ಹಸನಾಗದ ಪರಿಶಿಷ್ಟರ ಬದುಕು: ಎಸ್​ಸಿಎಸ್​ಪಿ, ಟಿಎಸ್​ಪಿ ತಂದರೂ ಅಭಿವೃದ್ಧಿಯ ಕಂದಕ ಕಡಿಮೆಯಾಗಿಲ್ಲ..

| ರುದ್ರಣ್ಣ ಹರ್ತಿಕೋಟೆ ಬೆಂಗಳೂರು

ರಾಜ್ಯ ಸರ್ಕಾರ ಪರಿಶಿಷ್ಟರ ಅಭ್ಯುದಯಕ್ಕಾಗಿ ರೂಪಿಸಿದ ಪರಿಶಿಷ್ಟ ಜಾತಿ ಮತ್ತು ವರ್ಗಗಳ ಉಪ ಯೋಜನೆಯಡಿ ಒಂಭತ್ತು ವರ್ಷಗಳಲ್ಲಿ 1.31 ಲಕ್ಷ ಕೋಟಿ ರೂ. ವೆಚ್ಚವಾಗಿದ್ದರೂ ಅವರ ಬದುಕು ಹಸನಾಗಿಲ್ಲ. ಆದ್ದರಿಂದಲೇ ಈ ವರ್ಗಗಳಿಗೆ ಏನು ಬೇಕಾಗಿದೆ ಎಂಬ ಸಮೀಕ್ಷೆಗೆ ಮುಂದಾಗಿದೆ.

ಆಂಧ್ರಪ್ರದೇಶದ ಮಾದರಿಯಲ್ಲಿ 2014ರಲ್ಲಿ ಉಪಯೋಜನೆಯ ಕಾಯ್ದೆ ರೂಪಿಸಲಾಯಿತು. ಆ ವರ್ಗಗಳಿಗೆ ಜನಸಂಖ್ಯೆಯ ಆಧಾರದಲ್ಲಿ ಶೇ. 24.1 ರಷ್ಟು ಅನುದಾನ ವೆಚ್ಚ ಮಾಡಬೇಕು, ಹಣವನ್ನು ಬೇರೆ ಉದ್ದೇಶಕ್ಕೆ ಬಳಸುವಂತಿಲ್ಲವೆಂಬುದು ಉದ್ದೇಶವಾಗಿತ್ತು. ಅದರಂತೆ ಈವರೆಗೆ ಹಣ ಹೇರಳವಾಗಿ ವೆಚ್ಚ ಆಗಿದೆ. ಆದರೆ ಉದ್ದೇಶ ಮಾತ್ರ ಈಡೇರಿಲ್ಲ. ಮೇಲ್ಜಾತಿಗಳಿಗೆ ಹೋಲಿಸಿದರೆ ಅಭಿವೃದ್ಧಿಯ ಕಂದಕ ಹಾಗೆಯೇ ಮುಂದುವರಿದಿದೆ.

ರಾಜ್ಯ ಸರ್ಕಾರ 2014 ರಿಂದ 1.61 ಲಕ್ಷ ಕೋಟಿ ರೂ.ಗಳನ್ನು ಮಂಜೂರು ಮಾಡಿದೆ. ಅದರಲ್ಲಿ 1.36 ಲಕ್ಷ ಕೋಟಿ ರೂ.ಗಳನ್ನು ಬಿಡುಗಡೆ ಸಹ ಮಾಡಿದೆ. ಅದರಲ್ಲಿ 1.32 ಲಕ್ಷ ಕೋಟಿ ರೂಪಾಯಿಗಳು ಖರ್ಚಾಗಿವೆ. ಆದರೆ ತಲುಪಬೇಕಾದ ಕಡೆ ತಲುಪಿಲ್ಲ ಅಷ್ಟೇ. ಇಷ್ಟು ದೊಡ್ಡ ಮೊತ್ತ ಖರ್ಚಾಗಿದ್ದರೆ ಸಾಕಷ್ಟು ಅಭಿವೃದ್ಧಿ ಕಾರ್ಯವನ್ನು ಕೈಗೊಳ್ಳಲು ಅವಕಾಶವಿತ್ತು. ಆದರೆ, ಆ ಕೆಲಸ ಆಗಿಲ್ಲ. ಯೋಜನೆಯ ಸದುದ್ದೇಶವೇ ಪರಿಶಿಷ್ಟರ ಬದುಕು ಅಭಿವೃದ್ದಿಯಾಗಬೇಕು ಎಂಬುದಾಗಿತ್ತು.

ಪರಿವರ್ತನೆ: ಎಸ್​ಸಿಎಸ್​ಪಿ ಮತ್ತು ಟಿಎಸ್​ಪಿ ಉಪ ಯೋಜನೆಯ ಕಲಂ 7ಡಿ ಅನ್ವಯ ಸರ್ಕಾರ ಇಚ್ಛಿಸಿದ ಯಾವುದೇ ಕಾಮಗಾರಿಯನ್ನು ಶೇ.6ರಷ್ಟು ಮೊತ್ತದಲ್ಲಿ ಕೈಗೊಳ್ಳಲು ಅವಕಾಶ ಇದೆ. ಅದನ್ನೇ ದುರುಪಯೋಗ ಮಾಡಿಕೊಂಡು ಲೋಕೋಪಯೋಗಿ, ಜಲ ಸಂಪನ್ಮೂಲ, ರಸ್ತೆ ನಿರ್ವಣ, ಕಟ್ಟಡ, ಗ್ರಾಮೀಣಾಭಿವೃದ್ಧಿಯಲ್ಲಿ ನಿರ್ವಣಕ್ಕೆ ಬಳಕೆ ಮಾಡಲಾಗುತ್ತಿದೆ. ಇದರಿಂದ ಪರಿಶಿಷ್ಟರಿಗೆ ಅನುಕೂಲವೇನು ಎಂಬ ಪ್ರಶ್ನೆ ಎದುರಾಗಿದೆ. ಆದ್ದರಿಂದಲೇ 7ಡಿ ಕಲಂ ರದ್ದು ಮಾಡುವಂತೆ ಒತ್ತಡ ಇದೆ. ಸರ್ಕಾರ ಈ ಬಗ್ಗೆ ಸದ್ಯದಲ್ಲಿಯೇ ನಿರ್ಧಾರ ಕೈಗೊಳ್ಳಲಿದೆ.

ಸೌಲಭ್ಯ ಮರೀಚಿಕೆ: ಲಭ್ಯ ಮಾಹಿತಿಯ ಪ್ರಕಾರ ದಲಿತ ಸಮುದಾಯದಲ್ಲಿ ಅಂದಾಜು 5 ಲಕ್ಷ ಕುಟುಂಬಗಳಿಗೆ ಸ್ವಂತ ಸೂರೇ ಇಲ್ಲ. ಇನ್ನೂ ಅನೇಕ ಕುಟುಂಬಗಳ ಮನೆಗೆ ವಿದ್ಯುತ್ ಸೌಲಭ್ಯವಿಲ್ಲ. ಶಿಕ್ಷಣ ಮರೀಚಿಕೆಯಾಗಿದೆ.

ಪರಿಶಿಷ್ಟರು ಹೆಚ್ಚಿರುವ ಜಿಲ್ಲೆಗಳು: ಚಿತ್ರದುರ್ಗ, ರಾಯಚೂರು, ಬಳ್ಳಾರಿ, ಚಿಕ್ಕಬಳ್ಳಾಪುರ, ಬೀದರ್, ಚಾಮರಾಜನಗರ, ಯಾದಗಿರಿ, ಕೋಲಾರ, ದಾವಣಗೆರೆ, ಕೊಪ್ಪಳ, ಮೈಸೂರು, ಕಲಬುರಗಿ, ಬೆಂಗಳೂರು ಗ್ರಾಮಾಂತರ, ತುಮಕೂರು, ಚಿಕ್ಕಮಗಳೂರು, ವಿಜಯನಗರ

• ಅಭಿವೃದ್ಧಿಯ ಅಂತರಗಳನ್ನು ಕಡಿಮೆ ಮಾಡಬೇಕು 
• ಅನ್ಯ ಇಲಾಖೆಗೆ ಬಳಸಲು ಅವಕಾಶ ಇರುವ ಕಲಂ 7ಡಿ ತೆಗೆಯಬೇಕು
• ವೆಚ್ಚದಲ್ಲಿ ಪಾರದರ್ಶಕತೆ ತರಬೇಕು
• ದಲಿತ ಸಮುದಾಯದ ಮೂಲಸೌಕರ್ಯಕ್ಕೆ ಒತ್ತು ನೀಡಬೇಕು
• ಸ್ವ ಉದ್ಯೋಗದ ಅವಕಾಶ ಕಲ್ಪಿಸುವ ಕಡೆ ಗಮನ ಹರಿಸಬೇಕು
• ಶಿಕ್ಷಣ, ಕೌಶಲಾಭಿವೃದ್ಧಿಗೆ ಆದ್ಯತೆ ಕೊಡಬೇಕು
• ಐಟಿ, ಬಿಟಿ ಕಂಪನಿಗಳು, ಸ್ಟಾರ್ಟಪ್​ಗಳ ಸ್ಥಾಪನೆಗೆ ನೆರವು
• ಎಸ್​ಸಿಎಸ್​ಟಿ ಸಮುದಾಯದ ಅಭಿವೃದ್ಧಿ ನಿಗಮಗಳಿಗೆ ಹೆಚ್ಚಿನ ಅನುದಾನ ನೀಡಬೇಕು
• ಭೂ ಒಡೆತನ ಯೋಜನೆಯನ್ನು ಈ ವರ್ಗಗಳಿಗೆ ರೂಪಿಸಬೇಕು
• ಅಪೌಷ್ಠಿಕತೆ ನಿವಾರಣೆಗೆ ಹೆಚ್ಚಿನ ಯೋಜನೆ ರೂಪುಗೊಳ್ಳಬೇಕು
• ಶಿಕ್ಷಣಕ್ಕೆ ಒತ್ತು ದೊರಕಬೇಕು
• ಸಮಾಜ ಕಲ್ಯಾಣ ಇಲಾಖೆ ಹೆಚ್ಚು ಜವಾಬ್ದಾರಿ ತೆಗೆದುಕೊಳ್ಳಬೇಕು
• ಯೋಜನಾ ಇಲಾಖೆ ಯೋಜನೆಗಳ ಪರಾಮರ್ಶೆ ಮಾಡಬೇಕು

https://www.vijayavani.net/wife-lost-life-after-trapped-into-tractor-blades-which-was-run-driven-by-husband/

https://www.vijayavani.net/uidai-released-another-press-release-regarding-sharing-of-aadhaar-photocopy/