Family Care: ಮಕ್ಕಳಿಗೆ ಕೋಪ ಬಂದಾಗ ಪೋಷಕರು ಏನು ಮಾಡ್ಬೇಕು? ಈ ಸರಳ ವಿಧಾನಗಳು ತುಂಬಾ ಪರಿಣಾಮಕಾರಿ!

ಮಗು ಕೋಪಗೊಂಡಾಗ ಅದನ್ನು ಹೊಡೆಯುವುದು, ಬೈಯುವುದು ಅಥವಾ ಬೆದರಿಸುವುದು ಸಮಸ್ಯೆಯನ್ನು ಮತ್ತಷ್ಟು ಹೆಚ್ಚಿಸಬಹುದು. ಬದಲಾಗಿ ಶಾಂತವಾಗಿ ಪರಿಸ್ಥಿತಿಯನ್ನು ನಿಭಾಯಿಸುವುದು ಮುಖ್ಯ.

ಮಗು ಕೋಪಗೊಂಡಾಗ ಪೋಷಕರೂ ಕೋಪಗೊಳ್ಳಬಾರದು. ನೀವು ಶಾಂತವಾಗಿದ್ದರೆ ಮಗುವೂ ನಿಧಾನವಾಗಿ ಸಮಾಧಾನಗೊಳ್ಳುವ ಸಾಧ್ಯತೆ ಹೆಚ್ಚಿರುತ್ತದೆ. ಕೋಪದ ಸಮಯದಲ್ಲಿ ದೊಡ್ಡ ಭಾಷಣ ಮಾಡುವುದು ಅಥವಾ ಶಿಕ್ಷೆ ನೀಡುವುದು ಪರಿಣಾಮಕಾರಿಯಾಗುವುದಿಲ್ಲ ಎಂದು ತಜ್ಞರು ಹೇಳುತ್ತಾರೆ.

ಕೆಲವೊಮ್ಮೆ ಮಕ್ಕಳು ತಮ್ಮ ಭಾವನೆಗಳನ್ನು ಸರಿಯಾಗಿ ಹೇಳಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಇದರಿಂದ ಕೋಪದ ರೂಪದಲ್ಲಿ ಪ್ರತಿಕ್ರಿಯಿಸುತ್ತಾರೆ. ಅಂತಹ ಸಂದರ್ಭದಲ್ಲಿ "ನಿನಗೆ ಏನಾಯಿತು?" ಅಥವಾ "ಯಾಕೆ ಬೇಸರವಾಗಿದೆ?" ಎಂದು ಪ್ರೀತಿಯಿಂದ ಕೇಳಬೇಕು. ಮಗುವಿನ ಮಾತನ್ನು ಗಮನದಿಂದ ಕೇಳುವುದು ಬಹಳ ಮುಖ್ಯ.

ಮಗುವಿಗೆ ಕೋಪ ಬರುವುದು ತಪ್ಪಲ್ಲ. ಆದರೆ ಕೋಪವನ್ನು ಹೇಗೆ ನಿಯಂತ್ರಿಸಬೇಕು ಎಂಬುದನ್ನು ಕಲಿಸಬೇಕು. "ನಿನಗೆ ಕೋಪ ಬಂದಿದೆ ಎಂದು ನನಗೆ ಅರ್ಥವಾಗಿದೆ" ಎಂಬ ಮಾತುಗಳು ಮಗುವಿಗೆ ಆತ್ಮವಿಶ್ವಾಸ ನೀಡುತ್ತವೆ. ಇದರಿಂದ ಪೋಷಕರು ತನ್ನನ್ನು ಅರ್ಥ ಮಾಡಿಕೊಳ್ಳುತ್ತಿದ್ದಾರೆ ಎಂಬ ಭಾವನೆ ಮೂಡುತ್ತದೆ.

ಸಣ್ಣ ಮಕ್ಕಳಲ್ಲಿ ಕೋಪ ಹೆಚ್ಚು ಸಮಯ ಉಳಿಯುವುದಿಲ್ಲ. ಆಟ, ಚಿತ್ರಕಲೆ, ಕಥೆ ಹೇಳುವುದು ಅಥವಾ ಇಷ್ಟದ ಚಟುವಟಿಕೆಗಳಲ್ಲಿ ತೊಡಗಿಸುವ ಮೂಲಕ ಅವರ ಗಮನವನ್ನು ಬೇರೆಡೆ ಸೆಳೆಯಬಹುದು.ಇದರಿಂದ ಅವರ ಮನಸ್ಥಿತಿ ಶೀಘ್ರವಾಗಿ ಬದಲಾಗುತ್ತದೆ.

ಮಗು ತನ್ನ ಕೋಪವನ್ನು ನಿಯಂತ್ರಿಸಿದಾಗ ಅದನ್ನು ಮೆಚ್ಚಬೇಕು. "ನೀನು ಚೆನ್ನಾಗಿ ನಿಭಾಯಿಸಿದ್ದೀಯ" ಎಂದು ಹೇಳುವುದರಿಂದ ಉತ್ತಮ ವರ್ತನೆ ಬೆಳೆಸಬಹುದು. ಪೋಷಕರ ಪ್ರೋತ್ಸಾಹ ಮಕ್ಕಳ ಆತ್ಮವಿಶ್ವಾಸ ಹೆಚ್ಚಿಸಲು ಸಹಾಯ ಮಾಡುತ್ತದೆ.

ಮಗುವಿನ ಕೋಪ ಅತಿಯಾಗಿ ಹೆಚ್ಚುತ್ತಿದ್ದರೆ, ಆಗಾಗ ಹಿಂಸಾತ್ಮಕ ವರ್ತನೆ ತೋರಿಸುತ್ತಿದ್ದರೆ ಅಥವಾ ದಿನನಿತ್ಯದ ಜೀವನದ ಮೇಲೆ ಪರಿಣಾಮ ಬೀರುತ್ತಿದ್ದರೆ ಮಕ್ಕಳ ಮನೋವೈದ್ಯರು ಅಥವಾ ತಜ್ಞರ ಸಲಹೆ ಪಡೆಯುವುದು ಉತ್ತಮ. ಸಮಯಕ್ಕೆ ಸರಿಯಾಗಿ ಗಮನ ನೀಡಿದರೆ ಮಕ್ಕಳ ಭಾವನಾತ್ಮಕ ಬೆಳವಣಿಗೆ ಆರೋಗ್ಯಕರವಾಗಿರುತ್ತದೆ.

ಮಕ್ಕಳ ಕೋಪವನ್ನು ಕಡಿಮೆ ಮಾಡಲು ಪ್ರೀತಿ, ತಾಳ್ಮೆ ಮತ್ತು ಸಂವಹನ ಅತ್ಯಂತ ಮುಖ್ಯ. ಶಿಕ್ಷೆಗಿಂತ ಅರ್ಥಮಾಡಿಕೊಳ್ಳುವ ಮನೋಭಾವ ಮಕ್ಕಳೊಂದಿಗೆ ಉತ್ತಮ ಬಾಂಧವ್ಯ ಬೆಳೆಸಲು ಸಹಾಯ ಮಾಡುತ್ತದೆ,(ಏಜೆನ್ಸೀಸ್​).