ಹಾಗಾದರೆ ಪ್ರಪಂಚದಲ್ಲಿ ಯಾವ ರೀತಿಯಾಗಿ ಇರಬೇಕು?. ಇದಕ್ಕೆ ರಾಮಕೃಷ್ಣರ ಉತ್ತರ ಹೀಗಿದೆ: ಎಲ್ಲಾ ಕೆಲಸ ಕಾರ್ಯಗಳನ್ನು ಮಾಡು, ಆದರೆ ಮನಸ್ಸನ್ನು ಭಗವಂತನ ಪಾದಪದ್ಮಗಳಲ್ಲಿ ಅರ್ಪಿಸು. ಈ ಪಂಚತತ್ತ್ವಗಳಲ್ಲಿ ಮೊದಲನೆಯದು ಭಗವನ್ನಾಮ ಸ್ಮರಣೆ, ಜಪ, ಚಿಂತನೆ, ಇತ್ಯಾದಿ. ಎರಡನೆಯದು ಸತ್ಸಂಗ - ದೇವಾಲಯಗಳಲ್ಲಿ ನಡೆಯುತ್ತಿದ್ದ ಹರಿಕಥೆ, ಗಮಕ, ಪುರಾಣ ವಾಚನ ಇತ್ಯಾದಿಗಳು. ಇನ್ನು ಮೂರನೇ ಅಂಶವೇ ನಿರ್ಜನ ಪ್ರದೇಶ, ಶಾಂತಿ ಕ್ಷೇತ್ರ, ಪವಿತ್ರ ಧಾಮಗಳಿಗೆ ತೆರಳಿ ಭಗವದ್ ಚಿಂತನೆ, ಧ್ಯಾನ, ಸ್ಮರಣೆ ನಡೆಸುವುದು. ನಾಲ್ಕನೆಯದು ಸತತವಾಗಿ ಅಧ್ಯಾತ್ಮಿಕ ಚಿಂತನ-ಮಂಥನ. ಅದರಿಂದ ಈ ನಶ್ವರ ಪ್ರಪಂಚದ ಸತ್ಯ-ಅಸತ್ಯದ ಅರಿವು ಉಂಟಾಗುತ್ತದೆ. ನಶ್ವರ ಜಗತ್ತಿನಿಂದ ಮನಸ್ಸು ದೂರವಾಗುತ್ತ ಈಶ್ವರ ಭಾವನೆಯನ್ನು ಹೊಂದುವಂತಾಗುತ್ತದೆ. ಐದನೇಯ ತತ್ವವೆಂದರೆ ಎಲ್ಲಾ ಕೆಲಸ ಕಾರ್ಯಗಳನ್ನು ಮಾಡು, ಆದರೆ ಮನಸ್ಸು ಮಾತ್ರ ಭಗವಂತನ ಚರಣಾರವಿಂದಗಳಲ್ಲಿ ಸಂಪೂರ್ಣ ಸಮರ್ಪಿತವಾಗುವಂತೆ ನಡೆ. ಯಾವ ಕೆಲಸವೂ ನಿನ್ನದಲ್ಲ, ಅದು ನಿನಗೆ ಸಂದ ಕರ್ತವ್ಯ ಮಾತ್ರ. ಆದಾಗ್ಯೂ ಆ ಕೆಲಸಕಾರ್ಯಗಳನ್ನು ಭಗವರ್ದಪಿತ ಭಾವನೆಯಿಂದ ಪೂರ್ಣಗೊಳಿಸು. ಆ ಭಾವನೆಯಿಂದ ಕೈಗೊಂಡಿದ್ದಲ್ಲಿ ಕೆಲಸ ಕಾರ್ಯಗಳ ಕಷ್ಟ ನಿನಗೆ ಅಂಟುವುದಿಲ್ಲ. ನೀನು ಕೇವಲ ಯಂತ್ರ, ಯಂತ್ರೀ ಭಗವಂತ.
