Gautam Gambhir: ವೆಸ್ಟ್ ಇಂಡೀಸ್ ವಿರುದ್ಧದ ಮೂರು ಪಂದ್ಯಗಳ ಏಕದಿನ ಸರಣಿಗಾಗಿ ಟೀಮ್ ಇಂಡಿಯಾ ಸಜ್ಜಾಗುತ್ತಿದ್ದು, ನಾಯಕ ಶುಭಮಾನ್ ಗಿಲ್ಗೆ ಬೆಂಬಲವಾಗಿ ಅನುಭವಿ ಆಟಗಾರರಾದ ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮಾ ಸಾಥ್ ನೀಡಲಿದ್ದಾರೆ. ಗಿಲ್ ಮೇಲೆ ಈ ಇಬ್ಬರು ಹಿರಿಯ ಆಟಗಾರರ ಪ್ರಭಾವ ಎಷ್ಟಿರಲಿದೆ ಎಂಬುದನ್ನು ಹೆಡ್ ಕೋಚ್ ಗೌತಮ್ ಗಂಭೀರ್ ವಿವರವಾಗಿ ಹಂಚಿಕೊಂಡಿದ್ದಾರೆ.
ಜಿಯೋಸ್ಟಾರ್ ಜೊತೆ ಮಾತನಾಡಿದ ಗಂಭೀರ್, ಏಕದಿನ ಕ್ರಿಕೆಟ್ ವಿಷಯಕ್ಕೆ ಬಂದರೆ, ಮೈದಾನದ ಒಳಗೆ ಮತ್ತು ಹೊರಗೆ ಗಿಲ್ಗೆ ನೆರವಾಗಲು ರೋಹಿತ್ ಮತ್ತು ವಿರಾಟ್ ಅವರಂತಹ ದಿಗ್ಗಜರು ಸಿಕ್ಕಿರುವುದು ಅವರ ಅದೃಷ್ಟ. ಎಲ್ಲಕ್ಕಿಂತ ಮುಖ್ಯವಾಗಿ, ಯುವ ಆಟಗಾರರಾಗಿದ್ದಾಗ ಕೆಲವೊಮ್ಮೆ ಭಾವನೆಗಳಿಗೆ ಒಳಗಾಗುವ ಸಾಧ್ಯತೆ ಇರುತ್ತದೆ. ಆದರೆ ಅಂತಹ ಸಮಯದಲ್ಲಿ ಭಾವನೆಗಳನ್ನು ಅದುಮಿಟ್ಟುಕೊಂಡು ಶಾಂತವಾಗಿರುವುದು ಅತ್ಯಂತ ಮುಖ್ಯವಾಗಿದೆ ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ:24 ಗಂಟೆಯಲ್ಲೇ ಎಲ್ಲಾ ಬದಲಾಯ್ತು!...ಸೋಶಿಯಲ್ ಮೀಡಿಯಾದಲ್ಲಿ ಆಘಾತಕಾರಿ ಪೋಸ್ಟ್ ಹಂಚಿಕೊಂಡ ಉನ್ಮುಕ್ತ್ ಚಾಂದ್ | Unmukt Chand
ಗಿಲ್ ನಿಸ್ವಾರ್ಥಿ ನಾಯಕ ಎಂದ ಗೌತಿ
ನಾಯಕತ್ವದ ವಿಚಾರದಲ್ಲಿ ಗಿಲ್ ತಂದಿರುವ ವಿಭಿನ್ನ ಗುಣಗಳನ್ನು ಗಂಭೀರ್ ಮನಸಾರೆ ಶ್ಲಾಘಿಸಿದ್ದು, ತಂಡದ ನೇತೃತ್ವ ವಹಿಸಿಕೊಂಡ ಎಲ್ಲಾ ಪರೀಕ್ಷೆಗಳಲ್ಲೂ ಯಶಸ್ವಿಯಾಗಿದ್ದಾರೆ. ಅವರು ಶಾಂತವಾಗಿದ್ದಾರೆ, ನಿಸ್ವಾರ್ಥಿಯಾಗಿದ್ದಾರೆ ಮತ್ತು ಅಗತ್ಯವಿದ್ದಾಗ ಅಗ್ರೆಸಿವ್ ಕೂಡ ಆಗಿದ್ದಾರೆ. ಅವರು ಸರಿಯಾದ ವಿಷಯಗಳನ್ನೇ ಮಾತನಾಡುತ್ತಾರೆ ಮತ್ತು ಕೇವಲ ರನ್ ಕಲೆಹಾಕುವುದರಿಂದಷ್ಟೇ ಅಲ್ಲದೆ, ತಮ್ಮ ನಡವಳಿಕೆಯಿಂದ ಮಾದರಿ ನಾಯಕನಾಗಿ ಮುನ್ನಡೆಸುತ್ತಿದ್ದಾರೆ ಎಂದರು.
ಮುಂದುವರೆದು ಮಾತನಾಡಿದ ಗಂಭೀರ್, ಗಿಲ್ ಇಲ್ಲಿಯವರೆಗೆ ತೆಗೆದುಕೊಂಡ ಬಹುತೇಕ ಎಲ್ಲಾ ಕ್ರಮಗಳು ಸರಿಯಾಗಿಯೇ ಇದ್ದು, ಏಕದಿನ ಕ್ರಿಕೆಟ್ನಲ್ಲಿ ಸಣ್ಣ ಮಟ್ಟದ ಕಠಿಣ ಹಂತವನ್ನು ಎದುರಿಸಿದ್ದರೂ, ವಾತಾವರಣ ಸದಾ ಅವರ ಪರವಾಗಿ ಇರಲಿದೆ ಎಂಬ ಭರವಸೆ ವ್ಯಕ್ತಪಡಿಸಿದ್ದಾರೆ. ರೋಹಿತ್ ಮತ್ತು ಕೊಹ್ಲಿ ಅವರ ಉಪಸ್ಥಿತಿಯು ಭಾರತದ ಏಕದಿನ ಬ್ಯಾಟಿಂಗ್ ವಿಭಾಗಕ್ಕೆ ದೊಡ್ಡ ಮಟ್ಟದಲ್ಲಿ ಬಲವನ್ನು ನೀಡಲಿದೆ ಎಂದಿದ್ದಾರೆ.
ಸರಣಿಯ ಮೊದಲ ಏಕದಿನ ಪಂದ್ಯವು ಭಾನುವಾರ, ಸೆಪ್ಟೆಂಬರ್ 27 ರಂದು ತಿರುವನಂತಪುರದ ಗ್ರೀನ್ಫೀಲ್ಡ್ ಇಂಟರ್ನ್ಯಾಷನಲ್ ಸ್ಟೇಡಿಯಂನಲ್ಲಿ ನಡೆಯಲಿದೆ. ಎರಡನೇ ಏಕದಿನ ಪಂದ್ಯವು ಸೆಪ್ಟೆಂಬರ್ 30 ರಂದು ಗುವಾಹಟಿಯಲ್ಲಿ ಮತ್ತು ಮೂರನೇ ಹಾಗೂ ಅಂತಿಮ ಪಂದ್ಯವು ಅಕ್ಟೋಬರ್ 3 ರಂದು ನ್ಯೂ ಚಂಡೀಗಢದಲ್ಲಿ ನಡೆಯಲಿದೆ. ಇದರ ನಂತರ 5 ಪಂದ್ಯಗಳ ಟಿ20 ಸರಣಿ ನಡೆಯಲಿದ್ದು, ಅಕ್ಟೋಬರ್ 17 ರಂದು ಬೆಂಗಳೂರಿನಲ್ಲಿ ಪ್ರವಾಸ ಮುಕ್ತಾಯಗೊಳ್ಳಲಿದೆ.
ವೆಸ್ಟ್ ಇಂಡೀಸ್ ವಿರುದ್ಧ ಗಿಲ್ ಅವರ ಏಕದಿನ ದಾಖಲೆ ಅತ್ಯುತ್ತಮವಾಗಿದ್ದು, ಆಡಿದ 6 ಪಂದ್ಯಗಳಲ್ಲಿ 66.2 ಸರಾಸರಿ ಮತ್ತು 92.71 ಸ್ಟ್ರೈಕ್ ರೇಟ್ನಲ್ಲಿ 331 ರನ್ ಗಳಿಸಿದ್ದಾರೆ (ಅತ್ಯಧಿಕ ಗಳಿಕೆ 98 ರನ್). ರೋಹಿತ್ ಮತ್ತು ಕೊಹ್ಲಿ ಅವರ ಅನುಭವದ ಬೆಂಬಲದೊಂದಿಗೆ, ಗಿಲ್ ತಮ್ಮ ಈ ಅತ್ಯುತ್ತಮ ದಾಖಲೆಯನ್ನು ಕಾಯ್ದುಕೊಂಡು ನಾಯಕನಾಗಿ ತಮ್ಮ ಜವಾಬ್ದಾರಿಯನ್ನು ಯಶಸ್ವಿಯಾಗಿ ನಿರ್ವಹಿಸುವ ನಿರೀಕ್ಷೆಯಿದೆ.
