ಐಟಿ-ಬಿಟಿ ಕ್ಷೇತ್ರಕ್ಕೆ ಭಾರಿ ಉತ್ತೇಜನ: ಡಿಸಿಎಂ

ರಾಜ್ಯದ ಐಟಿ- ಬಿಟಿ ಮತ್ತು ವಿಜ್ಞಾನ ತಂತ್ರಜ್ಞಾನ ಇಲಾಖೆ ಹಮ್ಮಿಕೊಂಡಿರುವ ಬೆಂಗಳೂರು ತಂತ್ರಜ್ಞಾನ ಶೃಂಗಸಭೆಗೆ ಕ್ಷಣಗಣನೆ ಆರಂಭವಾಗಿದೆ. ಈ ಅಪರೂಪದ ಕಾರ್ಯಕ್ರಮವು ಕರೊನಾ ಕಾರಣಕ್ಕೆ ವರ್ಚುವಲ್ ಆಗಿ ನಡೆಯುತ್ತಿದ್ದು, ಪ್ರಧಾನಿ ಚಾಲನೆ ನೀಡುತ್ತಿದ್ದಾರೆ. ಇಂಥ ಅಗ್ರಮಾನ್ಯ ಕಾರ್ಯಕ್ರಮದ ರೂವಾರಿ ಉಪ ಮುಖ್ಯಮಂತ್ರಿ ಡಾ. ಸಿ.ಎನ್. ಅಶ್ವತ್ಥನಾರಾಯಣ ಮಂಗಳವಾರ ವಿಜಯವಾಣಿ ಕಚೇರಿಗೆ ಆಗಮಿಸಿ ಸಂಪಾದಕೀಯ ಬಳಗದ ಜತೆ ಸಂವಾದದಲ್ಲಿ ಪಾಲ್ಗೊಂಡು ಈ ಶೃಂಗಸಭೆಯ ಮಹತ್ವ ಮತ್ತು ಐಟಿ ಕ್ಷೇತ್ರದ ಕುರಿತು ಬೆಳಕು ಚೆಲ್ಲಿದರು. ಆ ಕುರಿತ ಸಂಪೂರ್ಣ ವಿವರ ಅವರದ್ದೇ ಮಾತುಗಳಲ್ಲಿ...

• ಕರೊನಾ ಕಾಲದಲ್ಲಿ ಐಟಿ ಕ್ಷೇತ್ರಕ್ಕೆ ಟೆಕ್ ಸಮಿಟ್ ದೊಡ್ಡ ಬೂಸ್ಟ್ ನೀಡುವ ವಿಶ್ವಾಸವಿದೆ. ರಾಜ್ಯದ ಔದ್ಯೋಗಿಕ, ಆರ್ಥಿಕ ಸೇರಿ ಎಲ್ಲ ಕ್ಷೇತ್ರಗಳಲ್ಲೂ ತಂತ್ರಜ್ಞಾನ ಪ್ರಮುಖ ಪಾತ್ರ ವಹಿಸುತ್ತಿದೆ. ರಾಜ್ಯಕ್ಕೆ ದೇಶಕ್ಕೆ ಆರ್ಥಿಕವಾಗಿ ದೊಡ್ಡ ಪಾತ್ರ ವಹಿಸುತ್ತಿದೆ, ಜಿಎಸ್​ಡಿಪಿಯಲ್ಲಿ ಶೇ.25 ಪಾಲಿದೆ. ದೇಶದ ಐಟಿ ರಫ್ತು 3-4 ಲಕ್ಷ ಕೋಟಿ ರೂ. ಇದ್ದರೆ, ರಾಜ್ಯದಿಂದ ರಫ್ತು 1.85 ಲಕ್ಷ ಕೋಟಿ ಗುರಿ ಇದೆ. ಈ ವರ್ಷದ ಟಾರ್ಗೆಟ್ ಮೀರಿ ಸಾಧನೆಯಾಗಲಿದೆ.
• ಇದು ರಾಜ್ಯದ ಪಾಲಿಗೆ ಪ್ರತಿಷ್ಠೆಯ ಕಾರ್ಯಕ್ರಮ. ಕಳೆದ ಬಾರಿಯ ಕೊರತೆ, ನ್ಯೂನತೆಗಳನ್ನು ಪಟ್ಟಿ ಮಾಡಿಕೊಂಡು ಅದನ್ನು ಸರಿಪಡಿಸಿಕೊಳ್ಳುತ್ತಿದ್ದೇವೆ. 8 ತಿಂಗಳಿಂದಲೇ ಕಾರ್ಯಕ್ರಮದ ಯಶಸ್ಸಿಗಾಗಿ ಕೆಲಸ ನಡೆದಿದೆ. 25 ದೇಶಗಳು ಪಾಲ್ಗೊಳ್ಳಲಿವೆ. ಜಾಗತಿಕ ಟಾಪ್ ಐಟಿಬಿಟಿ ಕಂಪೆನಿಗಳ ದಿಗ್ಗಜರು ಭಾಷಣಕಾರರಾಗಿ ಪಾಲ್ಗೊಳ್ಳುತ್ತಿದ್ದಾರೆ. ಅವರು ತಮ್ಮ ಕ್ಷೇತ್ರದಲ್ಲಿ ಹೊಸ ಬೆಳವಣಿಗೆ- ಸವಾಲನ್ನು ತಿಳಿಸಿಕೊಡಲಿದ್ದಾರೆ. ಜತೆಗೆ ಈ ಕಾರ್ಯಕ್ರಮ ಎಷ್ಟು ಮಹತ್ವದ್ದು ಎಂಬುದು ಹಿಂದಿನ ವರ್ಷದಲ್ಲೇ ಸ್ಪಷ್ಟವಾಗಿದೆ. ವಿವಿಧ ದೇಶಗಳ ರಾಯಭಾರಿಗಳು, ಐಟಿ ಕ್ಷೇತ್ರದ ಪ್ರಮುಖರು, ಕಂಪನಿಗಳು ಪಾಲ್ಗೊಂಡು ಇಲ್ಲಿನ ಬೆಳವಣಿಗೆ ಗಮನಿಸಿದ್ದಾರೆ, ಕೈಜೋಡಿಸಲು ಒಟ್ಟಿಗೆ ಹೆಜ್ಜೆಹಾಕಲು ಬಯಸಿದ್ದರು. ಆರ್ಟಿಫಿಶಿಯಲ್ ಇಂಟಲಿಜೆನ್ಸ್, ಬಿಗ್ ಡೇಟಾ, ಇಂಟರ್​ನೆಟ್ ಆಫ್ ಥಿಂಗ್ಸ್ ಸೇರಿ ವಿವಿಧ ವಿಷಯಗಳತ್ತ ಕೇಂದ್ರೀಕರಿಸಲಿದೆ.
• ಈ ಬಾರಿ ಕೂಡ ನಿಸ್ಸಂಶಯವಾಗಿ ಕಾರ್ಯಕ್ರಮ ಫಲಪ್ರದವಾಗುತ್ತದೆ. ನಮ್ಮಲ್ಲಿನ ಐಟಿ ಉತ್ಪನ್ನಗಳು, ಸೇವೆಗಳು, ಕಂಪನಿಗಳು, ಸ್ಟಾರ್ಟಪ್​ಗಳು ಶೃಂಗಸಭೆ ಯಲ್ಲಿ ಜಗತ್ತಿಗೆ ಶೋಕೆಸ್ ಆಗುತ್ತವೆ. ಒಡಂಬಡಿಕೆ ಆಗುತ್ತವೆ, ಹೂಡಿಕೆಯೂ ಆಗುತ್ತವೆ. ಕಳೆದ ಬಾರಿ 15 ಸಾವಿರ ವೀಕ್ಷಕರು ಪಾಲ್ಗೊಂಡರೆ, ಈ ಬಾರಿ 40 ಸಾವಿರ ಸಂಖ್ಯೆ ದಾಟಬಹುದು.
• ಕರೊನಾ ಕಾರಣದಿಂದ ವಿದೇಶದಿಂದ ರಾಜ್ಯಕ್ಕೆ ಆಗಮಿಸಿದ ಐದು ಸಾವಿರ ಮಂದಿ ವಿವಿಧ ಕ್ಷೇತ್ರದ ವೃತ್ತಿಪರರನ್ನು ನೋಂದಣಿ ಮಾಡಿಕೊಂಡಿದ್ದು, ಅವರಿಗೆ ಅವಕಾಶ ಕೊಡಿಸುವ ಪ್ರಯತ್ನ ಮಾಡಲಾಗುತ್ತಿದೆ. ಭಾರತದಲ್ಲೇ ಸಾಕಷ್ಟು ಅವಕಾಶಗಳೂ ಇವೆ.
• ರಾಜ್ಯದಲ್ಲಿ ಹೊಸ ಕೈಗಾರಿಕೆ ಸೌಲಭ್ಯ ಕಾಯ್ದೆ ಜಾರಿಯಾಗಿದೆ. ಇದರಿಂದ ಉದ್ಯಮ ಆರಂಭ ಸಲೀಸಾಗಲಿದೆ. ಸರ್ಕಾರದ ಒಂದು ಒಪ್ಪಿಗೆಯೊಂದಿಗೆ ಅಡೆತಡೆ ಇಲ್ಲದೆ ಚಟುವಟಿಕೆ ಆರಂಭಿಸಬಹುದು. ಜತೆಗೆ ಸ್ಟಾರ್ಟಪ್​ಗೆ ಪ್ರೋತ್ಸಾಹ ನೀಡಲಾಗುತ್ತಿದೆ. ಉದ್ಯೋಗಿಯಾಗುವವರನ್ನು ಉದ್ಯಮಿ ಮಾಡಬೇಕೆಂಬುದು ನಮ್ಮ ಉದ್ದೇಶ. ಉದ್ಯಮಿಗಳು ಮತ್ತು ಉದ್ಯೋಗ ಅರಸುವವರು ಬೆಂಗಳೂರಿಗೆ ಬರುತ್ತಿದ್ದಾರೆ. ಸದ್ಯ ಶೇ.5 ಐಟಿ ಚಟುವಟಿಕೆ ಹೊರ ಊರುಗಳಲ್ಲಿದ್ದರೆ, ಶೇ.95 ಬೆಂಗಳೂರಿನಲ್ಲೇ ಇದೆ. ಇತರ ಊರುಗಳಲ್ಲಿ ಒಳ್ಳೊಳ್ಳೆಯ ಪ್ರಯತ್ನಗಳಾಗಿವೆ. ಆದರೆ, ಬಯಸಿದ ಮಟ್ಟಕ್ಕೆ ಆಗಿಲ್ಲ. ಮತ್ತು ಬೆಂಗಳೂರು ಹೊರತುಪಡಿಸಿ ಇತರ ನಗರಗಳಲ್ಲಿ ಐಟಿ ಕಂಪೆನಿ ಹೆಚ್ಚೆಚ್ಚು ಆರಂಭವಾಗಬೇಕೆಂದು ಪ್ರೋತ್ಸಾಹ ನೀಡಲಾಗುತ್ತಿದೆ. ಇನ್​ಕ್ಯುಬೇಷನ್ ಸೆಂಟರ್ (ಪರಿಪೋಷಣಾ ಕೇಂದ್ರ) ನಿರ್ವಿುಸಲಾಗಿದೆ. ಸಪೋರ್ಟ್ ಸಿಸ್ಟಂ, ಸಂಶೋಧನೆಗೆ ಒತ್ತು ನೀಡಲಾಗುತ್ತಿದೆ.
• ಸ್ಟಾರ್ಟಪ್ ವಿಜನ್ ಗ್ರೂಪ್ ಮಾಡಿದ್ದು, ಇದೊಂದು ಗೇಮ್ ಚೇಂಜರ್ ತೀರ್ವನ. 2014ರಿಂದ 2020ರ ಅವಧಿಯಲ್ಲಿ ಸ್ಟಾರ್ಟಪ್​ಗಳಿಗೆ 28 ಶತಕೋಟಿ ಡಾಲರ್ ಹೂಡಿಕೆ ಆಗಿದೆ. ಇಷ್ಟು ಹೂಡಿಕೆಗೆ ಶೇ.60 ವೆಂಚರ್ ಕ್ಯಾಪಿಟಲ್ ಬೆಂಗಳೂರಿನಿಂದಲೇ ಆಗಿದೆ ಎಂಬುದು ವಿಶೇಷ ಸಂಗತಿ.
• ಡಿಜಿಟಲ್ ಎಕಾನಮಿ ಹೆಚ್ಚಾಗಬೇಕೆಂಬ ನಿಟ್ಟಿನಲ್ಲಿ ಪ್ರಯತ್ನ ನಡೆಯುತ್ತಿದೆ. ಆರೋಗ್ಯ, ಶಿಕ್ಷಣ, ಕೃಷಿ, ಸಾರಿಗೆ ಹೀಗೆ ಎಲ್ಲಾ ಕ್ಷೇತ್ರದಲ್ಲೂ ಡಿಜಿಟಲ್ ಎಕಾನಮಿ ಹೆಚ್ಚಾಗಬೇಕು. ಕೇಂದ್ರ ಒಂದು ಟ್ರಿಲಿಯನ್ ಆರ್ಥಿಕತೆ ಸಾಧಿಸುವ ಇಟ್ಟುಕೊಂಡಿದ್ದು, ಅದಕ್ಕೆ ತಕ್ಕಂತೆ ರಾಜ್ಯ ಕೂಡ ಸಾಗುತ್ತಿದೆ. ರಾಜ್ಯದ ಆರ್ಥಿಕತೆಯನ್ನು 300 ಶತಕೋಟಿ ಡಾಲರ್​ಗೆ ಕೊಂಡೊಯ್ಯುವ ಆಕಾಂಕ್ಷೆ ಇದೆ.
• ಐಟಿ ಕ್ಷೇತ್ರ ನಿರಂತವಾಗಿ ಹೆಚ್ಚೆಚ್ಚು ಉದ್ಯೋಗ ನೀಡಿದೆ. ನಿರೀಕ್ಷೆಯಂತೆ 60 ಲಕ್ಷದಷ್ಟು ಉದ್ಯೋಗ ಸೃಷ್ಟಿಯಾಗಬಹುದೆಂಬ ಅಂದಾಜಿದೆ. ಉದ್ಯೋಗಕ್ಕೆ ತಕ್ಕನಾಗಿ ಕಲಿಕೆಯಲ್ಲಿ ಸುಧಾರಣೆಯನ್ನೂ ತರುತ್ತಿದ್ದೇವೆ, ಉದ್ಯಮಗಳ ಸಹಯೋಗದಲ್ಲಿ ಸ್ಕಿಲ್ ಕನೆಕ್ಟ್ ಯೋಜನೆ ರೂಪಿಸಲಾಗಿದೆ. ಪದವಿ ಪಡೆದ ಬಳಿಕ ಕೆಲಸಕ್ಕೆ ನೇಮಕಗೊಂಡ ನಂತರ ತರಬೇತಿ ಪಡೆಯುವ ಬದಲು ಪದವಿ ಪಡೆಯುವ ಸಂದರ್ಭದಲ್ಲಿಯೇ ಕೌಶಲ್ಯ ಕಲಿಸಿದರೆ ಗುಣಮಟ್ಟ ಹೆಚ್ಚಾಗಲಿದೆ. ಇದಕ್ಕೆ ನೂತನ ಶಿಕ್ಷಣ ನೀತಿ ಒತ್ತಾಸೆಯಾಗಿ ನಿಲ್ಲಲಿದೆ. ಅಲ್ಲದೇ ಪದವೀಧರನಿಗೆ ಇಂಟರ್ನ್​ಶಿಪ್ ವೇಳೆಯೇ ತನ್ನ ಸ್ಥಿತಿ ಏನು, ತನ್ನ ಕ್ರಿಯಾಶೀಲನೆ ಎಷ್ಟಿದೆ, ಹೇಗೆ ಸಾಮರ್ಥ್ಯ ವೃದ್ಧಿಸಿಕೊಳ್ಳಬೇಕೆಂಬುದರ ಅರಿವಾಗುತ್ತದೆ.
• ‘ವರ್ಕ್ ಫ್ರಂ ಹೋಂ’ ಕಲ್ಚರ್ ಹೆಚ್ಚಾಗುತ್ತಿದೆ. ಫಿಸಿಕಲ್ ವರ್ಲ್ಡ್​ನಿಂದ ವರ್ಚುವಲ್ ವರ್ಲ್ಡ್​ಗೆ ಬದಲಾಗುತ್ತಿದೆ. ಇದರಿಂದ ಸಾಕಷ್ಟು ಅನುಕೂಲವಾಗಿದೆ.
• ಹಾರ್ಡ್​ವೇರ್ ಉತ್ಪಾದನೆಗೆ ಒತ್ತು ಕೊಡಲಾಗಿದೆ. ಚಿಪ್ ಡಿಸೈನಿಂಗ್​ನಲ್ಲಿ ಶೇ.90 ನಮ್ಮದೇ ಪಾಲಿದೆ. ಆದರೆ, ಉತ್ಪಾದನೆ ಅಷ್ಟಾಗಿಲ್ಲ. ಇಎಸ್​ಡಿಎಂ ಪಾಲಿಸಿ ತಂದಿದ್ದು, ಈ ಕ್ಷೇತ್ರದಲ್ಲಿ ಉದ್ಯಮ ಆರಂಭಿಸುವವರಿಗೆ ಕೇಂದ್ರ ಮತ್ತು ರಾಜ್ಯ ಸರ್ಕಾರದಿಂದ ದೊಡ್ಡಮಟ್ಟದಲ್ಲಿ ಭರಪೂರ ವಿನಾಯಿತಿ, ರಿಯಾಯಿತಿ ನೀಡಲಾಗುತ್ತಿದೆ. ವಿವಿಧ ಕಂಪನಿಗಳು ಹೂಡಿಕೆಗೆ ಉತ್ಸುಕವಾಗಿದ್ದು ಮಾತುಕತೆ ನಡೆಯುತ್ತಿದೆ.

ಶ್ವೇತಪತ್ರಕ್ಕಾಗಿ ಕಾರ್ಯಪಡೆ

ಜಾಗತಿಕ ನಕ್ಷೆಯಲ್ಲಿ ‘ಬೆಂಗಳೂರು ಬ್ರ್ಯಾಂಡ್’ ಅಚ್ಚೊತ್ತಿ, ಪ್ರತಿಷ್ಠೆ-ಕೀರ್ತಿ ಹೆಚ್ಚಿಸಿದ ಮಾಹಿತಿ- ತಂತ್ರಜ್ಞಾನ ಕ್ಷೇತ್ರದ ಸಾಧಕ-ಬಾಧಕ ಸ್ಥೂಲ ವಿಮರ್ಶೆಗೆ ರಾಜ್ಯ ಸರ್ಕಾರ ಮುಂದಾಗಿದ್ದು, ಈ ಬಗ್ಗೆ ಶ್ವೇತಪತ್ರವನ್ನು ಹೊರಡಿಸಲು ನಿರ್ಧರಿಸಿದೆ. ಮಹತ್ವದ ಈ ಜವಾಬ್ದಾರಿ ನಿರ್ವಹಣೆಗಾಗಿ ‘ಬಿಯಾಂಡ್ ಬೆಂಗಳೂರು ಕಾರ್ಯಪಡೆ’ಯನ್ನು ರಚಿಸಿದ್ದು, ತಜ್ಞರಾದ ಬಿ.ವಿ.ನಾಯ್ಡು, ಪ್ರಶಾಂತ್ ಪ್ರಕಾಶ್, ಸಡಗೋಪನ್, ಕೆ.ಎಸ್.ವಿಶ್ವನಾಥನ್ ಮತ್ತು ಶ್ರೀಧರ ಮಿತ್ತಾ ಅವರನ್ನು ಒಳಗೊಂಡಿದೆ.

ಅಮೆರಿಕದ ಪರಿಣಾಮವಿಲ್ಲ

ಟ್ರಂಪ್ ಇರಲಿ, ಬೈಡೆನ್ ಇರಲಿ. ಅಮೆರಿಕದ ಅಧಿಕಾರ ಕೇಂದ್ರ ಬದಲಾವಣೆಯಿಂದ ನಮ್ಮ ಮೇಲೆ ಪರಿಣಾಮ ಬೀರಲ್ಲ. ಇದು ಸ್ಪರ್ಧಾತ್ಮಕ ಜಗತ್ತು. ಅವರ ಅವಶ್ಯಕತೆ ಅವರು ಪೂರೈಸಿಕೊಳ್ಳುತ್ತಾರೆ, ನಮ್ಮ ಅವಶ್ಯಕತೆಗೆ ನಾವು ಪ್ರಯತ್ನಿಸುತ್ತೇವೆ. ಟ್ರಂಪ್ ಕಾಲದಲ್ಲಿ ಹಲವು ನಿಬಂಧನೆ ಹಾಕಿದ್ದರು, ಆದರೂ ಉದ್ಯೋಗ ಸಂಖ್ಯೆ ಹೆಚ್ಚಾಗಿಯೇ ಲಭ್ಯವಾಯಿತು. ವಹಿವಾಟು ಕೂಡ ಕಡಿಮೆ ಆಗಿಲ್ಲ. ಚೀನಾ, ಕೊರಿಯಾ ಕೂಡ ಸದ್ಯ ನಮ್ಮ ಜತೆ ಸ್ಪರ್ಧೆಯಲ್ಲಿಲ್ಲ.