ಸರ್ಕಾರ ಎಷ್ಟೇ ಒಳ್ಳೆಯ ಯೋಜನೆಗಳನ್ನು, ಕಾರ್ಯಕ್ರಮಗಳನ್ನು ಘೋಷಿಸಿದರೂ ಅದರ ಸಮರ್ಪಕ ಅನುಷ್ಠಾನದ ಹೊಣೆ ಆಡಳಿತಶಾಹಿಯದ್ದು. ಆದರೆ, 1.70 ಲಕ್ಷದಷ್ಟು ಕಡತಗಳು ವಿಲೇವಾರಿಯಾಗಬೇಕಾಗಿವೆ ಎಂಬ ಅಂಶವೇ ಪರಿಸ್ಥಿತಿಯ ತೀವ್ರತೆಗೆ ಸಾಕ್ಷಿ. ‘ಕೂಡಲೇ ಕಡತ ವಿಲೇವಾರಿ ಮಾಡಬೇಕು, ಇಲ್ಲದಿದ್ದರೆ ಕ್ರಮ ಅನಿವಾರ್ಯ’ ಎಂಬ ಎಚ್ಚರಿಕೆಯೂ ಎಲ್ಲ ಇಲಾಖೆ ಮುಖ್ಯಸ್ಥರಿಗೆ ರವಾನೆಯಾಗಿದೆ. ಆದರೆ, ಈ ಹಿಂದೆಯೂ ಇಂಥ ಎಚ್ಚರಿಕೆ ರವಾನಿಸಿದ ಬಳಿಕ, ಕೆಲ ದಿನಗಳ ಕಾಲ ಕೆಲಸಗಳು ಚುರುಕಿನಿಂದ ನಡೆಯುತ್ತವೆ. ಆ ಬಳಿಕ ಮತ್ತೆ ಅದೇ ಹಳೆಯ ಸ್ಥಿತಿ. ಶಾಸಕರು ಹಾಗೂ ಕೆಲ ಸಚಿವರ ಸೂಚನೆಗಳಿಗೆ ಅಧಿಕಾರಿಗಳು ಕಿಮ್ಮತ್ತು ನೀಡುತ್ತಿಲ್ಲವೆಂದರೆ ಜನಸಾಮಾನ್ಯರ ಸ್ಥಿತಿ ಏನು? ಅಧಿಕಾರಶಾಹಿ ಹೀಗೆ ಜಡತ್ವದಲ್ಲಿ ಮುಳುಗಿದರೆ ಸರ್ಕಾರದ ಪ್ರಯತ್ನಗಳು, ಸದಾಶಯಗಳು ವ್ಯರ್ಥವಾದಂತೆಯೇ. ಆ ಸ್ಥಿತಿ ಸೃಷ್ಟಿಯಾಗುವ ಮುನ್ನವೇ ಮುಖ್ಯಮಂತ್ರಿಗಳು ಸುಧಾರಣೆ ಕ್ರಮಕ್ಕೆ ಮುಂದಾಗಿರುವುದು ಒಳ್ಳೆಯ ಬೆಳವಣಿಗೆ. ಈ ಪ್ರಕ್ರಿಯೆ ಕೆಲ ದಿನಗಳಿಗೆ ಸೀಮಿತವಾಗದೆ ಆಡಳಿತಕ್ಕೆ ಸುಧಾರಣೆಯ, ಚುರುಕುತನದ ಹೊಸಸ್ಪರ್ಶ ಸಿಗುವಂತಾಗಬೇಕು. ಆಗಲೇ ಯೋಜನೆಗಳ ಸಮರ್ಪಕ ಅನುಷ್ಠಾನದ ಜತೆಗೆ, ಜನರ ದೂರುದುಮ್ಮಾನ, ಸಂಕಷ್ಟಗಳಿಗೆ ಪರಿಣಾಮಕಾರಿ ಸ್ಪಂದನೆ ಸಿಗಲು ಸಾಧ್ಯ. ಈ ವಾಸ್ತವವನ್ನು ಅರ್ಥ ಮಾಡಿಕೊಂಡು ಮುಂದಿನ ದಿನಗಳಲ್ಲಿ ಹೆಚ್ಚೆಚ್ಚು ಕ್ರಮಗಳನ್ನು ಕೈಗೊಳ್ಳುವುದು ಸೂಕ್ತ.
