ಈತ ಸಂಜೆ ಮನೆಯ ಬಾಗಿಲು ತೆಗೆಯುತ್ತಿದ್ದಂತೆ ಶಾಕ್​ ಕೊಟ್ಟ ಹಾವುಗಳು !

ಕೆಲಸಕ್ಕೆಂದು ಹೊರಗೆ ಹೋಗಿದ್ದ ಈತ ಮನೆಗೆ ಬಂದಾಗ ಒಂದು ಕ್ಷಣ ಕಂಗಾಲಾಗಿ ಹೋದ. ಅಡುಗೆ ಮನೆ ಸೀಲಿಂಗ್​ ನೋಡಿದವನಿಗೆ ಏನು ಮಾಡಬೇಕೆಂದೇ ಗೊತ್ತಾಗಲಿಲ್ಲ...!

ಆಸ್ಟ್ರೇಲಿಯಾದಲ್ಲಿ ಘಟನೆ ನಡೆದಿದೆ. ಕ್ವೀನ್ಸ್​ಲ್ಯಾಂಡ್​ ರಾಜ್ಯದ ಲೇಸಿಸ್ ಕ್ರೀಕ್ ನಿವಾಸಿಯಾಗಿರುವ ಡೆವಿಡ್​​ ಟೇಟ್​ ಸೋಮವಾರ ಸಂಜೆ ಮನೆಗೆ ವಾಪಸ್​ ಆಗುವಷ್ಟರಲ್ಲಿ ಅವರ ಮನೆಯಲ್ಲಿ ಎರಡು ದೊಡ್ಡ ಹೆಬ್ಬಾವುಗಳು ಸಿಕ್ಕಾಪಟೆ ಫೈಟ್ ಮಾಡುತ್ತಿದ್ದವು. ಸೀಲಿಂಗ್​ ಸೇರಿಕೊಂಡು. ಅಲ್ಲೇ ಕಾದಾಟ ನಡೆಸುತ್ತಿದ್ದವು. ಹಾವುಗಳ ಕಾದಾಟದಿಂದ ಸೀಲಿಂಗ್​ನ ದೊಡ್ಡದಾದ ಚೂರು ಅಡುಗೆ ಮನೆಯ ಟೇಬಲ್​ ಮೇಲೆ ಮುರಿದುಬಿದ್ದಿತ್ತು.

ಮಳೆಯಿದ್ದಾಗ ಹೆಬ್ಬಾವುಗಳು ಬರುವುದು ಸಾಮಾನ್ಯ. ಆದರೆ ಈಗ್ಯಾಕೆ ಬಂದವು ಎಂಬುದು ನನಗೆ ಗೊತ್ತಾಗಲಿಲ್ಲ. ಒಂದು ಹಾವು 9 ಅಡಿ 2 ಇಂಚು, ಮತ್ತೊಂದು ಹಾವು 8 ಅಡಿ 2 ಅಂಚುಗಳಷ್ಟು ಉದ್ದವಾಗಿದ್ದವು. ಸುಮಾರು 45 ಕೆಜಿ ತೂಕಹೊಂದಿದ್ದವು. ಮಲಗುವ ಕೋಣೆ, ಅಡುಗೆ ಕೋಣೆಗಳಲ್ಲೆಲ್ಲ ದಾಂಗುಡಿ ಎಬ್ಬಿಸಿವೆ ಎಂದು ಡೆವಿಡ್​ ತಿಳಿಸಿದ್ದಾರೆ.

ನಂತರ ಉರಗತಜ್ಞ ಸ್ಟೀವನ್​ ಬ್ರೌನ್ ಬಂದು ಎರಡೂ ಹಾವನ್ನೂ ಹಿಡಿದಿದ್ದಾರೆ. ಈ ಎರಡೂ ಗಂಡು ಹಾವುಗಳು ಒಂದು ಹೆಣ್ಣು ಹಾವಿಗಾಗಿ ಹೀಗೆ ಹೊಡೆದಾಡಿಕೊಂಡಿವೆ. ಅದರ ಬೆನ್ನಟ್ಟಿಯೇ ಬಂದಿವೆ. ಈ ಮನೆಯಲ್ಲಿ ಖಂಡಿತ ಎಲ್ಲೋ ಒಂದು ಹೆಣ್ಣು ಹಾವು ಇದ್ದೇಇದೆ ಎಂದು ಸ್ಟೀವನ್​ ತಿಳಿಸಿದ್ದಾರೆ. ಹಾಗಾಗಿ ಡೆವಿಡ್​ಗೆ ಆತಂಕ ದೂರವಾಗಿಲ್ಲ. (ಏಜೆನ್ಸೀಸ್​)