ಡ್ರೈವಿಂಗ್​ ಗೊತ್ತಿಲ್ಲದಿದ್ರೂ ವರದಕ್ಷಿಣೆಯಾಗಿ ಕಾರು ಪಡೆದ ವರ: ಮದ್ವೆ ಹಿಂದಿನ ದಿನವೇ ನಡೆಯಿತು ಘೋರ ದುರಂತ

ಕಾನ್ಪುರ: ಡ್ರೈವಿಂಗ್​ ಗೊತ್ತಿಲ್ಲದಿದ್ದರೂ ವರದಕ್ಷಿಣೆಯಾಗಿ ಕಾರು ಪಡೆದುಕೊಂಡ ವರನೊಬ್ಬ ಟೆಸ್ಟ್​ ಡ್ರೈವ್​ ಮಾಡುವಾಗ ಅಡ್ಡಾದಿಡ್ಡಿಯಾಗಿ ಕಾರು ಚಲಾಯಿಸಿ ಸಂಬಂಧಿಕರಿಗೆ ಡಿಕ್ಕಿ ಹೊಡೆದ ಪರಿಣಾಮ ವರನ ಸೋದರತ್ತೆ ದುರಂತ ಸಾವಿಗೀಡಾಗಿದ್ದು, ಇತರೆ ನಾಲ್ವರು ಗಂಭೀರವಾಗಿ ಗಾಯಗೊಂಡಿರುವ ಘಟನೆ ಉತ್ತರ ಪ್ರದೇಶದ ಇಟಾವಾ ಜಿಲ್ಲೆಯಲ್ಲಿ ನಡೆದಿದೆ.

ಸರ್ಕಾರಿ ನೌಕರನಾಗಿರುವ 24 ವರ್ಷದ ಅರುಣ್​ ಕುಮಾರ್, ಮದುವೆಗು ಮುನ್ನವೇ ವಧುವಿನ ಕಡೆಯವರಿಂದ ಕಾರನ್ನು ವರದಕ್ಷಿಣೆಯಾಗಿ ಪಡೆದಿದ್ದ. ಆದರೆ, ಅರುಣ್​ಗೆ ಡ್ರೈವಿಂಗ್​ ಗೊತ್ತಿರಲಿಲ್ಲ. ಹೀಗಿದ್ದರೂ ಟೆಸ್ಟ್​ ಡ್ರೈವ್​ ಮಾಡುವುದಾಗಿ ಕಾರನ್ನೇರಿದ್ದ. ಮೊದಲೇ ಡ್ರೈವಿಂಗ್​ ಗೊತ್ತಿಲ್ಲದಿದ್ದರಿಂದ ಅಡ್ಡಾದಿಡ್ಡಿಯಾಗಿ ಕಾರು ಚಲಾಯಿಸಿ, ಸಂಬಂಧಿಕರು ನಿಂತಿದ್ದ ಗುಂಪಿನ ಕಡೆ ನುಗ್ಗಿಸಿದ್ದಾನೆ. ಇದರ ಪರಿಣಾಮ ಅರುಣ್​ ಅವರ ಸೋದರತ್ತೆ ಕಾರಿನ ಚಕ್ರದಡಿ ಸಿಲುಕಿ ಮೃತಪಟ್ಟಿದ್ದಾರೆ. ಪುಟ್ಟ ಹುಡುಗಿ ಸೇರಿದಂತೆ ನಾಲ್ವರು ಗಂಭೀರ ಗಾಯಗೊಂಡಿದ್ದಾರೆ. ಗಾಯಾಳುಗಳನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಅರುಣ್​ ಕುಮಾರ್​ ಅವರ ಮದುವೆ ಕೆಲವೇ ತಿಂಗಳುಗಳ ಹಿಂದೆ ನಿಶ್ಚಯವಾಗಿತ್ತು. ವರನ ಸಂಬಂಧಿಕರು ವರದಕ್ಷಿಣೆಯಾಗಿ ವಧುವಿನ ಕುಟುಂಬದ ಬಳಿ ಬೇಡಿಕೆ ಇಟ್ಟಿದ್ದರು. ಈ ಹಿನ್ನೆಲೆಯಲ್ಲಿ ತಿಲಕಂ ಪದ್ಧತಿಯ ಸಮಯದಲ್ಲಿ ವಧುವಿನ ಕುಟುಂಬ ಅರುಣ್​ ಕುಮಾರ್​ಗೆ ಕಾರಿನ ಕೀ ಹಸ್ತಾಂತರ ಮಾಡಿದ್ದರು. ಈ ಸಮಾರಂಭದಲ್ಲಿ ಸಂಬಂಧಿಕರು ಒಂದೆಡೆ ಸೇರಿದ್ದಾಗ, ಅಡ್ಡಾದಿಡ್ಡಿಯಾಗಿ ಕಾರು ಚಲಾಯಿಸಿ, ಡಿಕ್ಕಿ ಹೊಡೆದ ಪರಿಣಾಮ ದುರ್ಘಟನೆ ಸಂಭವಿಸಿದೆ.

ಮೃತಳನ್ನು ಸರಳಾ ದೇವಿ (35) ಎಂದು ಗುರುತಿಸಲಾಗಿದೆ. ಅರುಣ್​ ಕುಮಾರ್​ನನ್ನು ಪೊಲೀಸ್​ ಕಸ್ಟಡಿಗೆ ತೆಗೆದುಕೊಳ್ಳಲಾಗಿದ್ದು, ಆತನ ವಿರುದ್ಧ ಸಾವಿಗೆ ಕಾರಣವಾದ ಅಜಾಗರೂಕ ಚಾಲನೆ ಪ್ರಕರಣ ದಾಖಲಿಸಲಾಗಿದೆ. (ಏಜೆನ್ಸೀಸ್​)

https://www.vijayavani.net/vijayavani-kannada-abhiyana-kannada-rajyotsava-vijayavani-kannada-abhiyana-kannada-vijayavani-website/

https://www.vijayavani.net/mazel-tov-my-friend-pm-modi-congratulates-israels-netanyahu/

https://www.vijayavani.net/chitradurga-woman-death-three-woman-chitradurga-police-depression/