ಹೀಗಾಗಿ, ಎಲ್ಲ ವಯೋಮಾನದವರು ಜೀವನಶೈಲಿಯನ್ನು ಅವಲೋಕಿಸಿಕೊಂಡು, ಆರೋಗ್ಯಕರ ಜೀವನಶೈಲಿಯತ್ತ ಮರಳಬೇಕಾದ ಅಗತ್ಯವಿದೆ. ಅಂದರೆ, ಒಂದಿಷ್ಟು ವ್ಯಾಯಾಮ, ನಡಿಗೆ, ಗುಣಮಟ್ಟದ ಮತ್ತು ತಾಜಾ ಆಹಾರ ಸೇವನೆಯಂಥ ಸರಳ ಕ್ರಮಗಳ ಅನುಷ್ಠಾನ ಕೂಡ ದೊಡ್ಡಮಟ್ಟದಲ್ಲಿ ಬದಲಾವಣೆ ತರಬಲ್ಲವು. ‘ಬೊಜ್ಜು ಕಡಿಮೆ ಮಾಡಿಕೊಳ್ಳಲು ಮತ್ತು ಆರೋಗ್ಯಕರ ಜೀವನಶೈಲಿ ರೂಪಿಸಿಕೊಳ್ಳಲು ಅಡುಗೆ ಎಣ್ಣೆ ಬಳಕೆಯಲ್ಲಿ ಪ್ರತಿ ತಿಂಗಳು ಶೇಕಡ 10ರಷ್ಟು ಕಡಿತ ಮಾಡಿ. ಇದನ್ನು ಸವಾಲಾಗಿ ಸ್ವೀಕರಿಸಿ. ಏಕೆಂದರೆ, ಅಧಿಕ ಅಡುಗೆ ಎಣ್ಣೆ ಬಳಕೆಯಿಂದ ಹೃದಯ ಕಾಯಿಲೆ, ಮಧುಮೇಹ ಮತ್ತು ಅಧಿಕ ಒತ್ತಡಗಳಂಥ ರೋಗಗಳು ಬರುತ್ತಿವೆ’ ಎಂದು ಪ್ರಧಾನಿ ನರೇಂದ್ರ ಮೋದಿ ಈ ವರ್ಷದ ಫೆಬ್ರವರಿಯಲ್ಲಿ ರೇಡಿಯೋ ಕಾರ್ಯಕ್ರಮ ‘ಮನ್ ಕೀ ಬಾತ್’ನಲ್ಲಿ ಹೇಳಿದ್ದರು. ಆರೋಗ್ಯಕ್ಕೆ ಮಾರಕವಾದ ಸಂಗತಿಗಳನ್ನು ದೂರ ಮಾಡಬೇಕು. ದೈಹಿಕ ಆರೋಗ್ಯದ ಜತೆಗೆ ಮಾನಸಿಕ ಆರೋಗ್ಯ ಕಾಯ್ದುಕೊಳ್ಳಲು ಕಾಳಜಿ ವಹಿಸುವುದು ಈಗಿನ ಅಗತ್ಯ.
