ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​​ ಬೆಂಗಾವಲು ಪಡೆಯಲ್ಲಿರಲಿವೆ ಐದು 'ಲಂಗೂರ್'​ಗಳು; ಭದ್ರತಾ ಪಡೆಯ ಈ ಹೊಸ ಐಡಿಯಾ ಯಾಕೆ ಗೊತ್ತಾ?

ನವದೆಹಲಿ: ಫೆ.24ರಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಅವರು ಪತ್ನಿ ಮೆಲಾನಿಯಾ ಜತೆ ಭಾರತಕ್ಕೆ ಆಗಮಿಸಲಿದ್ದಾರೆ. ಟ್ರಂಪ್​ ಆಗಮನದ ನಿಮಿತ್ತ ಅವರು ಭೇಟಿ ನೀಡುವ ಸ್ಥಳಗಳಾದ ಗುಜರಾತ್​ನ ಅಹಮದಾಬಾದ್​, ಆಗ್ರಾಗಳಲ್ಲೆಲ್ಲ ಹೆಚ್ಚಿನ ಭದ್ರತೆಗೆ ಸಿದ್ಧತೆ ಮಾಡಲಾಗಿದೆ.

ಆದರೆ ಆಗ್ರಾದಲ್ಲಿ ಕೋತಿಗಳ ಕಾಟ ವಿಪರೀತವಾಗಿದ್ದು, ತುಂಬ ಕೀಟಲೆ ಮಾಡುತ್ತವೆ. ಈ ಕೋತಿಗಳು ರಕ್ಷಣಾ ಸಿಬ್ಬಂದಿಗೆ ತಲೆನೋವಾಗಿ ಪರಿಣಮಿಸಿವೆ. ಎಷ್ಟೇ ಭದ್ರತಾ ಸಿಬ್ಬಂದಿಯನ್ನು ನಿಯೋಜಿಸಿದರೂ ಕೋತಿಗಳನ್ನು ನಿಯಂತ್ರಿಸುವುದು ಕಷ್ಟ. ಯಾಕೆಂದರೆ ಅವುಗಳ ಮೇಲೆ ಹಲ್ಲೆ ಮಾಡುವುದಾಗಲೀ, ಅವಕ್ಕೆ ಹೊಡೆದು ಓಡಿಸುವುದಾಗಿ ಅಪರಾಧ. ಹೀಗಾಗಿ ರಕ್ಷಣಾ ದಳ ಒಂದೊಳ್ಳೆ ಉಪಾಯವನ್ನು ಕಂಡುಕೊಂಡಿದೆ.

ಡೊನಾಲ್ಡ್​ ಟ್ರಂಪ್​ ಅವರಿಗೆ ರಕ್ಷಣೆ ನೀಡುವ ತಂಡದಲ್ಲಿ ಐದು ಲಂಗೂರ್​ (ಉದ್ದನೆಯ ಬಾಲದ ಮಂಗಗಳು)ಗಳನ್ನು ನಿಯೋಜಿಸಲಾಗಿದೆ. ಟ್ರಂಪ್​ ಅವರು ರಸ್ತೆ ಮಾರ್ಗದಲ್ಲಿ ಹೋಗುವಾಗ ಅವರಿಗೆ ಬೆಂಗಾವಲಾಗಿ ಹೋಗುವ ರಕ್ಷಣಾ ಪಡೆಗಳ ಜತೆ ಈ ಐದು ಲಂಗೂರ್​ಗಳು ಇರಲಿವೆ.

ಸಾಮಾನ್ಯ ಪ್ರಭೇದದ ಮಂಗಗಳು ಈ ಲಂಗೂರ್​ಗಳಿಗೆ ಹೆದರುತ್ತವೆ. ಲಂಗೂರ್​ಗಳು ಸಾಮಾನ್ಯ ಕೋತಿಗಳಿಗಿಂತ ಗಾತ್ರದಲ್ಲಿ ದೊಡ್ಡದಾಗಿರುತ್ತವೆ. ಅಲ್ಲದೆ ತುಂಬ ಆಕ್ರಮಣಶೀಲವಾಗಿರುತ್ತದೆ. ಅವುಗಳನ್ನು ಕಂಡರೆ ಕೋತಿಗಳು ಹತ್ತಿರ ಬರುವುದಿಲ್ಲ. ಇದೇ ಕಾರಣಕ್ಕೆ ಭದ್ರತಾ ದಳಗಳು ಈ ಐಡಿಯಾ ಮಾಡಿವೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಮತ್ತು ಅವರ ಪತ್ನಿ ಮೆಲಾನಿಯಾ ಟ್ರಂಪ್​ ಫೆ.24ರಂದು ತಾಜ್​ಮಹಲ್​ಗೆ ಭೇಟಿ ನೀಡಲಿದ್ದಾರೆ. ತಾಜ್​ಮಹಲ್​ಗೆ ಕೂಡ ಈಗಾಗಲೇ ಪೇಂಟಿಂಗ್​ ಮಾಡಲಾಗಿದೆ. ಅಲ್ಲಿನ ಜಾಗಗಳನ್ನೂ ಸ್ವಚ್ಛಗೊಳಿಸಲಾಗಿದೆ. (ಏಜೆನ್ಸೀಸ್​)