ಉಲ್ಬಣಿಸುತ್ತಿದೆ ಜ್ವರಬಾಧೆ: ಮಳೆಯಿಂದ ಹೆಚ್ಚಿದ ಶೀತಜ್ವರ; ಡೆಂಘ, ಚಿಕೂನ್ ಗುನ್ಯಾ ಹೆಚ್ಚಳ..

| ಪಂಕಜ ಕೆ.ಎಂ. ಬೆಂಗಳೂರು

ಮುಂಗಾರು ಮಳೆ ಬಿರುಸಾಗುತ್ತಿರುವ ನಡುವೆಯೇ ರಾಜ್ಯದಲ್ಲಿ ಶೀತ ಜ್ವರ ಸೇರಿ ನಾನಾ ಬಗೆಯ ರೋಗಗಳು ಉಲ್ಬಣಿಸಿವೆ. ಒಂದೆಡೆ ಕೋವಿಡ್ ಪ್ರಕರಣಗಳ ಏರಿಕೆ ಕಾಣುತ್ತಿದ್ದರೆ, ಮಕ್ಕಳಿಂದ ವೃದ್ಧರವರೆಗೆ ಡೆಂಘ, ಚಿಕೂನ್ ಗುನ್ಯಾ, ಎಚ್1ಎನ್1, ವೈರಾಣು ಜ್ವರಗಳು ಬಾಧಿಸುತ್ತಿವೆ. ಮೈ ಬಿಸಿ ಕೊಂಚ ಏರಿದರೂ ಆತಂಕಪಡುವ ವಾತಾವರಣ ನಿರ್ವಣವಾಗಿದೆ.

ಬೆಂಗಳೂರು ಸೇರಿ ರಾಜ್ಯಾದ್ಯಂತ ಆಸ್ಪತ್ರೆಗಳಲ್ಲಿ ರೋಗಿಗಳ ಸಂಖ್ಯೆ ಹೆಚ್ಚುತ್ತಿದೆ. ಎರಡು ವರ್ಷಗಳಿಂದ ಮನೆಯಲ್ಲಿ ಉಳಿದಿದ್ದ ಮಕ್ಕಳು ಇದೀಗ ಶಾಲೆಗೆ ಹೋಗಲು ಪ್ರಾರಂಭಿಸಿದ್ದು, ಅವರಲ್ಲಿ ಕೈ ಕಾಲು ಬಾಯಿ ರೋಗ, ಶೀತಜ್ವರ, ವೈರಾಣು ಜ್ವರಗಳು ಹೆಚ್ಚು ವರದಿಯಾಗುತ್ತಿವೆ. ಕೋವಿಡ್ ನಂತರದಲ್ಲಿ ಯಾವುದೇ ಜ್ವರ ಸೇರಿ ಬಹುತೇಕ ಆರೋಗ್ಯ ಸಮಸ್ಯೆಗಳಿಗೆ ವೈದ್ಯರು ಪ್ರಯೋಗಾಲಯ ಪರೀಕ್ಷೆಗೆ ಶಿಫಾರಸು ಮಾಡುವುದು ಹೆಚ್ಚಾಗಿದೆ. ಅದರಲ್ಲೂ ಶೀತ, ನೆಗಡಿ, ಕೆಮ್ಮು, ಜ್ವರ ಎಂದ ಕೂಡಲೇ ಕೋವಿಡ್ ಪರೀಕ್ಷೆಗೆ ಸೂಚಿಸಲಾಗುತ್ತಿದೆ.

ಇದರಿಂದ ಜನರ ಜೇಬಿಗೂ ಕತ್ತರಿ ಬೀಳುತ್ತಿದೆ. ಕೋವಿಡ್​ನಿಂದಾಗಿ ಕಳೆದ ಎರಡು ವರ್ಷಗಳಿಂದ ತಗ್ಗಿದ್ದ ಇತರೆ ರೋಗಗಳು ಹೆಚ್ಚಾಗುತ್ತಿವೆ. ರಾಜ್ಯದಲ್ಲಿ ಕಳೆದ ಆರು ತಿಂಗಳಲ್ಲಿ 9.65 ಲಕ್ಷಕ್ಕೂ ಅಧಿಕ ಕೋವಿಡ್ ಸೋಂಕು ಪ್ರಕರಣಗಳು ವರದಿಯಾಗಿದ್ದು, 1,740 ಮಂದಿ ಸಾವನ್ನಪ್ಪಿದ್ದಾರೆ. ಇದರ ನಡುವೆಯೇ 2,987 ಡೆಂಘ, 671 ಚಿಕೂನ್ ಗುನ್ಯಾ, 104 ಮಲೇರಿಯಾ, 219 ಎಚ್1ಎನ್1, 131 ಅಕ್ಯೂಟ್ ಎನ್​ಸೆಫಲೈಟಿಸ್ ಸಿಂಡ್ರೋಮ್ (ತೀವ್ರವಾದ ಮಿದುಳು ಜ್ವರ), 53, 439 (1 ಸಾವು) ಗ್ಯಾಸ್ಟ್ರೋ ಎಂಟರೈಟಿಸ್, 16 ಕಾಲರಾ, 17,579 ಟೈಫಾಯ್್ಡ 1,715 ವೈರಲ್ ಹೆಪಟೈಟಿಸ್, 49 (2 ಸಾವು) ಮಂಗನ ಕಾಯಿಲೆ, 288 (1 ಸಾವು) ಇಲಿ ಜ್ವರ ಪ್ರಕರಣಗಳು ವರದಿಯಾಗಿವೆ.

8 ಜಿಲ್ಲೆಗಳಲ್ಲಿ ಜಾಸ್ತಿ: ಬೆಂಗಳೂರು ನಗರ, ಬೆಂಗಳೂರು ಗ್ರಾಮಾಂತರ, ಉಡುಪಿ, ಶಿವಮೊಗ್ಗ, ಉತ್ತರ ಕನ್ನಡ, ಕಲಬುರಗಿ, ರಾಮನಗರ, ರಾಯಚೂರು ಜಿಲ್ಲೆಗಳಲ್ಲಿ ರೋಗಗಳು ಹರಡುವಿಕೆ ಆತಂಕ ಹೆಚ್ಚಿದೆ.

ಜ್ವರ ಹೇಗೆ ಬರುತ್ತದೆ?: ಈಡಿಸ್ ಈಜಿಪ್ಟಿ ಸೊಳ್ಳೆ ಕಚ್ಚುವುದರಿಂದ ಡೆಂಘ ಬಂದರೆ, ಇತರೆ ಸೊಳ್ಳೆಗಳ ಕಚ್ಚುವಿಕೆಯಿಂದ ಚಿಕೂನ್ಯ ಗುನ್ಯಾ, ಮಲೇರಿಯಾ, ಫೈಲೇರಿಯಾ ಬಾಧಿಸಲಿದೆ. ವಾತಾವರಣದಲ್ಲಿನ ಮಲಿನತೆಯಿಂದ ವೈರಲ್ ಅರ್ಥರೈಟಿಸ್ ಸೇರಿ ಹಲವು ವೈರಾಣು ಜ್ವರಗಳು ಕಾಡಲಿವೆ. ಕಲುಷಿತ ನೀರು ಸೇವನೆಯಿಂದ ಕಾಲರಾ, ಕಲುಷಿತ ಆಹಾರ ಹಾಗೂ ಗಾಳಿ ಸೇವನೆಯಿಂದ ಗ್ಯಾಸ್ಟ್ರೋ ಎಂಟರೈಟಿಸ್ ಹಾಗೂ ಟೈಫಾಯ್್ಡ ಇಲಿಗಳ ಮಲ-ಮೂತ್ರ ನೀರಿನಲ್ಲಿ ಮಿಶ್ರಣಗೊಂಡರೆ ಇಲಿ ಜ್ವರ (ಪ್ರವಾಹ ಹಾಗೂ ಅತಿಯಾದ ಮಳೆ ಸಂದರ್ಭದಲ್ಲಿ ಇದು ಹೆಚ್ಚಲಿದೆ), ವಾತಾವರಣದಲ್ಲಿನ ಏರುಪೇರಿನಿಂದಾಗಿ ಮಕ್ಕಳಲ್ಲಿ ಶೀತ, ನೆಗಡಿ, ಕೆಮ್ಮು, ಜ್ವರ, ನ್ಯೂಮೊನಿಯಾ ಕಾಣಿಸಿಕೊಳ್ಳುತ್ತದೆ. ಎಚ್1ಎನ್1, ಡೆಂಘ ಸೇರಿ ಇತರೆ ಸಾಂಕ್ರಾಮಿಕ ರೋಗಗಳು ಒಬ್ಬರಿಂದ ಒಬ್ಬರಿಗೆ ಹರಡುತ್ತದೆ.

ರೋಗ ಲಕ್ಷಣಗಳು 

ವೈರಲ್ ಫೀವರ್

• ನೆಗಡಿ, ತಲೆನೋವು, ಕೆಮ್ಮು, ಮೈ-ಕೈ ನೋವು
• ಕೆಲವೊಮ್ಮೆ ವಾಂತಿ-ಭೇದಿ

ಡೆಂಘೆ

• ದಿಢೀರ್ ಜ್ವರ, ತಲೆನೋವು, ಮೂಗಿನಲ್ಲಿ ಸೋರುವಿಕೆ, ವಾಂತಿ, ಹೊಟ್ಟೆ ನೋವು, ತೋಳು, ಮೈ-ಕೈ ನೋವು
• ಗಂಭೀರ ಹಂತ ತಲುಪಿದಾಗ ಕರುಳಿನಲ್ಲಿ ರಕ್ತಸ್ರಾವ, ಮೈಮೇಲೆ ಕೆಂಪು ಬರೆ, ರಕ್ತದೊತ್ತಡ

ಚಿಕೂನ್ ಗುನ್ಯಾ

• ವಿಪರೀತ ಮೈ-ಕೈ ನೋವು, ತಲೆ ಸಿಡಿತ, ಮಂಡಿ, ಮುಂಗೈಗಳಲ್ಲಿ ತೀವ್ರತರವಾದ ನೋವು

ಎಚ್1ಎನ್1

• ಶ್ವಾಸಕೋಶದ ಸೋಂಕು, ನೆಗಡಿ, ಕೆಮ್ಮು, ಜ್ವರದ ಜತೆಗೆ ಉಸಿರಾಟದ ತೊಂದರೆ
• ಕಣ್ಣು ಕೆಂಪಾಗುವುದು, ತೀವ್ರವಾದ ಮೈ-ಕೈ ನೋವು, ತಲೆ ನೋವು ಕಾಣಿಸಿಕೊಳ್ಳುತ್ತದೆ.

ಮಿದುಳು ಜ್ವರ

• ಸಾಮಾನ್ಯವಾಗಿ ಜ್ವರ, ತಲೆನೋವು, ವಾಂತಿ, ಕತ್ತು ಗಡುಸಾಗುವುದು, ಜೋಂಪು ಹತ್ತುವುದು
• ಗಂಭೀರ ಹಂತದಲ್ಲಿ 103 ಡಿಗ್ರಿ ಫ್ಯಾರನ್​ಹೀಟ್​ಗಿಂತ ಅಧಿಕ ಜ್ವರ, ಗೊಂದಲ, ಭ್ರಮಾತ್ಮಕ ಸ್ಥಿತಿ, ,
• ಚಲನೆಯಲ್ಲಿ ನಿಧಾನ, ದೇಹ ತಟಸ್ಥವಾಗುವಿಕೆ, ಕಿರಿಕಿರಿ, ಬೆಳಕನ್ನು ನೋಡಲಾಗದಿರುವಿಕೆ, ಮೂರ್ಛೆ

ಎಚ್ಚರಿಕೆ ಕ್ರಮಗಳೇನು?

• ಡೆಂಘ, ಚಿಕೂನ್ ಗುನ್ಯಾ ಸೇರಿ ಸೊಳ್ಳೆಗಳಿಂದ ಬರುವ ರೋಗಗಳಿಗೆ ಮುಂಜಾಗ್ರತೆಯೊಂದೇ ಮದ್ದು.
• ಯಾವುದೇ ರೀತಿಯ ಜ್ವರ ಕಾಣಿಸಿಕೊಂಡರೂ ಚಿಕಿತ್ಸೆ ಪಡೆಯಿರಿ.
• ಹಗಲು, ರಾತ್ರಿ ಯಾವುದೇ ಹೊತ್ತಿನಲ್ಲೂ ಸೊಳ್ಳೆ ಕಚ್ಚದಂತೆ ಎಚ್ಚರವಹಿಸಿ.
• ರೋಗನಿರೋಧಕ ಶಕ್ತಿ ಕುಂದದಂತೆ ಸಮತೋಲಿತ ಆಹಾರ, ಶುದ್ಧ ನೀರು ಸೇವಿಸಿ.
• ಮಲ ವಿಸರ್ಜನೆ ನಂತರ ತಪ್ಪದೇ ಕೈಗಳನ್ನು ಸೋಪಿನಲ್ಲಿ ತೊಳೆಯಬೇಕು.
• ಕೆಮ್ಮುವಾಗ, ಸೀನುವಾಗ ಕರ್ಚೀಫ್ ಅಡ್ಡವಿಟ್ಟುಕೊಳ್ಳಿ
• ಮನೆಯಿಂದ ಹೊರಗೆ ಹೋಗುವಾಗ ತಪ್ಪದೇ ಮಾಸ್ಕ್ ಬಳಸಿ.
• ಮಳೆಗಾಲ ಆಗಿರುವುದರಿಂದ ಮಕ್ಕಳನ್ನು, ವೃದ್ಧರನ್ನು ಹಾಗೂ ಅನಾರೋಗ್ಯ ಪೀಡಿತರನ್ನು ಬೆಚ್ಚಗೆ ಇರುವಂತೆ ನೋಡಿಕೊಳ್ಳಿ.
• ಮಕ್ಕಳಿಗೆ ಶೀತ, ಕೆಮ್ಮು, ನೆಗಡಿ, ಜ್ವರ ಲಕ್ಷಣಗಳು ಕಾಣಿಸಿಕೊಂಡರೆ ಶಾಲೆಗೆ ಕಳುಹಿಸಬೇಡಿ.

https://www.vijayavani.net/road-blocked-for-elephant-delivery/

https://www.vijayavani.net/big-branch-of-tree-fell-on-car-scene-captured-in-cctv/