ಲಸಿಕೆ ನೋಂದಣಿ ಸೋಗಿನಲ್ಲಿ ಸೈಬರ್ ಕಳ್ಳರ ಬಲೆ: ಮೊಬೈಲ್​​​ಗೆ ನಕಲಿ ಲಿಂಕ್, ಅಪ್ಲಿಕೇಷನ್ ಕಳುಹಿಸುತ್ತಿರುವ ವಂಚಕರು; ಯಾಮಾರಿದರೆ ಖಾತೆಗೆ ಕನ್ನ!

| ಗೋವಿಂದರಾಜು ಚಿನ್ನಕುರ್ಚಿ ಬೆಂಗಳೂರು

ಮಹಾಮಾರಿ ಕರೊನಾ ಸೋಂಕು ನಿಮೂಲನೆಗೆ ಕೇಂದ್ರ ಸರ್ಕಾರ ಲಸಿಕೆ ಉತ್ಸವ ಘೋಷಣೆ ಮಾಡಿದ ಬೆನ್ನಲ್ಲಿಯೇ ಸೈಬರ್ ಕಳ್ಳರು, ಕೋವಿಡ್ ಲಸಿಕೆ ನೋಂದಣಿ ಸೋಗಲ್ಲಿ ವಂಚನೆಗೆ ಬಲೆಬೀಸಿದ್ದಾರೆ. ಮೊಬೈಲ್​ಗೆ ಲಿಂಕ್ ಮತ್ತು ಆಪ್ ಕಳುಹಿಸುತ್ತಿದ್ದು, ಸ್ವಲ್ಪ ಯಾಮಾರಿದರೂ ಬ್ಯಾಂಕ್ ಖಾತೆಗೆ ಕನ್ನ ಬೀಳಲಿದೆ ಎಂದು ಕೇಂದ್ರ ಸೈಬರ್ ಭದ್ರತಾ ಸಚಿವಾಲಯ ಎಚ್ಚರಿಸಿದೆ.

ಕೋವಿಡ್-19 ಎರಡನೇ ಎಲ್ಲೆಡೆ ವ್ಯಾಪಿಸಿರುವುದಕ್ಕೆ ಬ್ರೇಕ್ ಹಾಕಲು ಕೇಂದ್ರ ಸರ್ಕಾರ ಹಲವು ಯೋಜನೆ ಕೈಗೊಂಡಿದೆ. 18 ವರ್ಷ ಮೇಲ್ಪಟ್ಟವರಿಗೆ ಲಸಿಕೆ ನೀಡುವುದು ಅದರಲ್ಲಿ ಪ್ರಮುಖವಾಗಿದೆ. ದೇಶದ ಒಟ್ಟಾರೆ ಜನಸಂಖ್ಯೆಯಲ್ಲಿ ಶೇ.80 ಮಂದಿ ಇದರಡಿ ಬರುತ್ತಾರೆ. ಅದಕ್ಕಾಗಿ ಲಸಿಕೆ ಪಡೆಯಲು ನೋಂದಣಿಗೆ ಆನ್​ಲೈನ್ ಸೇವೆ ಒದಗಿಸಿದೆ. ನೋಂದಣಿ ಮಾಡಿಕೊಂಡ ವ್ಯಕ್ತಿಗೆ ದಿನಾಂಕ, ಸಮಯ ಮತ್ತು ಲಸಿಕಾ ಕೇಂದ್ರದ ವಿಳಾಸ ಸಹ ಲಭ್ಯವಾಗಲಿದೆ. ಆ ಸಮಯಕ್ಕೆ ತೆರಳಿ ಲಸಿಕೆ ಪಡೆದು ಸುರಕ್ಷಿತವಾಗಿ ಮನೆಗೆ ಬರುವಂತಹ ಯೋಜನೆ ಇದಾಗಿದೆ. ಲಸಿಕಾ ಕೇಂದ್ರದ ಬಳಿಕೆಗೆ ಹೋಗಿ ಗೊಂದಲಕ್ಕೆ ಒಳಗಾಗುವುದು ಬೇಡ ಎಂಬುದು ಇದರ ಉದ್ದೇಶವಾಗಿದೆ.

ಅದಕ್ಕಾಗಿ ಅಧಿಕೃತ ವೆಬ್​ಸೈಟ್, ಪೋರ್ಟಲ್​ಗಳನ್ನು ಪರಿಚಯಿಸಲಾಗಿದೆ. ಆದರೆ ಸೈಬರ್ ಖದೀಮರು, ಮೊಬೈಲ್ ಮತ್ತು ಕಂಪ್ಯೂಟರ್ ಡೇಟಾ ಕಳವು ಮಾಡುವ ಹಾಗೂ ಬ್ಯಾಂಕ್ ಖಾತೆಗೆ ಕನ್ನ ಹಾಕುವ ನೂರಾರು ಲಿಂಕ್ ಮತ್ತು ಆಪ್​ಗಳನ್ನು ಗೂಗಲ್​ನಲ್ಲಿ ಅಪ್​ಲೋಡ್ ಮಾಡಿದ್ದಾರೆ. ಮೊಬೈಲ್ ನಂಬರ್​ಗೆ ಸಂದೇಶ ಅಥವಾ ವಾಟ್ಸ್​ಆಪ್ ಎಸ್​ಎಂಎಸ್ ಬರಲಿವೆ. ಅದರಲ್ಲಿಯೂ ಈ ಎಲ್ಲ ಆಪ್ ಮತ್ತು ಲಿಂಕ್​ಗಳು ಕೋವಿಡ್-19 ಲಸಿಕೆ ನೋಂದಣಿಗೆ ಕೇಂದ್ರ ಸರ್ಕಾರ ಪರಿಚಯಿಸಿರುವ ಮಾದರಿಯಲ್ಲಿ ಇರಲಿವೆ. ಸ್ವಲ್ಪ ವ್ಯತ್ಯಾಸ ಇರಲಿದ್ದು, ಸಾಮಾನ್ಯರಿಗೆ ಬಹುಬೇಗ ಗೊತ್ತಾಗುವುದಿಲ್ಲ.

ಯಾವ ರೀತಿ ಖಾತೆಗೆ ಕನ್ನ?: ಮೊಬೈಲ್​ಗೆ ಸಂದೇಶದ ಜತೆಗೆ ಲಿಂಕ್ ಬರಲಿದೆ. ಅದರ ಮೇಲೆ ಕ್ಲಿಕ್ ಮಾಡಿದಾಗ ಅಪ್ಲಿಕೇಷನ್ ಡೌನ್​ಲೋಡ್ ಆಗಲಿದೆ. ಆನಂತರ ಹೆಸರು, ವಿಳಾಸ, ಆಧಾರ್ ನಂಬರ್, ಬ್ಯಾಂಕ್ ಖಾತೆ ವಿವರ, ಕ್ರೆಡಿಟ್, ಡೆಬಿಟ್ ಕಾರ್ಡ್ ನಂಬರ್ ಕೇಳಲಿದೆ. ಇಷ್ಟು ಭರ್ತಿ ಮಾಡಿದ ಮೇಲೆ ಒಟಿಪಿ ಬರಲಿದ್ದು, ಅದನ್ನು ಲಿಂಕ್​ನಲ್ಲಿ ನೋಂದಣಿ ಮಾಡಿದಾಗ ಬ್ಯಾಂಕ್ ಖಾತೆಗೆ ಕನ್ನ ಬೀಳಲಿದೆ. ಇನ್ನೂ ಕೆಲವರ ಮೊಬೈಲ್, ಕಂಪ್ಯೂಟರ್​ನಲ್ಲಿನ ಡೇಟಾ, ಫೋಟೋ, ಮೊಬೈಲ್ ನಂಬರ್​ಗೂ ಕನ್ನ ಬೀಳಲಿದೆ.

ಇಂಜಕ್ಷನ್, ಆಕ್ಸಿಜನ್ ಸೋಗಲ್ಲೂ ವಂಚನೆ: ಆಮ್ಲಜನಕ, ರೆಮ್ೆಸಿವಿರ್, ಐಸಿಯು ಬೆಡ್ ಕೊಡಿಸುವ ನೂರಾರು ಅನಾಮಧೇಯ ಹೆಲ್ಪ್ ಲೈನ್ ನಂಬರ್ ವಾಟ್ಸ್ ಆಪ್ ಮತ್ತು ಸಂದೇಶಗಳು ವೈರಲ್ ಆಗುತ್ತಿವೆ. ಇದರಲ್ಲಿ ಯಾವುದೇ ಅಸಲಿ, ಯಾವುದು ನಕಲಿ ಎಂಬುದು ಗೊತ್ತಾಗುತ್ತಿಲ್ಲ. ಮಹಿಳಾ ಪೊಲೀಸ್​ಗೆ ಆಮ್ಲಜನಕ ಸಿಲಿಂಡರ್ ಕೊಡಿಸುವ ನೆಪದಲ್ಲಿ 9 ಸಾವಿರ ರೂ. ಪಡೆದು ವಂಚನೆ ಮಾಡಿದ್ದರು. ಐಸಿಯು ಬೆಡ್ ಕೊಡಿಸುವ ಸೋಗಲ್ಲಿ ಹಲವರಿಗೆ ಸೈಬರ್ ಕಳ್ಳರು ವೋಸ ಮಾಡುತ್ತಿದ್ದಾರೆ.

ಕರೊನಾ ಲಸಿಕೆ ನೋಂದಣಿ ವೇಳೆ ಎಚ್ಚರ ಇರಲಿ

• ಕೋವಿಡ್ ಲಸಿಕೆ ಕುರಿತು ಅಪರಿಚಿತ ಲಿಂಕ್, ಅಪ್ಲಿಕೇಷನ್ ಬಂದರೆ ಸ್ವೀಕರಿಸಬೇಡಿ
• ಲಸಿಕೆ ನೆಪದಲ್ಲಿ ಇಮೇಲ್, ಫೋನ್ ಕಾಲ್, ಸಂದೇಶ ಕಳುಹಿಸಿ ಮಾಹಿತಿ ಕೇಳಿದರೆ ನಿರಾಕರಿಸಿ
• ಆಧಾರ್, ಬ್ಯಾಂಕ್, ಕ್ರೆಡಿಟ್, ಡೆಬಿಟ್ ಕಾರ್ಡ್, ಒಟಿಪಿ, ಪಿನ್ ನಂಬರ್ ಕೊಡಬೇಡಿ
• ಅನುಮಾನಾಸ್ಪದ ಸಂದೇಶ, ಲಿಂಕ್, ಅಪ್ಲಿಕೇಷನ್​ಗಳನ್ನು ಫಾರ್ವಡ್ ಮಾಡಬೇಡಿ
• ಕೇಂದ್ರ, ಸರ್ಕಾರ ಸರ್ಕಾರದ ಅಧಿಕೃತ ವೆಬ್​ಸೈಟ್​ನಲ್ಲಿಯೇ ನೋಂದಣಿ ಮಾಡಿಕೊಳ್ಳಿ

ಆನ್​ಲೈನ್, ಕಾಳಸಂತೆಯಲ್ಲಿ ರೆಮ್​ಸಿವಿರ್, ಬೆಡ್, ಅಮ್ಲಜನಕ, ಲಸಿಕೆ ಹೆಸರಿನಲ್ಲಿ ವಂಚನೆ ಮಾಡುವರ ಬಗ್ಗೆ ಎಚ್ಚರಿಕೆ ಇರಲಿ. ಇವರ ಬಗ್ಗೆ ಸ್ಥಳೀಯ ಪೊಲೀಸರಿಗೆ ಅಥವಾ ಸಿಸಿಬಿಗೆ ಮಾಹಿತಿ ನೀಡಿ ಸಹಕರಿಸಿ. | ಸಂದೀಪ್ ಪಾಟೀಲ್ ಜಂಟಿ ಪೊಲೀಸ್ ಆಯುಕ್ತ (ಅಪರಾಧ)

https://www.vijayavani.net/wife-died-after-hearing-the-death-news-of-husband/

https://www.vijayavani.net/both-sons-died-2-days-after-the-death-of-mother-all-three-lost-life-due-to-corona/