದನ್ನು ಕಾಂತಾರ ನಿರೂಪಿಸಿದೆ, ವೀಕ್ಷಕರನ್ನು ತಲ್ಲೀನಗೊಳಿಸುವ ಅನುಭವವನ್ನು ನೀಡಲು ತಾಂತ್ರಿಕ ಅಂಶವನ್ನು ಚೆನ್ನಾಗಿ ನಿರ್ವಹಿಸಲಾಗಿದೆ ಎಂದರು. ತಮ್ಮ ಎಕ್ಸ್ ಖಾತೆಯ ಮೂಲಕವೂ ಚಿತ್ರವನ್ನು ಬಣ್ಣಿಸಿರುವ ಕುಮಾರಸ್ವಾಮಿ, ನವದೆಹಲಿಯಲ್ಲಿ, ನನ್ನ ಪತ್ನಿ ಶ್ರೀಮತಿ ಅನಿತಾ ಕುಮಾರಸ್ವಾಮಿ ಮತ್ತು ನಾನು 'ಕಾಂತಾರ: ಅಧ್ಯಾಯ 1' ವೀಕ್ಷಿಸುವ ಸೌಭಾಗ್ಯವನ್ನು ಪಡೆದುಕೊಂಡೆವು. ಕನ್ನಡದ ಅಸ್ಮಿತೆಯ ಶ್ರೀಮಂತ ವೈಭವೀಕರಣ. ಹೃದಯ ಮಿಡಿಯುವ ಆಧ್ಯಾತ್ಮಿಕತೆಯ ನಿಜವಾದ ಅಭಿವ್ಯಕ್ತಿ. ತುಳುನಾಡಿನ ಸಾಂಸ್ಕೃತಿಕ ಮತ್ತು ದೈವಿಕ ಪರಂಪರೆಯ ಭವ್ಯ ಅನಾವರಣ. ಈ ಚಿತ್ರ ಪದಗಳಿಗೆ ಮೀರಿದ ಸೃಜನಶೀಲ ಸೃಷ್ಟಿ ಎಂದು ಬರೆದುಕೊಂಡಿದ್ದಾರೆ.
