ಸರ್ಕಾರಿ ನೌಕರರು ಕೋಮು ಸಂಘಟನೆ ಸದಸ್ಯರಾಗುವಂತಿಲ್ಲ

ರುದ್ರಣ್ಣ ಹರ್ತಿಕೋಟೆ
ಬೆಂಗಳೂರು: ರಾಜ್ಯ ಸರ್ಕಾರಿ ನೌಕರರು ಇನ್ನು ಮುಂದೆ, ಸಮುದಾಯದಲ್ಲಿ ದ್ವೇಷ ಹರಡುವ ಯಾವುದೇ ಕೋಮು ಸಂಘಟನೆಗಳ ಸದಸ್ಯರಾಗುವಂತಿಲ್ಲ. ಸರ್ಕಾರಿ ನೌಕರರ ನಡತೆಯ ನಿಯಮಾವಳಿಗಳಿಗೆ ತಿದ್ದುಪಡಿ ತರಲು ಸರ್ಕಾರ ಮುಂದಾಗಿದೆ. ಆ ಮೂಲಕ ಸಮಾಜದಲ್ಲಿ ದ್ವೇಷ, ಅಸೂಯೆ ಭಾವನೆಗಳನ್ನು ಉದ್ದೀಪನಗೊಳಿಸುವ ಸಂಘಟನೆಗಳಿಂದ ನೌಕರರನ್ನು ದೂರವಿಡಲು ಮುಂದಾಗಿದೆ. ಗುರುವಾರ ನಡೆಯಲಿರುವ ಸಚಿವ ಸಂಪುಟ ಸಭೆಯ ಮುಂದೆ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆ ನೌಕರರ ನಡತೆಯ ನಿಯಮಾವಳಿಗಳಿಗೆ ತಿದ್ದುಪಡಿ ತರುವ ಪ್ರಸ್ತಾವನೆಯನ್ನು ಮಂಡಿಸಿದೆ. ಅದಕ್ಕೆ ಒಪ್ಪಿಗೆ ಸಿಗುವ ಸಾಧ್ಯತೆಯೂ ಇದೆ. ಸರ್ಕಾರಿ ನೌಕರರ ನಡತೆಯ ಮೇಲೆ ಸಾಕಷ್ಟು ನಿಯಂತ್ರಣ ಸಾಧಿಸುವ ಹಾಗೂ ಎಚ್ಚರಿಕೆ ನೀಡುವಂತಹ ಕೆಲ ನಿಯಮಾವಳಿಗಳನ್ನು ಸರ್ಕಾರ 1966ರಲ್ಲಿಯೇ ರೂಪಿಸಿತ್ತು. ಅದಕ್ಕೆ 2021ರಲ್ಲಿ ಇನ್ನಷ್ಟು ಅಂಶಗಳನ್ನು ಸೇರಿಸಿ ಬಲಗೊಳಿಸಲಾಯಿತು.

ಶಿಕ್ಷೆ ಏನು?
ಸರ್ಕಾರ ನಿಗದಿ ಪಡಿಸಿರುವ ನಡತೆಗಳ ನಿಯಮಾವಳಿ ಉಲ್ಲಂಘನೆ ಮಾಡಿದರೆ ಯಾವುದೇ ಶಿಕ್ಷೆಯನ್ನು ನೀಡುತ್ತಿಲ್ಲ. ಶಿಸ್ತುಕ್ರಮ ಎಂಬುದನ್ನು ಮಾತ್ರ ಹೇಳುತ್ತದೆ. ವೇತನ ಬಡ್ತಿ, ಅಮಾನತು ಅಂತಹ ಶಿಕ್ಷೆ ಇಲ್ಲದಿರುವುದರಿಂದ ಈ ನಿಯಮಾವಳಿಗಳನ್ನು ನೌಕರರು ಗಂಭೀರವಾಗಿ ಪರಿಗಣಿಸುತ್ತಾರಾ ಎಂಬ ಪ್ರಶ್ನೆಯೂ ಇದೆ.

ಅಗತ್ಯವೇನಿದೆ?
ಇತ್ತೀಚಿನ ದಿನಗಳಲ್ಲಿ ಕೋಮುಭಾವನೆ ಕೆರಳಿಸಿ ಅಶಾಂತಿ ಉಂಟು ಮಾಡುವ ಸಂಘಟನೆಗಳು ಹೆಚ್ಚಾಗುತ್ತಿವೆ. ಸರ್ಕಾರಿ ನೌಕರರು ಇಂತಹ ಸಂಘಟನೆಗಳ ಸದಸ್ಯರಾಗಿ ತೊಡಗಿರುವ ದೂರುಗಳು ಸರ್ಕಾರಕ್ಕೆ ಬಂದಿವೆ. ಹೀಗಾಗಿ ಸರ್ಕಾರ ಕರ್ನಾಟಕ ಸಿವಿಲ್ ಸೇವೆ ನಿಯಮಾವಳಿಗಳಿಗೆ ತಿದ್ದುಪಡಿಯ ಮೂಲಕ ಸರ್ಕಾರಿ ನೌಕರರು ಜಾತ್ಯತೀತ ಹಾಗೂ ಕೋಮುರಹಿತವಾಗಿರುವಂತೆ ನೋಡಿಕೊಳ್ಳಲು ನಿರ್ಧರಿಸಿದೆ ಎಂದು ಸರ್ಕಾರದ ಮೂಲಗಳು ಖಚಿತಪಡಿಸಿವೆ.

ತಿದ್ದುಪಡಿಯಲ್ಲಿ ಏನಿದೆ?
ಸರ್ಕಾರಿ ನಾಗರಿಕ ಸೇವಾ ನೌಕರರು ಧರ್ಮ, ಜನಾಂಗ, ಪ್ರದೇಶ, ಭಾಷೆ, ಕೋಮು ಕಾರಣಗಳಿಂದ ಸಮುದಾಯಗಳ ನಡುವೆ ದ್ವೇಷ ಮತ್ತು ಅಸೂಯೆ ಭಾವನೆಗಳನ್ನು ಉದ್ದೀಪನಗೊಳಿಸುವ ಸಂಸ್ಥೆಗಳೊಂದಿಗೆ ಜತೆಗೂಡುವುದನ್ನು ಅಥವಾ ಸದಸ್ಯರಾಗುವುದನ್ನು ಪ್ರತಿಬಂಧಿಸುವ ವಿಚಾರ ಸಂಪುಟದ ಮುಂದೆ ಮಂಡಿಸಲಾಗುತ್ತಿದೆ.

ಆಸ್ತಿ ಮಾಹಿತಿ ಸಲ್ಲಿಕೆ?
ಸರ್ಕಾರಿ ನೌಕರರು ತಮ್ಮ ಆಸ್ತಿಯ ವಿವರಗಳನ್ನು ಪ್ರತಿ ವರ್ಷ ಡಿಸೆಂಬರ್ ಅಂತ್ಯಕ್ಕೆ ಸರ್ಕಾರಕ್ಕೆ ಸಲ್ಲಿಸಬೇಕಾಗಿತ್ತು. ಆದರೆ, ಅದನ್ನು ಹಣಕಾಸು ವರ್ಷ ಕೊನೆಯಾಗುವ ಮಾರ್ಚ್ ಅಂತ್ಯಕ್ಕೆ ಸಲ್ಲಿಸುವಂತೆ ಸರ್ಕಾರ ತಿದ್ದುಪಡಿಗೆ ಮುಂದಾಗಿದೆ. ಮೊದಲು ಮಾರ್ಚ್ ಅಂತ್ಯಕ್ಕೆ ಎಂದು ಇದ್ದಿದ್ದನ್ನು ಕೆಲ ವರ್ಷಗಳ ಹಿಂದೆ ಡಿಸೆಂಬರ್ ಅಂತ್ಯಕ್ಕೆ ಸಲ್ಲಿಸುವಂತೆ ತಿದ್ದುಪಡಿ ಮಾಡಲಾಗಿತ್ತು. ಇದೀಗ ನೌಕರರ ಬೇಡಿಕೆಯಂತೆ ಮತ್ತೆ ಮಾರ್ಚ್ ಅಂತ್ಯಕ್ಕೆ ಎಂದೇ ತಿದ್ದುಪಡಿ ಮಾಡಲಾಗುತ್ತಿದೆ.

ಯುವ ನೀತಿ?
ಯುವ ಸಮುದಾಯಕ್ಕೆ ಸ್ಪಷ್ಟವಾದ ದಾರಿ ತೋರಿಸುವ ನಿಟ್ಟಿನಲ್ಲಿ ಸರ್ಕಾರ ರೂಪಿಸಿರುವ ಯುವ ನೀತಿಗೂ ಗುರುವಾರದ ಸಚಿವ ಸಂಪುಟ ಸಭೆಯಲ್ಲಿ ಒಪ್ಪಿಗೆ ನೀಡಲಾಗುತ್ತಿದೆ. ಯುವ ಸಬಲೀಕರಣ ಸಚಿವ ನಾರಾಯಣಗೌಡ ಆಸಕ್ತಿವಹಿಸಿ ಬಾಲಸುಬ್ರಮಣ್ಯ ನೇತೃತ್ವದ ಸಮಿತಿ ರಚನೆ ಮಾಡಿದ್ದರು. ಸಮಿತಿ ನೀಡಿದ ಶಿಫಾರಸುಗಳ ಆಧಾರದಲ್ಲಿ ನೀತಿ ಅಂತಿಮವಾಗಿದೆ. ಯುವಕ ಸಂಘಗಳನ್ನು ರಚನೆ ಮಾಡಿ ಅವುಗಳನ್ನು ನವೋದ್ಯಮಗಳಾಗಿ ಅಭಿವೃದ್ಧಿಪಡಿಸಲಾಗುತ್ತದೆ.

ನೌಕರರ ಮೇಲೆ ಹಾಲಿ ಇರುವ ನಿಯಂತ್ರಣಗಳು

• ನೀತಿ ಮತ್ತು ನಿಷ್ಠೆಯಿಂದ ಕೆಲಸ ಮಾಡಬೇಕು
• ಕರ್ತವ್ಯ ಶ್ರದ್ಧೆ ಇರಬೇಕು
• ರಾಜಕೀಯವಾಗಿ ತಟಸ್ಥ ನಿಲುವಿರಬೇಕು
• ಸಾರ್ವಜನಿಕವಾಗಿ ವರ್ತನೆಯಲ್ಲಿ ಲೋಪ ಇರಬಾರದು
• ಸಾರ್ವಜನಿಕ ಸಂಪನ್ಮೂಲ ಬಳಕೆಯಲ್ಲಿ ನಿಯಂತ್ರಣ
• ಸಾರ್ವಜನಿಕವಾಗಿ ಸ್ಪಂದನಶೀಲರಾಗಿರಬೇಕು
• ಖಾಸಗಿ ವ್ಯವಹಾರಗಳನ್ನು ನಡೆಸಬಾರದು
• ಸರ್ಕಾರಿ ಕರ್ತವ್ಯದ ಜತೆಗೆ ಬಾಹ್ಯ ಕರ್ತವ್ಯ ಮಾಡುವಂತಿಲ್ಲ
• ಜಾತಿ ಸಂಘಟನೆಗಳ ಜತೆ ಗುರುತಿಸಿಕೊಳ್ಳುವಂತಿಲ್ಲ
• ವರದಕ್ಷಿಣೆ ಅಥವಾ ವಧುದಕ್ಷಿಣೆ ನೀಡುವಂತಿಲ್ಲ
• ವಿದೇಶದಲ್ಲಿ ವ್ಯವಹಾರ ಮಾಡುವಂತಿಲ್ಲ
• ಅಪ್ರಾಪ್ತರನ್ನು ಕೆಲಸಕ್ಕೆ ಇಟ್ಟುಕೊಳ್ಳುವಂತಿಲ್ಲ
• ಲೈಂಗಿಕ ಕಿರುಕುಳ ನೀಡುವಂತಿಲ್ಲ
• ರಾಷ್ಟ್ರದ ಭದ್ರತೆಗೆ ಧಕ್ಕೆ ತರುವ ಚಟುವಟಿಕೆಯಲ್ಲಿ ತೊಡಗುವಂತಿಲ್ಲ
• ಹಣಕಾಸು, ಉಡುಗೊರೆ ಆಮಿಷಕ್ಕೆ ಬಲಿಯಾಗಬಾರದು
• ಪುಸ್ತಕ ಪ್ರಕಟಣೆ, ನಟನೆ, ಲೇಖನ ಬರೆಯುವುದಕ್ಕೆ ಅನುಮತಿ ಕಡ್ಡಾಯ
• ಕೇಂದ್ರ ಹಾಗೂ ರಾಜ್ಯ ಸರ್ಕಾರದ ವಿರುದ್ಧ ಟೀಕೆ ಸಲ್ಲ
• ಕುಡಿದು ಮತ್ತೇರಿದ ಸ್ಥಿತಿಯಲ್ಲಿ ಸಾರ್ವಜನಿಕವಾಗಿ ಕಾಣಿಸಿಕೊಳ್ಳುವಂತಿಲ್ಲ

ತಿದ್ದುಪಡಿ ಉದ್ದೇಶಗಳು

• ಸರ್ಕಾರಿ ನೌಕರರು ಯಾವುದೇ ಕೋಮಿಗೆ ಸೀಮಿತವಾಗಬಾರದು
• ಸಂವಿಧಾನದ ಅಧೀನದಲ್ಲಿ ಸೇವೆ ಸಲ್ಲಿಸುತ್ತಿರಬೇಕು
• ಸಮಾಜದಲ್ಲಿ ಶಾಂತಿ ಹಾಗೂ ಸೌಹಾರ್ದತೆಗೆ ಆದ್ಯತೆ ನೀಡಬೇಕು
• ನೌಕರರು ಎಲ್ಲ ವರ್ಗದವರನ್ನು ಸಮಾನವಾಗಿ ಕಾಣಬೇಕು
• ಕೋಮು ಸಂಘಟನೆಗಳ ಸದಸ್ಯರಾದರೆ ಇನ್ನೊಂದು ಕೋಮಿನ ಜನರಿಗೆ ನ್ಯಾಯ ನೀಡಲಾಗದು

https://www.vijayavani.net/pm-modi-to-visit-bangalore/

https://www.vijayavani.net/siddaramaiah-said-many-people-call-me-annaramayya/