ಕಿಕ್ಕೇರಿ: ಇಲ್ಲಿನ ವಿಪ್ರ ಬಾಂಧವ ಸೇವಾ ಸಮಿತಿ ವತಿಯಿಂದ ಹನುಮಂತೋತ್ಸವ ಇತ್ತೀಚೆಗೆ ಅದ್ದೂರಿಯಾಗಿ ಆಚರಿಸಲಾಯಿತು.
ಶ್ರೀರಾಮನವಮಿ ಪ್ರಯುಕ್ತ ವಾರದವರೆಗೆ ನಿತ್ಯ ಪಟ್ಟಾಭಿರಾಮದೇವರ ಪೂಜೆ, ಉತ್ಸವ ಜರುಗಿತು. ಅಂತಿಮವಾಗಿ ಹನುಮ ದೇವರ ಉತ್ಸವ, ಓಕುಳಿ ಆಚರಣೆ ಮಾಡಲಾಯಿತು.
ಉತ್ಸವದ ಅಂಗವಾಗಿ ಹನುಮನ ಭಾವಚಿತ್ರವನ್ನು ಪುಷ್ಪಗಳಿಂದ ಅಲಂಕರಿಸಿ ಬ್ರಹ್ಮೇಶ್ವರ ಬೀದಿ, ಸುಬ್ಬರಾಯ ಛತ್ರ ಬೀದಿಗಳಲ್ಲಿ ಮೆರವಣಿಗೆ ಮಾಡಲಾಯಿತು. ಮನೆ ಮನೆ ಮುಂದೆ ಬಣ್ಣದ ನೀರನ್ನು ಓಕುಳಿಗಾಗಿ ಇಡಲಾಗಿತ್ತು. ಉತ್ಸವದಲ್ಲಿ ಭಾಗವಹಿಸಿದ್ದ ಹಿರಿಯರು, ಮಕ್ಕಳು ಉತ್ಸಾಹದಿಂದ ಬಣ್ಣ ಬಳಿದುಕೊಂಡು, ಬಣ್ಣದ ನೀರಿನಿಂದ ಓಕುಳಿಯಾಡಿದರು.
ಒಬ್ಬರಿಗೊಬ್ಬರು ವಾನರರಿಗಿಂತ ತಾವು ಕಡಿಮೆ ಇಲ್ಲದಂತೆ ಪೈಪೋಟಿಯಲ್ಲಿ ಬಣ್ಣ ಮೆತ್ತಿಕೊಂಡಿದ್ದರು. ಹನುಮ ದೇವರಿಗೆ ಹೂ, ಹಣ್ಣು ಕಾಯಿ ಅರ್ಪಿಸಿ ಗ್ರಾಮಸ್ಥರು ಪೂಜಿಸಿದರು.
