Noise Pollution: ಹಬ್ಬ-ಹರಿದಿನಗಳಲ್ಲಿ ಡಿಜೆ, ಧ್ವನಿವರ್ಧಕ, ಪಟಾಕಿಗಳ ಸದ್ದು ಜೋರಾಗೋದು ಸಾಮಾನ್ಯ. ಆದ್ರೆ ವಾಹನಗಳ ಹಾರ್ನ್, ಟ್ರಾಫಿಕ್, ಕಟ್ಟಡ ಕಾಮಗಾರಿ ಹಾಗೂ ಜೋರಾಗಿ ಇಯರ್‌ಫೋನ್ ಬಳಸೋದ್ರಿಂದ ನಗರಗಳಲ್ಲಿ ವರ್ಷವಿಡೀ ಶಬ್ದ ಮಾಲಿನ್ಯ ಹೆಚ್ಚಾಗ್ತಿದೆ. ಇದರಿಂದ ಕಿವಿ ಮಾತ್ರವಲ್ಲ, ನಿದ್ದೆ, ಒತ್ತಡ, ಹೃದಯದ ಆರೋಗ್ಯ ಹಾಗೂ ಏಕಾಗ್ರತೆ ಮೇಲೂ ಪರಿಣಾಮ ಬೀರಬಹುದು ಅಂತ ತಜ್ಞರು ಎಚ್ಚರಿಸಿದ್ದಾರೆ.
85 ಡೆಸಿಬಲ್‌ಗಿಂತ ಹೆಚ್ಚಿನ ಶಬ್ದಕ್ಕೆ ದೀರ್ಘಕಾಲ ಒಡ್ಡಿಕೊಂಡ್ರೆ ಒಳಕಿವಿಯ ಸೂಕ್ಷ್ಮ ಕೋಶಗಳು ಹಾನಿಯಾಗಿ, ಶ್ರವಣ ಶಕ್ತಿ ಶಾಶ್ವತವಾಗಿ ಕುಂಠಿತವಾಗಬಹುದು. ಕಿವಿಯಲ್ಲಿ ಗುಂಯ್ ಶಬ್ದ, ಕೇಳಿಸೋದು ಕಡಿಮೆಯಾಗೋದು ಹಾಗೂ ಕಿವಿ ಬ್ಲಾಕ್ ಆಗೋದು ಸೇರಿದಂತೆ ಹಲವು ಸಮಸ್ಯೆಗಳು ಎದುರಾಗಬಹುದು.
ಶಬ್ದದಿಂದ ನಿದ್ದೆಗೆ ಭಂಗ, ಒತ್ತಡ
ನಿರಂತರ ಶಬ್ದದಿಂದ ಒತ್ತಡ, ಕಿರಿಕಿರಿ, ಆತಂಕ ಹಾಗೂ ಆಯಾಸ ಹೆಚ್ಚಾಗಬಹುದು. ರಾತ್ರಿ ಶಬ್ದದಿಂದ ನಿದ್ದೆ ಪದೇಪದೇ ಅಡ್ಡಿಯಾದ್ರೆ ನಿದ್ದೆ ಚಕ್ರಕ್ಕೆ ತೊಂದರೆಯಾಗಿ ಮರುದಿನ ಸುಸ್ತು ಹೆಚ್ಚಾಗಬಹುದು. ದೀರ್ಘಕಾಲದ ಶಬ್ದ ಮಾಲಿನ್ಯ ರಕ್ತದೊತ್ತಡ ಮತ್ತು ಹೃದಯ ಸಂಬಂಧಿತ ಸಮಸ್ಯೆಗಳ ಅಪಾಯವನ್ನೂ ಹೆಚ್ಚಿಸಬಹುದು.
