ದೇಶಾದ್ಯಂತ ಇನ್ನೂ 4 ಹಂತಗಳ ಮತದಾನ ಬಾಕಿ ಇದ್ದರೂ ನಮ್ಮ ರಾಜ್ಯದ ಮಟ್ಟಿಗೆ ಮಂಗಳವಾರದ ಮತದಾನದೊಂದಿಗೆ ಲೋಕಸಭಾ ಚುನಾವಣೆ ಮುಗಿದಂತಾಗಿದೆ. ಫಲಿತಾಂಶಕ್ಕೆ ಇನ್ನೂ ಸುಮಾರು 1 ತಿಂಗಳು ಬಾಕಿ ಇದೆ. ಲೋಕಸಭಾ ಚುನಾವಣೆ ಘೊಷಣೆಯಾದಾಗಿನಿಂದಲೂ, ಅಂದರೆ ಕಳೆದ ಸುಮಾರು ಒಂದೂವರೆ ತಿಂಗಳುಗಳಿಂದ ರಾಜ್ಯದಲ್ಲಿ ಚುನಾಯಿತ ಸರ್ಕಾರವೇ ಇಲ್ಲವೇನೋ ಎಂದು ಸಂಶಯ ಬರುವಂತಹ ಪರಿಸ್ಥಿತಿ ಇದೆ. ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿ, ಸಚಿವರು, ಹಿರಿಯ-ಕಿರಿಯ ಅಧಿಕಾರಿಗಳಾದಿಯಾಗಿ ಎಲ್ಲರೂ ರಾಜಕೀಯ ರ್ಯಾಲಿಗಳಲ್ಲಿ ಮತ್ತು ಚುನಾವಣೆ ಕೆಲಸಗಳಲ್ಲಿ ಬಿಜಿಯಾಗಿದ್ದಾರೆ. ಪರಿಣಾಮವಾಗಿ ಜನರ ಕುಂದುಕೊರತೆಗಳನ್ನು ಕೇಳುವವರೇ ಇಲ್ಲದಂತಾಗಿದೆ. ಮೊದಲೇ ಬರಗಾಲದಿಂದ ತತ್ತರಿಸಿರುವ ರೈತ ಸಮುದಾಯ, ತಿಂಗಳುಗಟ್ಟಲೇ ಅಲ್ಪಸ್ವಲ್ಪ ಮಳೆಯೂ ಇಲ್ಲದೆ ಪರಿತಪಿಸುತ್ತಿದೆ.
