ಮುಂದಿನ ವರ್ಷದಿಂದ ರಾಜ್ಯದ ಆರ್ಥಿಕ ಪರಿಸ್ಥಿತಿ ಇನ್ನಷ್ಟು ಕಳವಳಕಾರಿಯಾಗುವ ಆತಂಕ ತಲೆದೋರಿದ್ದು, ರಾಜಸ್ವ ಹೆಚ್ಚಿಸಿ, ಸಾಲ ಕಡಿಮೆ ಮಾಡುವ ಹಾಗೂ ಬದ್ಧ ವೆಚ್ಚಗಳಿಗೆ ಕಡಿವಾಣ ಹಾಕಲೇಬೇಕಾದ ಅನಿವಾರ್ಯ ಎದುರಾಗಿದೆ. ರಾಜ್ಯದ ಆರ್ಥಿಕ ಸಮೀಕ್ಷೆ, ಮಧ್ಯಮಾವಧಿ ವಿತ್ತೀಯ ಯೋಜನೆ 2022-26 (ಎಂಟಿಎಫ್ಪಿ) ವರದಿಗಳಲ್ಲಿ ರಾಜ್ಯ ಸರ್ಕಾರಕ್ಕೆ ಇಂತಹ ಎಚ್ಚರಿಕೆ ನೀಡಲಾಗಿದೆ. ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ಆಯವ್ಯಯ ಭಾಷಣದಲ್ಲಿ ವಿತ್ತೀಯ ಕೊರತೆ ಹಾಗೂ ಸಾಲದ ಪ್ರಮಾಣ ಹೆಚ್ಚಿಸಿಕೊಳ್ಳಲು ಕರ್ನಾಟಕ ವಿತ್ತೀಯ ಹೊಣೆಗಾರಿಕೆ ಅಧಿನಿಯಮಕ್ಕೆ ತಿದ್ದುಪಡಿ ತರುವ ಪ್ರಸ್ತಾಪ ಮಾಡಿದ್ದಾರೆ. ಆದರೆ ಎಂಟಿಎಫ್ಪಿಯಲ್ಲಿ ವಿತ್ತೀಯ ನಿರ್ವಹಣೆ ಪರಿಶೀಲನೆ ಸಮಿತಿಯಿಂದ ಹಿಂದಿನ ಪದ್ಧತಿಗೆ ಮರಳುವಂತೆ ಸಲಹೆ ಬಂದಿದೆ. ವಿತ್ತೀಯ ಹೊಣೆಗಾರಿಕೆ ಅಧಿನಿಯಮದ ಪ್ರಕಾರ ವಿತ್ತೀಯ ಕೊರತೆ ಜಿಎಸ್ಡಿಪಿ ಶೇ.3ರ ಒಳಗೆ ಹಾಗೂ ಸಾಲದ ಪ್ರಮಾಣ ಶೇ.25 ರೊಳಗೆ ಇರಬೇಕಿತ್ತು. ಆದರೆ ಕಳೆದ ವರ್ಷ ಕರೊನಾ ಕಾರಣಕ್ಕಾಗಿ ಶೇ. 4 ಹಾಗೂ ಸಾಲದ ಪ್ರಮಾಣವನ್ನು ಜಿಎಸ್ಡಿಪಿಯ ಶೇ.27ಕ್ಕೆ ಹೆಚ್ಚಿಸಿಕೊಳ್ಳಲು ಅವಕಾಶ ಕಲ್ಪಿಸಲಾಗಿತ್ತು. ಆದರೆ ಮುಂದಿನ ಹಣಕಾಸು ವರ್ಷಕ್ಕೆ ವಿತ್ತೀಯ ಕೊರತೆ ಶೇ.3.26 ಹಾಗೂ ಸಾಲದ ಪ್ರಮಾಣ ಶೇ.27.49ಕ್ಕೆ ಮುಟ್ಟಲಿದೆ. ಆದ್ದರಿಂದಲೇ ಸರ್ಕಾರ ವಿತ್ತೀಯ ಹೊಣೆಗಾರಿಕೆ ಅಧಿನಿಯಮದ ತಿದ್ದುಪಡಿಯ ಬಗ್ಗೆ ಪ್ರಸ್ತಾಪ ಮಾಡಿದೆ. ಆದರೆ ವಿತ್ತೀಯ ನಿರ್ವಹಣೆ ಪರಿಶೀಲನಾ ಸಮಿತಿಯು ಫೆಬ್ರವರಿಯಲ್ಲಿ ಸಭೆ ನಡೆಸಿ ಮುಂದಿನ 2-3 ವರ್ಷಗಳಲ್ಲಿ ರಾಜ್ಯದ ರಾಜಸ್ವವು ಹೆಚ್ಚಾಗಲು ಹಾಗೂ ಹೊಣೆಗಾರಿಕೆಗಳನ್ನು ಜಿಎಸ್ಡಿಪಿಯ ಶೇ. 25ಕ್ಕಿಂತ ಕಡಿಮೆ ಮಾಡಲು ಮಾರ್ಗಸೂಚಿಯನ್ನು ಪ್ರಾರಂಭಿಸಬಹುದೆಂದು ಸಲಹೆ ನೀಡಿದೆ. ಆದರೆ ಬಜೆಟ್ನಲ್ಲಿ ಆ ಸಲಹೆ ನಿರ್ಲಕ್ಷಿಸಲ್ಪಟ್ಟಿದೆ.
