ಬಾಗಲಕೋಟೆ ಮೂಲದ ಅಪೂರ್ವ ಎಸ್. ಕದಂಪುರ ಯೂಕ್ರೇನ್ನ ಕಾರ್ಕೇವ್ ನ್ಯಾಷನಲ್ ಮೆಡಿಕಲ್ ಯೂನಿವರ್ಸಿಟಿಯಲ್ಲಿ ಎಂಬಿಬಿಎಸ್ ವ್ಯಾಸಂಗ ಮಾಡುತ್ತಿದ್ದು, ಅವರು ಕೂಡ ಈಗ ಅಲ್ಲಿ ಸಿಲುಕಿಕೊಂಡಂತಾಗಿದ್ದಾರೆ. ಅಪೂರ್ವಾ ತಂದೆ ವಿಜಯಪುರ ಜಿಲ್ಲಾಸ್ಪತ್ರೆಯಲ್ಲಿನ ಡೆಪ್ಯುಟಿ ಚೀಫ್ ಫಾರ್ಮಸಿ ಆಫೀಸರ್ ಸಿದ್ದಲಿಂಗಪ್ಪ ಕದಂಪುರ ಅವರು, ಮಗಳ ಜತೆ ಮಾತನಾಡಿದ್ದು, ಆಕೆ ಅಲ್ಲಿ ಸೇಫ್ ಆಗಿರುವುದಾಗಿ ಹೇಳಿದ್ದಾಳೆ ಎಂಬುದಾಗಿ ತಿಳಿಸಿದ್ದಾರೆ. ಸದ್ಯಕ್ಕೆ ಹಾಸ್ಟೆಲ್ನಲ್ಲೇ ಇರುವಂತೆ ಉಕ್ರೇನ್ ಸರ್ಕಾರ ತಿಳಿಸಿದ್ದಾಗಿ ಆಕೆ ತಂದೆಗೆ ಮಾಹಿತಿ ನೀಡಿದ್ದಾರೆ.
ಬೆಳಗಾವಿ ಜಿಲ್ಲೆಯ ಅಮೋಘಾ ಚೌಗಲಾ ಮತ್ತು ಪ್ರಿಯಾ ನಿಡಗುಂದಿ ಯೂಕ್ರೇನ್ನಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದು, ಅಲ್ಲಿ ಸಿಲುಕಿಕೊಂಡಿದ್ದಾರೆ. ರಾಜ್ಯಕ್ಕೆ ಮರಳಲು ಈ ವಿದ್ಯಾರ್ಥಿನಿಯರು ಏರ್ ಟಿಕೆಟ್ ಬುಕ್ ಮಾಡಿದ್ದು, ಪಾಲಕರೊಂದಿಗೆ ಸಂಪರ್ಕದಲ್ಲಿದ್ದಾರೆ ಎಂದು ಬೆಳಗಾವಿ ಜಿಲ್ಲಾಧಿಕಾರಿ ಎಂ.ಜಿ. ಹಿರೇಮಠ ತಿಳಿಸಿದ್ದಾರೆ.
ಕೊಪ್ಪಳ ಜಿಲ್ಲೆ ಯಲಬುರ್ಗಾ ತಾಲೂಕು ಕಲ್ಲೂರ ಗ್ರಾಮದ ಸಂಗಮೇಶ ಸೊಪ್ಪಿಮಠ ಯೂಕ್ರೇನ್ನಲ್ಲಿನ ವಿಎನ್ಎಂಯು ಯೂನಿವರ್ಸಿಟಿಯಲ್ಲಿ ವೈದ್ಯಕೀಯ ವಿದ್ಯಾಭ್ಯಾಸ ಮಾಡುತ್ತಿದ್ದು, ಸದ್ಯ ಯಾವುದೇ ತೊಂದರೆ ಇಲ್ಲ ಎಂದು ಮನೆಯವರಿಗೆ ಮಾಹಿತಿ ರವಾನಿಸಿದ್ದಾರೆ.
