ಧರ್ಮದ ಶಕ್ತಿ ಅದ್ಭುತ. ಅದೊಂದು ನಂಬಿಕೆ, ಗಮ್ಯ, ಗುರಿ, ಕಟ್ಟಳೆ, ನಿಬಂಧನೆ, ಮೋಕ್ಷ ಸಾಧನ, ಜೀವನ ವಿಧಾನ. ಪುಸ್ತಕ ಓದಿ ಧರ್ಮ ಜ್ಞಾನ ಪಡೆಯುವ ಅಗತ್ಯವಿಲ್ಲ. ಧರ್ಮ ನಮ್ಮ ಹೃದಯದಿಂದ ಆಚರಣೆಗೆ ಬರಬೇಕು. ಮಾನವ ಧರ್ಮವನ್ನೇ ಎಲ್ಲರೂ ಪಾಲಿಸಿದರೆ ಸಮಾಜ ಘಾತಕ ಚಟುವಟಿಕೆ ನಡೆಸುವ ನಾಟಕ ಕೊನೆಗೊಳ್ಳುತ್ತದೆ. ನಮ್ಮನ್ನು ರಕ್ಷಿಸಲು ಹುಟ್ಟಿಕೊಂಡಿದ್ದು ಧರ್ಮ. ಜೀವನಕ್ಕೊಂದು ಶಿಸ್ತು ತಂದುಕೊಳ್ಳಲು, ಸ್ವೇಚ್ಛೆಗೆ ಕಡಿವಾಣ ಹಾಕಲು ನಾವೇ ಹುಟ್ಟು ಹಾಕಿದ ವ್ಯವಸ್ಥೆ ಅದು. ಅದರ ನೆಪದಲ್ಲಿ ಬೇರೆಯವರ ನಂಬಿಕೆಯನ್ನು ಬುಡಮೇಲು ಮಾಡುವ ಕೃತ್ಯಕ್ಕೆ ಕೈ ಹಾಕುವುದು, ಅನ್ಯ ಧರ್ಮಗಳ ನಾಶದಲ್ಲಿ ತೊಡಗುವುದು, ಧರ್ಮದ ಅಂಧ ಆರಾಧನೆಯಲ್ಲಿ ತೊಡಗುವುದು ಹಾಸ್ಯಾಸ್ಪದ ಸಂಗತಿಯಾಗುತ್ತದೆ.
