ಖುಷಿ ತಾರದ ಕೃಷಿ: ರಾಜ್ಯಾದ್ಯಂತ ಬೆಳೆ ರಕ್ಷಿಸಿಕೊಳ್ಳಲು ಪರದಾಟ..

ಬೆಂಗಳೂರು: ಈ ಬಾರಿ ಮುಂಗಾರು ಆಶಾದಾಯಕವಾಗಿತ್ತು. ಮಳೆಯೂ ಕಾಲಕಾಲಕ್ಕೆ ಎಷ್ಟು ಬೇಕೋ ಅಷ್ಟೇ ಸುರಿದು ರೈತರ ಮೊಗದಲ್ಲಿ ಸಂತಸ ಮೂಡಿಸಿತ್ತು. ಕೋವಿಡ್ ಸಂಕಷ್ಟದಿಂದ ಪಾರಾಗಲು ಹಳ್ಳಿ ಸೇರಿದ್ದ ಜನ ಕೃಷಿಯಲ್ಲಿ ಖುಷಿ ಕಾಣುವ ಹಂಬಲದಲ್ಲಿದ್ದರು. ಇದೇ ಕಾರಣಕ್ಕೆ ಸರ್ಕಾರ ಅಂದಾಜು ಮಾಡಿದ್ದಕ್ಕಿಂತ ಅಧಿಕ ಪ್ರದೇಶದಲ್ಲಿ ಬಿತ್ತನೆಯಾಗಿತ್ತು. ಫಸಲು ಉತ್ತಮವಾಗಿತ್ತು. ಇನೇನು ಬೆಳೆ ಕೊಯ್ದು ಮನೆಗೆ ಒಯ್ಯಬೇಕು ಎನ್ನುವಷ್ಟರಲ್ಲಿ ಒಕ್ಕರಿಸಿದ ಸೈಕ್ಲೋನ್ ಎಲ್ಲವನ್ನೂ ನೀರು ಪಾಲು ಮಾಡಿದೆ. ಅದರಲ್ಲೂ ಭತ್ತ ಹಾಗೂ ರಾಗಿ ಬೆಳೆಗಳು ಸಂಪೂರ್ಣ ನೆಲ ಕಚ್ಚಿದ್ದು, ರೈತ ಸಮುದಾಯ ಮೂಕಪ್ರೇಕ್ಷಕವಾಗಿದೆ. ನಿರಂತರವಾಗಿ ಸುರಿಯುತ್ತಿರುವ ಮಳೆಯಿಂದಾಗಿ ಜನಜೀವನ ಅಸ್ತವ್ಯಸ್ತಗೊಂಡಿದೆ. ಅಳಿದುಳಿದ ಬೆಳೆ ರಕ್ಷಿಸಿಕೊಳ್ಳಲು ಪರದಾಡುತ್ತಿದ್ದಾರೆ. ಕಾಫಿ, ಅಡಿಕೆಯಂಥ ತೋಟಗಾರಿಕೆ ಬೆಳೆಗಳೂ ನೆಲಕಚ್ಚಿವೆ.

• ಉತ್ತರ ಕನ್ನಡ ಜಿಲ್ಲೆಯಲ್ಲಿ ಒಟ್ಟಾರೆ 1832 ಹೆಕ್ಟೇರ್​ಗೂ ಅಧಿಕ ಪ್ರದೇಶದಲ್ಲಿ ಭತ್ತದ ಬೆಳೆ ಹಾನಿ ಸಂಭವಿಸಿದೆ. ಅಡಕೆ ಬೆಳೆ ಕೊಯ್ಲು ಮಾಡಿದ್ದು, ಒಣಗಿಸಲಾಗದೆ ಪರದಾಡುವಂತಾಗಿದೆ.
• ದಾವಣಗೆರೆ ಜಿಲ್ಲೆಯಲ್ಲಿ ಭತ್ತ, ಮೆಕ್ಕೆಜೋಳ ಸೇರಿ 3758 ಎಕರೆ ಬೆಳೆ ನೀರು ಪಾಲಾಗಿದೆ. 163 ಮನೆ, 8 ಕೊಟ್ಟಿಗೆಗಳಿಗೆ ಹಾನಿಯಾಗಿದೆ.
• ಶಿವಮೊಗ್ಗ ಮತ್ತು ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಅನೇಕ ಕಡೆ ಮನೆಗಳು ಕುಸಿದಿವೆ. ಭತ್ತ, ಅಡಕೆ, ಕಾಫಿ, ಈರುಳ್ಳಿ ಇನ್ನಿತರ ಬೆಳೆಗಳಿಗೆ ಹಾನಿಯಾಗಿದೆ.
• ಗದಗ ಜಿಲ್ಲೆಯಲ್ಲಿ ಸಾವಿರಾರು ಹಕ್ಟೇರ್ ಪ್ರದೇಶದಲ್ಲಿ ಬೆಳೆದು ನಿಂತಿದ್ದ ಕೋಟ್ಯಂತರ ರೂ. ಮೌಲ್ಯದ ಫಸಲು ನಾಶವಾಗಿದೆ. 5 ಸಾವಿರ ಹೆಕ್ಟೇರ್​ನಷ್ಟು ಬೆಳೆ, 150 ಕ್ಕೂ ಮನೆಗಳಿಗೆ ಹಾನಿಯಾಗಿದೆ.
• ಬಳ್ಳಾರಿ ತಾಲೂಕಿನ ರೂಪನಗುಡಿ ಹಳ್ಳದಲ್ಲಿ ಶುಕ್ರವಾರ ತಡರಾತ್ರಿ ಕಾರೊಂದು ಕೊಚ್ಚಿಕೊಂಡು ಹೋಗಿದೆ. ಅದೃಷ್ಟವಶಾತ್ ಕಾರಿನಲ್ಲಿದ್ದ ವ್ಯಕ್ತಿ ಹಳ್ಳದ ಪಕ್ಕದಲ್ಲಿದ್ದ ಮರ ಏರಿ ಬೆಳಗ್ಗೆಯಾಗುವರೆಗೆ ಕುಳಿತಿದ್ದರು. ಬೆಳಗ್ಗೆ ಸ್ಥಳೀಯರು ಗಮನಿಸಿದಾಗ ಅಗ್ನಿಶಾಮಕ ದಳ ಹಾಗೂ ಪಿ.ಡಿ.ಹಳ್ಳಿ ಪೊಲೀಸರು ಆಗಮಿಸಿ, ಆತನನ್ನು ರಕ್ಷಿಸಿದ್ದಾರೆ.
• ವಿಜಯನಗರದಲ್ಲಿ ನಿರಂತರ ಸುರಿದ ಮಳೆಯಿಂದ ಹರಪನಹಳ್ಳಿ ತಾಲೂಕು ಉಚ್ಚಂಗಿದುರ್ಗದ ಗುಡ್ಡದ ಶಿಖರದ ಮೇಲಿಂದ ಕಲ್ಲುಗಳು ಉರುಳುತ್ತಿದ್ದು, ಮಳೆ ನಿಲ್ಲುವವರೆಗೆ ದೇವಿಯ ದರ್ಶನಕ್ಕೆ ಆಗಮಿಸದಂತೆ ತಾಲೂಕು ಆಡಳಿತ ಮನವಿ ಮಾಡಿದೆ. ಜಿಟಿಜಿಟಿ ಮಳೆಯ ನಡುವೆಯೂ ಹಂಪಿಯಲ್ಲಿ ಪ್ರವಾಸಿಗರ ಸ್ಮಾರಕಗಳನ್ನು ಕಣ್ತುಂಬಿಕೊಂಡರು.
• ಕೊಪ್ಪಳದ ತುಂಗಭದ್ರಾ ನದಿ ದಡದಲ್ಲಿರುವ ಕೃಷ್ಣದೇವರಾಯ ಮಂಟಪ ಜಲಾವೃತವಾಗಿದೆ. ನವ ವೃಂದಾವನ ಗಡ್ಡಿ ಸಂಪರ್ಕ ಕಡಿತವಾಗಿದೆ. ಟಿಬಿ ಡ್ಯಾಂನಿಂದ 45 ಸಾವಿರ ಕ್ಯೂಸೆಕ್ ನೀರು ನದಿಗೆ ಬಿಡುಗಡೆ ಮಾಡಲಾಗಿದೆ.
• ಬೆಳಗಾವಿ ಜಿಲ್ಲೆಯಲ್ಲಿ ನ.25ರ ವರೆಗೂ ಅತಿವೃಷ್ಟಿ ಸಾಧ್ಯತೆಯಿಂದಾಗಿ ನದಿ ಪಾತ್ರದ ಜನ ಅಗತ್ಯ ಸಾಮಗ್ರಿ ಹಾಗೂ ಜಾನುವಾರುಗಳೊಂದಿಗೆ ಸುರಕ್ಷಿತ ಪ್ರದೇಶಗಳಿಗೆ ತೆರಳಬೇಕು ಎಂದು ಜಿಲ್ಲಾಧಿಕಾರಿ ಆರ್.ವೆಂಕಟೇಶಕುಮಾರ್ ಶನಿವಾರ ಸೂಚಿಸಿದ್ದಾರೆ.

ನಾಳೆಯಿಂದ ಕ್ಷೀಣ?: ರಾಜ್ಯದ ವಿವಿಧೆಡೆ ಹಲವು ದಿನಗಳಿಂದ ಸುರಿಯುತ್ತಿರುವ ಮಳೆ ನ.22ರಿಂದ ಕ್ಷೀಣಿಸುವ ಸಾಧ್ಯತೆಯಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.

ಅಣೆಕಟ್ಟೆಗೆ ಪ್ರಾಣಿ ಬಲಿ!

ಚಾಮರಾಜನಗರ: ಕೆರೆಕಟ್ಟೆ, ಜಲಾಶಯ ಭರ್ತಿಯಾದರೆ ಬಾಗಿನ ಅರ್ಪಿಸುವುದು ಪದ್ಧತಿ. ಆದರೆ, ಗಡಿ ಮತ್ತು ಕಾಡಂಚಿನ ಈ ಗ್ರಾಮದ ಅಣೆಕಟ್ಟೆ ತುಂಬಿರುವುದಕ್ಕೆ ಪ್ರಾಣಿ ಬಲಿ ಕೊಟ್ಟು ಪೂಜೆ ಸಲ್ಲಿಸಲಾಗಿದೆ. ಹನೂರು ತಾಲೂಕಿನ ಮಲೆಮಹದೇಶ್ವರಬೆಟ್ಟ ಸಮೀಪದ ಗೋಪಿನಾಥಂ ಅಣೆಕಟ್ಟೆಗೆ ಸತತ ಮಳೆಯಿಂದ ಜೀವಕಳೆ ಬಂದಿರುವುದಕ್ಕೆ ಗ್ರಾಮಸ್ಥರು ಕುರಿ ಬಲಿ ಕೊಟ್ಟು ರಕ್ತವನ್ನು ನೀರಿನಲ್ಲಿ ಬಿಟ್ಟು ಪೂಜೆ ಸಲ್ಲಿಸಿದ್ದಾರೆ. ಬುಧವಾರ ಈ ಧಾರ್ವಿುಕ ಕಾರ್ಯ ನಡೆಸಿ ಊರಿನ ಜನ ಮಾಂಸದೂಟ ಮಾಡಿ ಹಬ್ಬ ಮಾಡಿದ್ದಾರೆ.

ಸರ್ಕಾರವು ಅಧಿಕಾರ ರಾಜಕಾರಣದಲ್ಲಿ ಮುಳುಗಿ ಮಳೆ ಹಾನಿಯಿಂದ ಸಂಕಷ್ಟಕ್ಕೆ ಸಿಲುಕಿರುವ ರೈತನನ್ನು ಮರೆಯಬಾರದು. ಕೋವಿಡ್ ಮಹಾಮಾರಿ ಯಿಂದ ತತ್ತರಿಸಿದ್ದ ಜನ ಈಗ ಮಳೆಯಿಂದ ಕಷ್ಟಕ್ಕೆ ಸಿಲುಕಿದ್ದಾರೆ. ಮತ್ತೆ ಅವರು ಬದುಕು ಕಟ್ಟಿಕೊಳ್ಳುವ ಮುನ್ನವೇ ಮಳೆ ಸಂಕಷ್ಟಕ್ಕೀಡು ಮಾಡಿದೆ. ಬೆಳೆದ ಬೆಳೆ ಕಣ್ಮುಂದೆಯೇ ಕೊಚ್ಚಿಹೋಗುತ್ತಿದೆ. ರಾಜ್ಯ ಸರಕಾರ ಮಾಡಿರುವುದೇನು? ಸಚಿವರು ಎಲ್ಲಿದ್ದಾರೆ? ಅಧಿಕಾರಿಗಳೇನು ಮಾಡುತ್ತಿದ್ದಾರೆ? ಸರಕಾರ ಸಭೆಗಳಿಗೆ ಸೀಮಿತವಾದರೆ ಪ್ರಯೋಜನ ಶೂನ್ಯ. ಅಧಿಕಾರಿಗಳು ಹಳ್ಳಿಗಳತ್ತ ನಡೆಯಲಿ .| ಎಚ್.ಡಿ.ಕುಮಾರಸ್ವಾಮಿ ಮಾಜಿ ಮುಖ್ಯಮಂತ್ರಿ

ತುರ್ತು ಪರಿಹಾರ ಬಿಡುಗಡೆ

2 ದಿನದಲ್ಲಿ 18 ಸಾವು; ನಿಲ್ಲದ ಮಳೆ ರಗಳೆ, ರಾಜ್ಯದ ರೈತರು ಕಂಗಾಲು

ರಾಜ್ಯದ ಬಹುತೇಕ ಜಿಲ್ಲೆಗಳಲ್ಲಿ ವರುಣನ ಆರ್ಭಟ ಮುಂದುವರಿದಿದ್ದು, ಕಳೆದ 2 ದಿನದಲ್ಲಿ ಮಳೆಸಂಬಂಧಿ ಅವಘಡಗಳಲ್ಲಿ ಒಟ್ಟು 18 ಮಂದಿ ಸಾವನ್ನಪ್ಪಿದ್ದಾರೆ. ಶುಕ್ರವಾರ ರಾಜ್ಯದಲ್ಲಿ 9 ಮಂದಿ ಮೃತಪಟ್ಟಿದ್ದರು. ಶನಿವಾರ ಸಹ 9 ಮಂದಿ ಸಾವನ್ನಪ್ಪಿದ್ದಾರೆ. ಅತ್ತ ಆಂಧ್ರಪ್ರದೇಶದಲ್ಲೂ ಮಳೆ, ನೆರೆ ಆರ್ಭಟಕ್ಕೆ ಜನರು ತತ್ತರಿಸಿದ್ದು, ಸಾವಿನ ಸಂಖ್ಯೆ 24ಕ್ಕೆ ಏರಿಕೆಯಾಗಿದೆ. ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಇಬ್ಬರು ರೈತರು ಮಳೆ ನೀರಲ್ಲಿ ಕೊಚ್ಚಿಹೋಗಿದ್ದಾರೆ. ಸಿದ್ದರಹಳ್ಳಿಯ ಪೊನ್ನುಸ್ವಾಮಿ (53) ಮತ್ತು ಅಜ್ಜಂಪುರ ತಾಲೂಕಿನ ಹೆಗ್ಗಡಿಹಳ್ಳಿ ಗ್ರಾಮದ ನಿವಾಸಿ ಆನಂದ್(40) ಮೃತರು. ದಾವಣಗೆರೆ ಜಿಲ್ಲೆಯಲ್ಲಿ ಮಳೆಯ ಆರ್ಭಟಕ್ಕೆ ಮೂವರು ಬಲಿಯಾಗಿದ್ದಾರೆ. ಶುಕ್ರವಾರ ರಾತ್ರಿ ಹರಿಹರ ತಾಲೂಕು ಗೋವಿನಹಾಳು ಗ್ರಾಮದ ಕುರಿದಡ್ಡಿಯಲ್ಲಿದ್ದ ಚಪ್ಪರ ಕುಸಿದು ಬಸವರಾಜಪ್ಪ (62) ಮೃತಪಟ್ಟಿದ್ದು 2 ಕುರಿಗಳು ಅಸುನೀಗಿವೆ. ಚನ್ನಗಿರಿ ತಾಲೂಕು ನಲ್ಲೂರು ಸೇತುವೆ ಬಳಿ ಎರವನಾಗತಿಹಳ್ಳಿಯ ಕೆಂಚಪ್ಪ (70) ಎಂಬುವವರು ಶನಿವಾರ ರಸ್ತೆ ದಾಟುವಾಗ ನೀರಿನಲ್ಲಿ ಕೊಚ್ಚಿ ಹೋಗಿದ್ದಾರೆ.

ದಾವಣಗೆರೆ ತಾಲೂಕು ಹುಚ್ಚವ್ವನಹಳ್ಳಿ ಕೆರೆಯಲ್ಲಿ ಮೀನು ಹಿಡಿಯಲುಹೋಗಿದ್ದ ತಿಪ್ಪೇಸ್ವಾಮಿ ಎಂಬುವರು ಕಾಲು ಜಾರಿ ಕೆರೆಗೆ ಬಿದ್ದು ಮೃತಪಟ್ಟಿದ್ದಾರೆ. ಮಳೆಗೆ ಫಸಲು ನಷ್ಟವಾಗಿದ್ದರಿಂದ ಮನನೊಂದು ಶಿರಸಿ ತಾಲೂಕಿನ ನರೂರಿನ ರೈತ ಗಂಗಾಧರ ಶೇಷಣ್ಣನವರ (58) ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಹಾವೇರಿ ಜಿಲ್ಲೆಯ ಸವಣೂರ ದೊಡ್ಡಕೆರೆಯಲ್ಲಿ ಮೀನು ಹಿಡಿಯಲು ಹೋಗಿದ್ದ ಹಾನಗಲ್ಲ ತಾಲೂಕು ಕಾಮನಹಳ್ಳಿ ನಿವಾಸಿ ಹೆಗ್ಗಪ್ಪ ನಿಂಗಪ್ಪ ಜಾನಗುಂಡಿ(37) ಮುಳುಗಿ ಮೃತಪಟ್ಟಿದ್ದಾರೆ. ರಟ್ಟಿಹಳ್ಳಿ ತಾಲೂಕು ಬೆಟಕೇರೂರನಲ್ಲಿ ವಿದ್ಯುತ್ ಸ್ಪರ್ಶದಿಂದ ಮಕರಿ ಗ್ರಾಮದ ರೈತ ಶಿವು ರಾಮಪ್ಪ ಇಂಗಳಗೊಂದಿ(38) ಸಾವಿಗೀಡಾಗಿದ್ದಾರೆ. ತುಮಕೂರು ಜಿಲ್ಲೆಯ ವಡೇರಹಳ್ಳಿಯಲ್ಲಿ ಮುಳುಗುತ್ತಿದ್ದ ಮೋಟಾರನ್ನು ಮೇಲೆತ್ತುವ ಪ್ರಯತ್ನದಲ್ಲಿದ್ದಾಗ ಕಾಲುಜಾರಿ ಬಿದ್ದು ರಾಮಮೂರ್ತಿ (55)ಎಂಬುವವರು ಮೃತಪಟ್ಟಿದ್ದಾರೆ.

https://www.vijayavani.net/man-gave-supari-to-kill-wife-for-sake-of-another-woman/