ಮುಂಬೈ: ಎರಡು ದಿನಗಳ ಸತತ ಇಳಿಕೆಯ ಬಳಿಕ ಭಾರತೀಯ ಷೇರುಪೇಟೆ ಗುರುವಾರ ಪುಟಿದೆದ್ದಿದೆ. ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಪರಸ್ಪರ ಸುಂಕಕ್ಕೆ ಅಲ್ಲಿನ ನ್ಯಾಯಾಲಯ ತಡೆಯೊಡ್ಡಿದ್ದು ಜಾಗತಿಕ ಷೇರು ಮಾರುಕಟ್ಟೆಯ ಏರಿಕೆಗೆ ಕಾರಣವಾಗಿದೆ. ದಿನದ ವಹಿವಾಟಿನ ಮಧ್ಯೆ 504 ಅಂಕ ಏರಿಕೆಯಾಗಿ 81,816ಕ್ಕೆ ತಲುಪಿದ್ದ ಸೆನ್ಸೆಕ್ಸ್, ಕೊನೆಯಲ್ಲಿ 320 ಅಂಕ ಏರಿಕೆ ದಾಖಲಿಸಿ 81,633ಕ್ಕೆ ಸ್ಥಿರವಾಯಿತು. ನಿಫ್ಟಿ ಕೂಡ 81 ಅಂಕ ಹೆಚ್ಚಳವಾಗಿ 24,833ಕ್ಕೆ ಸ್ಥಿರಗೊಂಡಿತು. ಇಂಡಸ್ಇಂಡ್ ಬ್ಯಾಂಕ್ನ ಮಾಜಿ ಸಿಇಒ ಸುಮಂತ್ ಮತ್ತು ಇತರ ನಾಲ್ವರನ್ನು ಷೇರು ಮಾರುಕಟ್ಟೆಯಿಂದ ಸೆಬಿ ನಿಷೇಧಿಸಿದ್ದರ ಪರಿಣಾಮ ಆ ಬ್ಯಾಂಕಿನ ಷೇರುಗಳ ಮೌಲ್ಯ ಗುರುವಾರ ಶೇ. 2.41ರಷ್ಟು ಏರಿಕೆಯಾಯಿತು. ಏಷ್ಯಾ ಮತ್ತು ಯೂರೋಪಿಯನ್ ಮಾರುಕಟ್ಟೆಗಳೂ ಏರಿಕೆ ದಾಖಲಿಸಿದವು.
