ಮನೆ ಜಗಳ ಹೆಚ್ಚಳ! ಲಾಕ್​ಡೌನ್ ಟೈಮಲ್ಲಿ ಸಹಾಯಕ್ಕೆ ಮೊರೆ

ಬೆಂಗಳೂರು: ನೂರಾರು ಕುಟುಂಬಗಳನ್ನು ಮನೆಯೊಳಗೆ ಒಗ್ಗೂಡಿಸಿರುವ ಲಾಕ್​ಡೌನ್​ನಿಂದ ದಾಂಪತ್ಯ ಕಲಹ ಕೂಡ ಹೆಚ್ಚಾಗಿದೆ! ಕೌಟುಂಬಿಕ ಸಮಸ್ಯೆ ಬಗೆಹರಿಸುವಲ್ಲಿ ಸಕ್ರಿಯವಾಗಿರುವ ವನಿತಾ ಸಹಾಯವಾಣಿ ಕೇಂದ್ರಕ್ಕೆ ಬರುವ ಕರೆಗಳ ಸಂಖ್ಯೆ ಕೆಲವು ದಿನಗಳಿಂದ ಹೆಚ್ಚಳವಾಗಿದ್ದು, ಬಹುತೇಕ ಪ್ರಕರಣಗಳು ಕೌಟುಂಬಿಕ ದೌರ್ಜನ್ಯಕ್ಕೆ ಸೀಮಿತವಾಗಿವೆ. ಲಾಕ್​ಡೌನ್ ಮುನ್ನ ಸಲಹಾ ಕೇಂದ್ರಕ್ಕೆ ಪ್ರತಿನಿತ್ಯ 5 ರಿಂದ 10 ಪ್ರಕರಣ ಬರುತ್ತಿತ್ತು. ಇದೀಗ ಕನಿಷ್ಠ 26 ರಿಂದ 30 ದೂರು ಬರುತ್ತಿವೆ. ಶೇ.70 ಪ್ರಕರಣ ಕೌಟುಂಬಿಕ ದೌರ್ಜನ್ಯಕ್ಕೆ ಸಂಬಂಧಿಸಿದ ಕರೆಗಳಾಗಿವೆ. ಉಳಿದ ಕೇಸ್​ಗಳು ಪಾಸ್ ಕೊಡಿಸಿ, ಊಟ ತಂದು ಕೊಡಿ, ಮನೆಗೆ ಹೋಗಲು ವ್ಯವಸ್ಥೆ ಮಾಡಿ ಎಂಬುದಕ್ಕೆ ಸೀಮಿತವಾಗಿವೆ.

ಹಳೇ ಚಾಳಿ ಶುರು: ವಿವಾಹಿತ ಮಹಿಳೆಯೊಬ್ಬರು ಈ ಹಿಂದೆ ಪತಿಯ ದೈಹಿಕ ಕಿರುಕುಳದಿಂದ ಬೇಸತ್ತು ಪೊಲೀಸರಿಗೆ ದೂರು ನೀಡಿದ್ದರು. ಬಳಿಕ ಪೊಲೀಸರು ಎಚ್ಚರಿಕೆ ನೀಡಿದ್ದರಿಂದ ಕಿರುಕುಳ ನಿಲ್ಲಿಸಿದ್ದ ಪತಿರಾಯ ಲಾಕ್​ಡೌನ್ ಸಂದರ್ಭದಲ್ಲಿ ಹಳೇ ಚಾಳಿ ಮುಂದುವರಿಸಿದ್ದಾನೆ. ಆತನ ಕಿರುಕುಳ ತಾಳಲಾರದೆ ಮಹಿಳೆ ಸಹಾಯವಾಣಿಗೆ ಕರೆ ಮಾಡಿ ದೂರು ನೀಡಿದ್ದಾಳೆ. ಸ್ಥಳೀಯ ಠಾಣೆಗೆ ಮಾಹಿತಿ ಕೊಟ್ಟು ಸರಿಪಡಿಸುವ ಪ್ರಯತ್ನ ಮಾಡಿದ್ದಾರೆ.

ಕೇಸ್ ನಂ.3: ಮನೆಯಿಂದಲೇ ಕೆಲಸ ಮಾಡುತ್ತಿರುವ ಪ್ರತಿಷ್ಠಿತ ಸಂಸ್ಥೆಯ ಸಾಫ್ಟ್​ವೇರ್ ಇಂಜಿನಿಯರ್ ಇತ್ತೀಚೆಗೆ ಪತ್ನಿಗೆ ದೈಹಿಕ ಹಿಂಸೆ ನೀಡುತ್ತಿದ್ದ. ಲಾಕ್​ಡೌನ್ ಹಿನ್ನೆಲೆಯಲ್ಲಿ ತವರು ಮನೆಗೂ ಹೋಗಲಾಗದೆ ಆಕೆ ಹಿಂಸೆ ಸಹಿಸಿಕೊಂಡಿದ್ದಾರೆ. ದಯವಿಟ್ಟು ಸಹಾಯ ಮಾಡಿ ಎಂದು ಸಹಾಯವಾಣಿಗೆ ಕರೆ ಮಾಡಿದ್ದಾರೆ. ಆಪ್ತ ಸಮಾಲೋಚಕರು ಸ್ಥಳೀಯ ಪೊಲೀಸರ ಮೊಬೈಲ್ ನಂಬರ್ ನೀಡಿ, ದೂರು ನೀಡುವಂತೆ ಸೂಚಿಸಿದ್ದಾರೆ.

ಕೇಸ್ ನಂ.4: ಖಾಸಗಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿರುವ ಪತಿ ನನ್ನೊಂದಿಗೆ ಅನ್ಯೋನ್ಯವಾಗಿದ್ದರು. ಲಾಕ್​ಡೌನ್ ಬಳಿಕ ಕಳೆದ ಒಂದು ವಾರದಿಂದ ಸುಮ್ಮನೆ ಜಗಳ ಮಾಡುತ್ತಾ ದೈಹಿಕವಾಗಿ ಹಿಂಸಿಸುತ್ತಿದ್ದಾರೆ. ದಯವಿಟ್ಟು ಪತಿಗೆ ಬುದ್ದಿಮಾತು ಹೇಳಿ ಎಂದು ಪತ್ನಿ ಮನವಿ ಮಾಡಿಕೊಂಡಿದ್ದಳು. ಸಹಾಯವಾಣಿ ಸಿಬ್ಬಂದಿ ಪತಿಗೆ ಕರೆ ಮಾಡಿದಾಗ ಆತನ ಮೊಬೈಲ್ ಸ್ವಿಚ್ ಆಫ್ ಆಗಿದೆ.

ಕೇಸ್ ನಂ.5: ಲಾಕ್​ಡೌನ್ ಬಳಿಕ ಬಾಡಿಗೆದಾರರು ಮನೆಯ ಬಾಡಿಗೆ ನೀಡಿಲ್ಲ ಎಂದು ಬೆಂಗಳೂರಿನ ವ್ಯಕ್ತಿಯೊಬ್ಬರು ಸಹಾಯವಾಣಿ ಮೊರೆ ಹೋಗಿದ್ದಾರೆ. ಇಂತಹ ಸಂದರ್ಭದಲ್ಲಿ ಬಾಡಿಗೆ ಕೇಳುವುದು ಸರಿಯಲ್ಲ ಎಂದು ಆಪ್ತ ಸಮಾಲೋಚಕರು ಬುದ್ಧಿಮಾತು ಹೇಳಿದ್ದಾರೆ

ನಮ್ಮ 100ಕ್ಕೂ ಬರ್ತವೆ: ‘ನಮ್ಮ 100’ ಸಹಾಯವಾಣಿಗೂ ಪ್ರತಿದಿನ ಸರಾಸರಿ 50 ರಿಂದ 60 ಕರೆಗಳು ಬರುತ್ತಿವೆ. ಇದರಲ್ಲಿ ಅಂಗಡಿ ಮುಂದೆ ಜನಜಂಗುಳಿ ಇದೆ. ಕ್ವಾರೆಂಟೈನ್​ನಲ್ಲಿರುವವರು ಹೊರ ಬರುವುದು, ಕೌಟುಂಬಿಕ ಸಮಸ್ಯೆಗಳಂತಹ ಕರೆಗಳೇ ಹೆಚ್ಚಾಗಿವೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

6 ತಿಂಗಳ ಗರ್ಭಿಣಿ ಅಳಲು: ಖಾಸಗಿ ಕಂಪನಿಯ 39 ವರ್ಷದ ಮಹಿಳಾ ಉದ್ಯೋಗಿ ಕೆಲ ವರ್ಷದ ಹಿಂದೆ ಅನ್ಯ ಧರ್ಮದ ಯುವಕನನ್ನು ವಿವಾಹವಾಗಿದ್ದರು. ಸದ್ಯ ಆಕೆ 6 ತಿಂಗಳ ಗರ್ಭಿಣಿ. ಲಾಕ್​ಡೌನ್​ನಿಂದಾಗಿ ಪತಿ ಮನೆಯಿಂದಲೇ ಕೆಲಸ ಮಾಡುತ್ತಿದ್ದಾನೆ. ಪ್ರತಿದಿನ ಹಲ್ಲೆ ನಡೆಸಿ ಕಿರುಕುಳ ನೀಡುತ್ತಿದ್ದು, ಮನೆಯಿಂದ ಹೊರಹೋಗಲೂ ಆಗದೇ ಒದ್ದಾಡುತ್ತಿದ್ದೇನೆ. ಹೇಗಾದರು ಮಾಡಿ ನನ್ನನ್ನು ಕಾಪಾಡಿ ಎಂದು ಸಂತ್ರಸ್ತೆ ಅಳಲು ತೋಡಿಕೊಂಡಿದ್ದಾರೆ.