ಲಿಫ್ಟ್​​​ನಲ್ಲಿ ಶ್ವಾನವನ್ನು ಕಂಡು ಅಳಲು ಪ್ರಾರಂಭಿಸಿದ ಮಗು, ಮಹಿಳೆ ಮತ್ತು ನಾಯಿ ಮಾಲೀಕನ ನಡುವೆ ತಾರಕಕ್ಕೇರಿದ ಗಲಾಟೆ ; ವಿಡಿಯೋ ವೈರಲ್​​​..!

Greater Noida Dog News: ರಾಷ್ಟ್ರ ರಾಜಧಾನಿ ದೆಹಲಿಯ ಪಕ್ಕದಲ್ಲಿರುವ ಗ್ರೇಟರ್ ನೋಯ್ಡಾದಲ್ಲಿ ಶ್ವಾನವನ್ನ ಲಿಫ್ಟ್​​​ನಲ್ಲಿ ಕರೆದುಕೊಂಡು ಹೋಗುವ ವಿಚಾರವಾಗಿ ಗಲಾಟೆ ನಡೆದಿರುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ.

ನೋಯ್ಡಾದ ಗೋರ್ಸಿಟಿ 7 ನೇ ಅವೆನ್ಯೂ ಅಪಾರ್ಟ್​​​ಮೆಂಟ್​​ನಲ್ಲಿ ಘಟನೆ ನಡೆದಿದ್ದು, ವ್ಯಕ್ತಿ ಅಪಾರ್ಟ್​​ಮೆಂಟ್​​​ನ ಲಿಫ್ಟ್​​​ ಒಳಗೆ ತನ್ನ ಶ್ವಾನವನ್ನ ಕೆರೆದೊಯ್ದಿದ್ದಾನೆ. ಈ ಸಂದರ್ಭ ಲಿಫ್ಟ್​​​ನೊಳಗಿದ್ದ ಮಗುವೊಂದು ಜೋರಾಗಿ ಅಳಲು ಪ್ರಾರಂಭಿಸಿದೆ. ತಕ್ಷಣವೇ ವ್ಯಕ್ತಿ ಮಗುವನ್ನ ಲಿಫ್ಟ್​​ನಿಂದ ಹೊರ ಕರೆದುಕೊಂಡು ಹೋಗುವಂತೆ ಮಗುವಿನ ತಾಯಿಗೆ ಹೇಳಿದ್ದಾನೆ.

ಲಿಫ್ಟ್‌ನಲ್ಲಿದ್ದ ಮಗು ಹೆದರಿ ಅಳಲು ಪ್ರಾರಂಭಿಸಿದರೂ ಕೂಡಾ ಅದಕ್ಕೆ ಕ್ಯಾರೇ ಅನ್ನದ ಶ್ವಾನದ ಮಾಲೀಕ ಮಗುವನ್ನೇ ಲಿಫ್ಟ್​​ನಿಂದ ಹೊರ ಹೋಗಲು ಹೇಳಿದ್ದಾನೆ. ಇದರಿಂದ ಕೋಪಗೊಂಡ ತಾಯಿ ಶ್ವಾನದ ಮಾಲೀಕನನ್ನ ತರಾಟೆಗೆ ತೆಗೆದುಕೊಂಡಿದ್ದಾಳೆ.

ಮಹಿಳೆ ಮತ್ತು ನಾಯಿ ಮಾಲೀಕರ ನಡುವೆ ವಾಗ್ವಾದ
ಇನ್ನು ಲಿಫ್ಟ್​​ ಬಳಿಯೇ ಇದ್ದ ಸಿಬ್ಬಂದಿಯೂ ಶ್ವಾನವನ್ನು ಲಿಫ್ಟ್​​​ನಲ್ಲಿ ಕೊಂಡೊಯ್ಯ ಬೇಡಿ ಎಂದು ಮನವಿ ಮಾಡಿದ್ದಾನೆ. ಇದಕ್ಕೆ ಕ್ಯಾರೇ ಅನ್ನದ ಮಾಲೀಕ ಲಿಫ್ಟ್​​​ನಲ್ಲಿಯೇ ನನ್ನ ಶ್ವಾನ ತೆರಳೋದು. ನಾನು ಸುರಕ್ಷತಾ ಕ್ರಮಗಳನ್ನ ವಹಿಸಿ ಅದಕ್ಕೆ ಬಾಯಿ ಕಟ್ಟನ್ನ ಕೂಡಾ ಹಾಕಲಾಗಿದೆ. ಬೇಕಿದ್ದರೆ ಈ ಮಹಿಳೆಯೇ ಮೆಟ್ಟಿಲುಗಳನ್ನ ಹತ್ತಿಕೊಂಡು ಹೋಗಲಿ ಎಂದಿದ್ದಾನೆ. ನಂತರದಲ್ಲಿ ಇಬ್ಬರ ನಡುವಿನ ವಗ್ವಾದ ತಾರಕಕ್ಕೇರಿದ್ದು, ಮಹಿಳೆ ವಿಡಿಯೋ ಮಾಡಲು ಪ್ರಾರಂಭಿಸಿದ್ದಾಳೆ. ವಿಡಿಯೋ ವೈರಲ್ ಮಾಡುವುದಾಗಿ ಯುವತಿ ಯುವಕನಿಗೆ ಬೆದರಿಕೆ ಹಾಕಿದಾಗ ಆತ ಅಲ್ಲಿಂದ ಹೊರಟು ಹೋಗಿದ್ದಾನೆ.