ರಾಜ್ಯದಲ್ಲಿ ಜಿಎಸ್​ಟಿ ತೆರಿಗೆ ವಂಚನೆ ಐದು ಪಟ್ಟು ಏರಿಕೆ

ನವದೆಹಲಿ: ಕರ್ನಾಟಕದಲ್ಲಿ ಕೇಂದ್ರ ಜಿಎಸ್​ಟಿ ಅಧಿಕಾರಿಗಳು 2024-25ರ ಹಣಕಾಸು ವರ್ಷದಲ್ಲಿ 39,577 ಕೋಟಿ ರೂ. ತೆರಿಗೆ ವಂಚನೆ ಪತ್ತೆ ಮಾಡಿದ್ದಾರೆ. ಇದು ಹಿಂದಿನ ವರ್ಷಕ್ಕಿಂತ 5 ಪಟ್ಟು ಹೆಚ್ಚು ಎಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಸೋಮವಾರ ಲೋಕಸಭೆಗೆ ನೀಡಿರುವ ಲಿಖಿತ ಉತ್ತರದಲ್ಲಿ ತಿಳಿಸಿದ್ದಾರೆ.

ಕರ್ನಾಟಕದಲ್ಲಿ ಪತ್ತೆಯಾದ ಜಿಎಸ್​ಟಿ ವಂಚನೆಯ ವಿವರಗಳಿಗೆ ಸಂಬಂಧಿಸಿದ ಮತ್ತೊಂದು ಪ್ರಶ್ನೆಗೆ, ನಿರ್ಮಲಾ ರಾಜ್ಯಕ್ಕೆ ಸಂಬಂಧಿಸಿದ ಕೇಸ್​ಗಳ ವಿವರ ಹಂಚಿಕೊಂಡಿದ್ದಾರೆ. 2024-25ರಲ್ಲಿ ಸಿಜಿಎಸ್​ಟಿ ಅಧಿಕಾರಿಗಳು 1,254 ಕೇಸ್​ಗಳಲ್ಲಿ 39,577 ಕೋಟಿ ರೂ. ಜಿಎಸ್​ಟಿ ವಂಚನೆ ಪತ್ತೆ ಹಚ್ಚಿ 9 ಜನರನ್ನು ಬಂಧಿಸಿದ್ದಾರೆ. 1,623 ಕೋಟಿ ರೂ. ಸ್ವಯಂಪ್ರೇರಿತವಾಗಿ ತೆರಿಗೆ ಪಾವತಿಯಾಗಿದೆ.

2024-25ರಲ್ಲಿ ಪತ್ತೆಯಾದ ಮೊತ್ತ 2023-24ಕ್ಕಿಂತ 5 ಪಟ್ಟು ಹೆಚ್ಚಾಗಿದೆ. 2023-24ರಲ್ಲಿ, 925 ಕೇಸ್​ಗಳಲ್ಲಿ 7,202 ಕೋಟಿ ರೂ. ವಂಚನೆ ಪತ್ತೆಯಾಗಿತ್ತು. ಇಬ್ಬರು ಬಂಧನಕ್ಕೊಳಗಾಗಿದ್ದರು. 1,197 ಕೋಟಿ ರೂ. ಸ್ವಯಂಪ್ರೇರಿತವಾಗಿ ಪಾವತಿಯಾಗಿತ್ತು. 2022-23ರಲ್ಲಿ, 959 ಕೇಸ್​ಗಳಲ್ಲಿ 25,839 ಕೋಟಿ ರೂ. ತೆರಿಗೆ ವಂಚನೆ ಪತ್ತೆಯಾಗಿತ್ತು. ಇಬ್ಬರು ಬಂಧನಕ್ಕೊಳಗಾಗಿದ್ದರು. 1,705 ಕೋಟಿ ರೂ. ತೆರಿಗೆ ಪಾವತಿಯಾಗಿತ್ತು.

‘ಸಣ್ಣ ವ್ಯಾಪಾರಿಗಳು ಮತ್ತು ರಸ್ತೆಬದಿ ವ್ಯಾಪಾರಿಗಳಿಗೆ ಅವರ ವ್ಯಾಪಾರ ಚಟುವಟಿಕೆ ಮೌಲ್ಯಮಾಪನ ಇಲ್ಲದೆ ಜಿಎಸ್​ಟಿ ನೋಟಿಸ್ ಕಳುಹಿಸಲಾಗಿದೆಯೇ?’ ಎಂಬ ಪ್ರಶ್ನೆಗೆ ಸಚಿವರು, ‘ಕೇಂದ್ರ ಜಿಎಸ್​ಟಿ ಅಧಿಕಾರಿಗಳು ಯುಪಿಐ ವಹಿವಾಟು ಆಧಾರದ ಮೇಲೆ ಯಾವುದೇ ನೋಟಿಸ್​ಗಳನ್ನು ಜಾರಿಗೊಳಿಸಿಲ್ಲ’ ಎಂದು ಸ್ಪಷ್ಟಪಡಿಸಿದ್ದಾರೆ.

https://www.vijayavani.net/how-to-apply-for-fastag-annual-pass