ಕೆಪಿಎಸ್​ಸಿಯಲ್ಲಿ ದೇಶದಲ್ಲೇ ಮೊದಲ ಸಲ ಡಿಜಿಟಲ್ ಮೌಲ್ಯಮಾಪನ ಜಾರಿ; ಪ್ರಾಯೋಗಿಕವಾಗಿ ಯಶಸ್ವಿ

| ದೇವರಾಜ ಕನಕಪುರ ಬೆಂಗಳೂರು

ಮೌಲ್ಯಮಾಪನದಲ್ಲಿ ಪಾರದರ್ಶಕತೆ ಹಾಗೂ ಶೀಘ್ರ ಫಲಿತಾಂಶ ನೀಡುವ ಉದ್ದೇಶದಿಂದ ಕರ್ನಾಟಕ ಲೋಕ ಸೇವಾ ಆಯೋಗ (ಕೆಪಿಎಸ್​ಸಿ) ಡಿಜಿಟಲ್ ಮೌಲ್ಯಮಾಪನ ವ್ಯವಸ್ಥೆಗೆ ಮುಂದಾಗಿದೆ. ಕೇಂದ್ರ ಲೋಕಸೇವಾ ಆಯೋಗ (ಯುಪಿಎಸ್​ಸಿ) ಕೂಡ ಈ ರೀತಿ ಡಿಜಿಟಲ್ ವ್ಯವಸ್ಥೆ ಹೊಂದಿಲ್ಲ. ದೇಶದಲ್ಲಿ ಮೊದಲ ಬಾರಿಗೆ ಕೆಪಿಎಸ್​ಸಿ ಈ ವ್ಯವಸ್ಥೆ ಜಾರಿಗೆ ತರುತ್ತಿದೆ.

ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ (ಎಸಿಎಫ್) ಪರೀಕ್ಷೆಯ ಉತ್ತರ ಪತ್ರಿಕೆಗಳನ್ನು ಡಿಜಿಟಲ್ ಮೌಲ್ಯಮಾಪನಕ್ಕೆ ಒಳಪಡಿಸಿ ಪ್ರಾಯೋಗಿಕವಾಗಿ ಅನುಷ್ಠಾನ ಮಾಡಿದ್ದು, ಯಶಸ್ವಿಯಾಗಿದೆ. ಈ ಹಿನ್ನೆಲೆಯಲ್ಲಿ ಉಳಿದ ಪರೀಕ್ಷೆಗಳಿಗೂ ಅನ್ವಯಿಸಲು ಆಯೋಗ ಮುಂದಾಗಿದೆ. ಈವರೆಗೆ ಕೆಪಿಎಸ್​ಸಿ ಮೌಲ್ಯಮಾಪಕರಿಗೆ ಉತ್ತರ ಪತ್ರಿಕೆಯನ್ನು ನೇರವಾಗಿ ನೀಡಿ ಮೌಲ್ಯಮಾಪನ ಮಾಡಿಸುತ್ತಿತ್ತು. ಇನ್ನುಮುಂದೆ ಮೌಲ್ಯಮಾಪಕರಿಗೆ ಉತ್ತರ ಪತ್ರಿಕೆಯು ಕಂಪ್ಯೂಟರ್ ಪರದೆ ಮೇಲೆ ಸ್ಕಾ್ಯನ್ ಪ್ರತಿ ನೀಡಲಿದ್ದು, ಇದನ್ನೇ ನೋಡಿ ಪಕ್ಕದಲ್ಲೇ ಅಂಕಗಳನ್ನು ನಮೂದಿಸುವ ಡಿಜಿಟಲ್ ಮೌಲ್ಯಮಾಪನದ ವ್ಯವಸ್ಥೆ ಜಾರಿಗೆ ಬರಲಿದೆ. ಈ ಸಂಬಂಧ ರಾಷ್ಟ್ರೀಯ ಮಾಹಿತಿ ಕೇಂದ್ರ (ಎನ್​ಐಸಿ) ತಂತ್ರಜ್ಞಾನವನ್ನು ಕೆಪಿಎಸ್​ಸಿ ರೂಪಿಸಿದೆ.

ವಿವರಣಾ ಉತ್ತರ: ಕೆಪಿಎಸ್​ಸಿಯು ಸಾಮಾನ್ಯವಾಗಿ, ಹೆಚ್ಚಿನ ಪರೀಕ್ಷೆಗಳಲ್ಲಿ ಬಹು ಆಯ್ಕೆ ಮಾದರಿ (ಎಂಸಿಕ್ಯೂ) ಪ್ರಶ್ನೆಪತ್ರಿಕೆ ರೂಪಿಸುತ್ತದೆ. ಅಂದರೆ, ವಿದ್ಯಾರ್ಥಿಗಳು 4 ಉತ್ತರಗಳ ಪೈಕಿ ಒಂದನ್ನು ಆಯ್ಕೆ ಮಾಡಿದರೆ ಸಾಕು. ಆದರೆ, ಇತರ ‘ಎ’ ಮತ್ತು ‘ಬಿ’ ಶ್ರೇಣಿಯ ಹುದ್ದೆಗಳಲ್ಲಿ ಪ್ರಶ್ನೆಪತ್ರಿಕೆ ಸ್ವರೂಪ ಬದಲಾಗಿರುತ್ತದೆ. ಪರೀಕ್ಷೆಗಳಲ್ಲಿ ವಿವರಣಾತ್ಮಕವಾದ ಪ್ರಶ್ನೆಗಳನ್ನು ರೂಪಿಸುತ್ತದೆ. ಇದರಿಂದಾಗಿ ಅಭ್ಯರ್ಥಿಗಳು ಉತ್ತರಗಳನ್ನು ವಿಸ್ತಾರವಾಗಿ ಬರೆಯಬೇಕಾಗಿರುತ್ತದೆ.

ಹಳೇ ಪದ್ಧತಿ: ಸದ್ಯ ಚಾಲ್ತಿಯಲ್ಲಿರುವ ಪದ್ಧತಿ ಪ್ರಕಾರ, ಉತ್ತರ ಪತ್ರಿಕೆಗಳ ಮೇಲಿರುವ ಅಭ್ಯರ್ಥಿಗಳ ಮಾಹಿತಿ ತೆಗೆದು ಉತ್ತರ ಪತ್ರಿಕೆ ಮಾತ್ರ ಮೌಲ್ಯಮಾಪಕರಿಗೆ ನೀಡಲಾಗುತ್ತದೆ. ಮೌಲ್ಯಮಾಪಕರು ಉತ್ತರ ಪತ್ರಿಕೆಯ ಮಾದರಿ ನೋಡಿಕೊಂಡು ಮೌಲ್ಯಮಾಪನ ಮಾಡಿ ಅಲ್ಲೇ ಅಂಕಗಳನ್ನು ನೀಡುತ್ತಾರೆ. ಆನಂತರ ಆ ಅಂಕಗಳನ್ನು ಲೆಕ್ಕಹಾಕಿ ಅಭ್ಯರ್ಥಿಗಳ ಫಲಿತಾಂಶವನ್ನು ಆಯೋಗ ಪ್ರಕಟಿಸುತ್ತದೆ.

ಡಿಜಿಟಲ್ ವ್ಯವಸ್ಥೆಯಲ್ಲಿ ಉತ್ತರ ಪತ್ರಿಕೆಗಳನ್ನು ಸ್ಕಾ್ಯನ್ ಮಾಡಿ ಅಭ್ಯರ್ಥಿಗಳ ಮಾಹಿತಿ ತೆಗೆದು, ಕೇವಲ ಉತ್ತರ ಪತ್ರಿಕೆಯನ್ನು ರಾಜ್ಯದ ದತ್ತಾಂಶ ಕೇಂದ್ರದಲ್ಲಿ ಸಂಗ್ರಹಿಸುತ್ತದೆ. ಪ್ರತಿ ಮೌಲ್ಯಮಾಪಕರಿಗೆ ಪ್ರತ್ಯೇಕ ಬಯೋಮೆಟ್ರಿಕ್, ಕಂಪ್ಯೂಟರ್ ಲಾಗಿನ್ ಮತ್ತು ಪಾಸ್​ವರ್ಡ್ ನೀಡಲಾಗಿರುತ್ತದೆ. ಆ ಮೂಲಕ ಮೌಲ್ಯಮಾಪನ ತಂತ್ರಾಂಶಕ್ಕೆ ಅಪ್​ಲೋಡ್ ಆಗಲಿದೆ. ಮೌಲ್ಯಮಾಪಕರು ಕಂಪ್ಯೂಟರ್ ಪರದೆ ಮೇಲೆ ಬರುವ ಉತ್ತರ ಪತ್ರಿಕೆಯನ್ನು ನೋಡಿ ಅಲ್ಲೇ ಪಕ್ಕದಲ್ಲಿ ನೀಡುವ ಬಾಕ್ಸ್​ನಲ್ಲಿ ಅಂಕಗಳನ್ನು ನಮೂದಿಸಬೇಕಿರುತ್ತದೆ. ಅಂಕ ನೀಡುವುದನ್ನು ಮರೆತಲ್ಲಿ, ಮುಂದೆ ಹೋಗುವುದೇ ಇಲ್ಲ. ಟ್ಯಾಂಪರ್ ಮಾಡಲು ಪ್ರಯತ್ನಿಸಿದಲ್ಲಿ ಸಿಕ್ಕಿ ಬೀಳಬೇಕಾಗುತ್ತದೆ.

ಆನ್​ಲೈನ್ ಮೌಲ್ಯಮಾಪನ ಮಾಡುವುದರಿಂದ ನಿಖರತೆ ಮತ್ತು ಪಾರದರ್ಶಕತೆ ಹೆಚ್ಚಾಗಿರುತ್ತದೆ. ಇದರಿಂದ ವಿದ್ಯಾರ್ಥಿಗಳಿಗೆ ಅನ್ಯಾಯವಾಗುವುದು ತಪ್ಪಲಿದೆ.

| ನೀಲು ರಂಗನಾಥ್ ಎಸಿಎಫ್ ಪರೀಕ್ಷೆ ಬರೆದ ಅಭ್ಯರ್ಥಿ