'ಶೂನ್ಯದಿಂದ 4.5ಲಕ್ಷದವರೆಗೆ...' -ಇದು ಭಾರತದ ಇಚ್ಛಾಶಕ್ತಿ

ನವದೆಹಲಿ: ಕೊವಿಡ್​-19 ಸೋಂಕು ಸ್ಥಳೀಯ ಉತ್ಪನ್ನಗಳ ಮಹತ್ವ ತಿಳಿಸಿದೆ ಎಂದು ಮೇ 12ರಂದು ದೇಶವನ್ನು ಉದ್ದೇಶಿಸಿ ಮಾತನಾಡಿದ ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಹೇಳಿದ್ದರು.

ಅಷ್ಟೇ ಅಲ್ಲ, ಕೊವಿಡ್​ ಪ್ರಾರಂಭವಾದಾಗ ಭಾರತದಲ್ಲಿ ಒಂದೇ ಒಂದು ಪಿಪಿಇ ಕಿಟ್​ (ವೈಯಕ್ತಿಕ ರಕ್ಷಣಾ ಸಲಕರಣೆ) ಗಳು ತಯಾರಾಗುತ್ತಿರಲಿಲ್ಲ. ಇದೀಗ ದಿನವೊಂದಕ್ಕೆ 2 ಲಕ್ಷಕ್ಕೂ ಅಧಿಕ ಪಿಪಿಇ ಕಿಟ್​ಗಳು ಭಾರತದಲ್ಲಿ ಸಿದ್ಧಗೊಳ್ಳುತ್ತಿವೆ. ಇದು ಹೆಮ್ಮೆಯ ವಿಷಯ ಎಂದು ಹೇಳಿದ್ದರು.

ಭಾರತದಲ್ಲಿ ಕೊವಿಡ್​ ವಾರಿಯರ್ಸ್​ಗೆ ಅಗತ್ಯವಾಗಿರುವ ವೈಯಕ್ತಿಕ ರಕ್ಷಣಾ ಸಲಕರಣೆಗಳು ಈಗ ದಿನವೊಂದಕ್ಕೆ 4.5 ಲಕ್ಷದಷ್ಟು ತಯಾರಾಗುತ್ತಿವೆ. ಎರಡೇ ವಾರದಲ್ಲಿ ಪಿಪಿಇ ಕಿಟ್​ಗಳ ತಯಾರಿಕೆ ಸಂಖ್ಯೆ ದ್ವಿಗುಣಗೊಂಡಿದೆ. ಕೇಂದ್ರ ಸಚಿವೆ ಸ್ಮೃತಿ ಇರಾನಿ ಅವರು ಟ್ವಿಟರ್​ನಲ್ಲಿ ಈ ವಿಷಯವನ್ನು ತಿಳಿಸಿದ್ದಾರೆ.

ಇದನ್ನೂ ಓದಿ: ಮಲಗಿದ್ದ ಮನೆಯೊಡೆಯನ ಮುಖದ ಮೇಲೆ ಹೊಡೆದ ಬೆಕ್ಕು…; ಆತ ಎಚ್ಚರಗೊಳ್ಳದೆ ಇದ್ದರೆ ಅವನ ಇಡೀ ಕುಟುಂಬ ಸಾಯುತ್ತಿತ್ತು..!

ದೇಶದಲ್ಲಿ ಈಗ 600ಕ್ಕೂ ಹೆಚ್ಚು ಕಂಪನಿಗಳು ಪಿಪಿಇ ಕಿಟ್​ ತಯಾರಿಕೆಗೆ ಪ್ರಮಾಣೀಕರಿಸಲ್ಪಟ್ಟಿವೆ. ದಿನವೊಂದಕ್ಕೆ 4.5ಲಕ್ಷ ವೈಯಕ್ತಿಕ ರಕ್ಷಣಾ ಸಲಕರಣೆಗಳು ಉತ್ಪಾದನೆಯಾಗುತ್ತವೆ. ಕೊವಿಡ್​-19 ಭಾರತಕ್ಕೆ ಕಾಲಿಟ್ಟ ಸಂದರ್ಭದಲ್ಲಿ ಒಂದೇ ಒಂದು ಕಿಟ್​ ಕೂಡ ತಯಾರಾಗುತ್ತಿರಲಿಲ್ಲ. ಮೇ 5ರ ಹೊತ್ತಿಗೆ ದಿನಕ್ಕೆ 2.06 ಲಕ್ಷ ಪಿಪಿಇ ಕಿಟ್​ಗಳು ಸಿದ್ಧವಾಗುತ್ತಿದ್ದವು ಎಂದು ತಿಳಿಸಿದ್ದಾರೆ.

ಕರೊನಾ ಕಾಲಿಡುವುದಕ್ಕೂ ಮೊದಲು ಪಿಪಿಇ ಕಿಟ್​ಗಳನ್ನು ಆಮದು ಮಾಡಿಕೊಳ್ಳಲಾಗುತ್ತಿತ್ತು. ಆದರೆ ಕೊವಿಡ್​-19 ಶುರುವಾಗಿ ಎರಡೇ ತಿಂಗಳಲ್ಲಿ ದಿನವೊಂದಕ್ಕೆ 4 ಲಕ್ಷಕ್ಕೂ ಅಧಿಕ ಪಿಪಿಇ ಕಿಟ್​ಗಳು ಉತ್ಪಾದನೆಯಾಗುತ್ತಿದೆ.

ಮಾಸ್ಕ್​, ಕಣ್ಣು ರಕ್ಷಣಾ ಕವಚ, ಶೂ ಕವರ್​, ಗೌನ್​ ಮತ್ತು ಕೈಗವಸುಗಳನ್ನು ಪಿಪಿಇ ಕಿಟ್​ ಒಳಗೊಂಡಿರುತ್ತದೆ. ಕರೊನಾ ರೋಗಿಗಳಿಗೆ ಚಿಕಿತ್ಸೆ ನೀಡುವ ಆರೋಗ್ಯ ಕಾರ್ಯಕರ್ತರಿಗೆ ಇದು ಬೇಕೇಬೇಕು. ಇಲ್ಲದಿದ್ದರೆ ಸೋಂಕು ತಗುಲುವ ಸಾಧ್ಯತೆ ಅತಿ ಹೆಚ್ಚಾಗಿ ಇರುತ್ತದೆ.

ಎರಡು ವಾರಗಳ ಹಿಂದೆ ಕೇವಲ 52 ಕಂಪನಿಗಳು ಪಿಪಿಇ ಕಿಟ್​ ತಯಾರಿಸುತ್ತಿದ್ದವು. ಅದೀಗ 600ಕ್ಕೆ ಏರಿದೆ. (ಏಜೆನ್ಸೀಸ್​)

ಇದನ್ನೂ ಓದಿ: ಉಡುಪಿ ಐವರಲ್ಲಿ ಕರೊನಾ ಪಾಸಿಟಿವ್