ದೇಶದಲ್ಲಿ ಕರೊನಾ ಎರಡನೆಯ ಅಲೆಯ ತೀವ್ರತೆ ದಿನೇದಿನೆ ಇಳಿಮುಖವಾಗುತ್ತಿರುವುದು ಸ್ವಲ್ಪ ಸಮಾಧಾನದ ಸಂಗತಿ. ದೇಶವ್ಯಾಪಿ ದೈನಂದಿನ ಪ್ರಕರಣಗಳು 60 ಸಾವಿರ ಸನಿಹಕ್ಕೆ ಬಂದಿವೆ. ಬಹುತೇಕ ಎಲ್ಲ ರಾಜ್ಯಗಳಲ್ಲಿ ಹೊಸ ಪ್ರಕರಣಗಳ ಸಂಖ್ಯೆ ಕಡಿಮೆಯಾಗುತ್ತಿದ್ದು, ಅನ್ಲಾಕ್ ಪ್ರಕ್ರಿಯೆ ಚಾಲನೆ ಪಡೆದಿದೆ. ಕರೊನಾ ಲಾಕ್ಡೌನ್ ಮತ್ತಿತರ ಕಾರಣಕ್ಕೆ ಕುಸಿದಿರುವ ಆರ್ಥಿಕ ವ್ಯವಸ್ಥೆಗೆ ಚೇತರಿಕೆ ನೀಡಲು ಇದು ಅನಿವಾರ್ಯ ಕೂಡಾ. ಆದರೆ, ಮೊದಲನೆಯ ಅಲೆಯ ನಂತರ ಮೈಮರೆತಂತೆ ಈಗಲೂ ಆ ತಪು$್ಪ ಮರುಕಳಿಸದಂತೆ ಎಚ್ಚರವಹಿಸಬೇಕು. ಇಲ್ಲವಾದಲ್ಲಿ ಇನ್ನಷ್ಟು ಬೆಲೆ ತೆರಬೇಕಾಗುತ್ತದೆ ಎಂಬ ಅರಿವು ಎಲ್ಲರಲ್ಲಿಯೂ ಇರಬೇಕು. ಕೈಗಾರಿಕಾ ವಲಯ ಸೇರಿದಂತೆ ಎಲ್ಲ ರಂಗಗಳು ಈಗ ಬಹುತೇಕ ಸ್ತಬ್ಧವಾಗಿದ್ದು, ಮರಳಿ ಹಳಿಗೆ ಬರಲು ಕಾಲಾವಕಾಶ ಬೇಕಾಗುತ್ತದೆ. ಅದರಂತೆ ಆರೋಗ್ಯ ರಂಗ ಕೂಡಾ ಸಂಕಷ್ಟದಲ್ಲಿದೆ. ಈ ನಡುವೆ, ಕರೊನಾ ಮೂರನೆಯ ಅಲೆ ಕುರಿತಂತೆ ತಜ್ಞರು ಎಚ್ಚರಿಕೆ ನೀಡುತ್ತಲೇ ಇದ್ದು, ಅದು ಯಾವ ಸಮಯಕ್ಕೆ ಬರಬಹುದು ಎಂಬ ಬಗ್ಗೆ ಬೇರೆ ಬೇರೆ ಅಭಿಪ್ರಾಯಗಳಿವೆ.
