ನಾಲ್ವರು ಆರೋಪಿಗಳ ಬಂಧನ

ಕೋಲಾರ: ನಗರದ ಕೀಲುಕೋಟೆ ಬಡಾವಣೆಯಲ್ಲಿರುವ ಸತ್ಯನಾರಾಯಣಸ್ವಾಮಿ ದೇಗುಲದಲ್ಲಿ ನಡೆದಿದ್ದ ಕಳವು ಪ್ರಕರಣಕ್ಕೆ ಸಂಬಂಧಿಸಿದಂತೆ ನಾಲ್ವರು ಆರೋಪಿಗಳನ್ನು ನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಕಾರಂಜಿಕಟ್ಟೆಯ ತರಕಾರಿ ವ್ಯಾಪಾರಿ ಪ್ರಸನ್ನ (33), ಶಬರೀಶ (32), ಶಾಂತಿನಗರದ ಚಾಲಕ ಶಿವಕುಮಾರ್​ (37) ಹಾಗೂ ಮತ್ತೊಬ್ಬ ಚಾಲಕ ರಾಜೇಶ್​ (32) ಬಂಧಿತರು.

ಆರೋಪಿಗಳಿಂದ 6 ಕೆಜಿ ದೇವರ ಬೆಳ್ಳಿ ಆಭರಣ, ಹುಂಡಿಯಲ್ಲಿದ್ದ 2,020 ರೂ. ನಗದು ಹಾಗೂ ಅಯ್ಯಪ್ಪಸ್ವಾಮಿ ದೇವಾಲಯದಲ್ಲಿ ಕಳವು ಮಾಡಿದ್ದ ಹುಂಡಿಯ ಹಣ, ಕಾರಂಜಿ ಕಟ್ಟೆಯಲ್ಲಿ ಕಳವು ಮಾಡಿದ್ದ ದ್ವಿಚಕ್ರ ವಾಹನ, ಕೆಎಸ್​ಆರ್​ಟಿಸಿ ಬಸ್​ ನಿಲ್ದಾಣದಲ್ಲಿ ಕಳವು ಮಾಡಿದ್ದ ದ್ವಿಚಕ್ರ ವಾಹನ ಸೇರಿ ಅಂದಾಜು 2 ಲಕ್ಷ ರೂ.ಮೌಲ್ಯದ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ.

ದೇಗುಲದ ಅರ್ಚಕ ಮಂಜುನಾಥ್​ ನೀಡಿದ ದೂರಿನ ಮೇಲೆ ಪೊಲೀಸರು ತನಿಖೆ ಕೈಗೊಂಡಿದ್ದರು. ಡಿ.3ರಂದು ಸತ್ಯನಾರಾಯಣ ದೇಗುಲದ ಬಾಗಿಲು ಕಿತ್ತು ಒಳಗೆ ದೇವರಿಗೆ ಹಾಕಿದ್ದ ಸುಮಾರು 4 ಕೆ.ಜಿ ತೂಕದ ಬೆಳ್ಳಿಯ ಲೇಪನದ ಆಭರಣಗಳನ್ನು ಮತ್ತು ಕಾಣಿಕೆ ಹುಂಡಿಯಲ್ಲಿದ್ದ ಸುಮಾರು 10 ಸಾವಿರ ಕಳವು ಮಾಡಿರುವ ಬಗ್ಗೆ ದೂರು ನೀಡಿದ್ದರು. ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಬಿ.ನಿಖಿಲ್​, ಹೆಚ್ಚುವರಿ ಪೊಲೀಸ್​ ವರಿಷ್ಠಾಧಿಕಾರಿಗಳಾದ ರವಿಶಂಕರ್​, ಎಚ್​.ಸಿ.ಜಗದೀಶ್​ ತನಿಖಾ ತಂಡದ ಕಾರ್ಯ ವೈಖರಿ ಶ್ಲಾಘಿಸಿದ್ದಾರೆ.