ಬೆಂಗಳೂರು: ಅಜ್ಜಿಯ ನಿಂದನೆಯಿಂದ ಬೇಸತ್ತಿದ್ದ ಮೊಮ್ಮಗಳು ಸ್ವಂತ ಮನೆಯಲ್ಲೇ ಚಿನ್ನಾಭರಣ ಕಳವು ಮಾಡಿಸಿದ್ದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮೂವರು ಅಪ್ರಾಪ್ತರನ್ನು ಪರಪ್ಪನ ಅಗ್ರಹಾರ ಠಾಣೆ ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಪರಪ್ಪನ ಅಗ್ರಹಾರ ಸಮೀಪದ ಚನ್ನಕೇಶವನಗರ ನಿವಾಸಿ ರೇವತಿ ಎಂಬುವರ ಮನೆಯಲ್ಲಿ ಕಳವು ನಡೆದಿತ್ತು. ಹೂವಿನ ವ್ಯಾಪಾರ ಮಾಡುವ ರೇವತಿ ಅವರು, ಒಬ್ಬಂಟಿಯಾಗಿ ವಾಸವಾಗಿದ್ದಾರೆ. ಅವರ ಮೂವರು ಮಕ್ಕಳು ಪ್ರತ್ಯೇಕವಾಗಿ ವಾಸಿಸುತ್ತಿದ್ದಾರೆ. ಮೂವರು ಮಕ್ಕಳ ಪೈಕಿ ಮಣಿ ಎಂಬುವರ ಅಪ್ರಾಪ್ತ ಮಗಳು ಕೆಲ ದಿನಗಳ ಹಿಂದೆ ಅಜ್ಜಿ ರೇವತಿಯ ಎಟಿಎಂ ಕಾರ್ಡ್ ಕದ್ದು ಹಣ ಡ್ರಾ ಮಾಡಿಕೊಂಡಿದ್ದಳು. ಈ ವಿಚಾರಕ್ಕೆ ರೇವತಿ, ಸದಾ ಮೊಮ್ಮಗಳಿಗೆ ಬೈಯ್ಯುತ್ತಿದ್ದರು. ಈ ನಿಂದನೆಯಿಂದ ಅವಮಾನಿತಳಾಗಿದ್ದ ಮೊಮ್ಮಗಳು ಅಜ್ಜಿಗೆ ತಕ್ಕ ಪಾಠ ಕಲಿಸಲು ನಿರ್ಧರಿಸಿ, ಇಬ್ಬರು ಸಹಪಾಠಿಗಳ ಜತೆ ಸೇರಿ ತನ್ನ ಮನೆಯಲ್ಲೇ ಚಿನ್ನಾಭರಣ ಕಳವು ಮಾಡಿಸಿದ್ದಳು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ನಿವೇಶನ ಖರೀದಿಸುವ ಪ್ರಯತ್ನದಲ್ಲಿದ್ದ ಮಣಿ, ಅದಕ್ಕೆ ಹಣ ಹೊಂದಿಸುತ್ತಿದ್ದರು. ತಮ್ಮ ಬಳಿಯಿದ್ದ ಚಿನ್ನದ ಆಭರಣಗಳನ್ನು ತಂದು ತಾಯಿ ರೇವತಿಯವರ ಮನೆಯಲ್ಲಿ ಇಟ್ಟಿದ್ದರು. ಈ ವಿಚಾರ ತಿಳಿದಿದ್ದ ಮಣಿಯ ಮಗಳು ಆ ಆಭರಣಗಳನ್ನು ಕಳವು ಮಾಡಿಸಿ ಅಜ್ಜಿಗೆ ಪಾಠ ಕಲಿಸಬೇಕೆಂದು ನಿರ್ಧರಿಸಿದ್ದಳು. ಸ್ನೇಹಿತೆ ಮತ್ತು ಸ್ನೇಹಿತನ ಜತೆ ಸೇರಿ ಕಳುವು ಮಾಡುವ ಸಂಚು ರೂಪಿಸಿದ್ದಳು.
ಬುರ್ಖಾ ಧರಿಸಿ ಬಂದು ಕೃತ್ಯ:
ರೇವತಿ ಅವರು ಪ್ರತಿನಿತ್ಯದಂತೆ ಮೇ ೨೭ರಂದು ಮನೆಗೆ ಬೀಗ ಹಾಕಿ ಕೀಯನ್ನು ಬಾಗಿಲ ಪಕ್ಕದ ಶೂ ಬಾಕ್ಸ್ನಲ್ಲಿ ಇಟ್ಟು ವ್ಯಾಪಾರಕ್ಕೆ ಹೋಗಿದ್ದರು. ಈ ಬಗ್ಗೆ ಮಣಿಯ ಮಗಳು ಸ್ನೇಹಿತನಿಗೆ ಸುಳಿವು ಕೊಟ್ಟಿದ್ದಳು. ಇದಕ್ಕೂ ಮೊದಲೇ ಕಳವು ಕೃತ್ಯಗಾಗಿಯೇ ಆ ಸ್ನೇಹಿತನು ಪರಿಚಯದ ಮುಸ್ಲಿಂ ವ್ಯಕ್ತಿಯಿಂದ ಬುರ್ಖಾ ಪಡೆದಿದ್ದ. ಆತ ಆ ಬುರ್ಖಾ ಧರಿಸಿ ಹೋಗಿ ಕೈಚಳಕ ತೋರಿದ್ದ. ರೇವತಿ ಅವರ ಮನೆಯ ಹೊರಗಿನ ಶೂ ಬಾಕ್ಸ್ನಲ್ಲಿದ್ದ ಕೀ ತೆಗೆದುಕೊಂಡು ಬಾಗಿಲು ತೆರೆದು ಒಳ ಹೋಗಿ ಅಲ್ಮೇರಾದಲ್ಲಿದ್ದ ಆಭರಣಗಳನ್ನು ಕದ್ದು ಪರಾರಿಯಾಗಿದ್ದ.
